काठमाडौं– अन्ततः चार्ल्स शोभराजलाई कैदमुक्त हुने भएका छन् । उनलाई कैद मुक्त गर्न सर्वोच्च अदालतले पुस ६ गते आदेश दिएको हो । ७८ वर्षीय उनी बिकिनी किलर नामले चिनिने गरेका थिए ।
न्यायाधीश सपना प्रधान मल्ल र तिलप्रसाद श्रेष्ठको इजलासले यस्तो आदेश दिएको सर्वोच्च अदालतका प्रवक्ता विमल पौडेलले बताउनु भयो । उहाँका अनुसार शोभराजले दिएको बन्दी प्रत्यक्षीकरणको मुद्दामा इजलासले यस्तो आदेश दिएको हो । उहाँले भन्नुभयो, ‘सर्वोच्च अदालतले यो आदेशको जानकारी जिल्ला अदालत काठमाडौं, भक्तपुर र केन्द्रीय कार्यालयलाई पठाइसकिएको छ ।’ उहाँले थप भन्नुभयो, ‘यो आदेश पाएपछि जिल्ला अदालतले अन्य मुद्दामा कैद भोग्नुपर्ने छ कि छैन भनेर हेर्छ । यदि रहेनछ भने जिल्ला अदालतले छोड्नका लागि कारागारलाई पत्राचार गर्ने छ, त्यसपछि मात्र उनी छुट्ने छन् ।’
अमेरिकी र क्यानेडियन नागरिकको हत्यामा उनलाई नेपालमा पक्राउ गरी मुद्दा चलाइएको थियो ।
उनले १९ वर्ष कैद सजाय भोगिसकेको र उमेर वृद्ध भएको हुँदा कानुनले दिएको सुविधा पाउनुपर्ने माग गर्दै रिट दायर गरेका थिए ।
को हुन् चार्ल्स शोभराज ?
सन् १९४४ अप्रिल ६ मा भियतनाममा जन्मिएका चार्ल्स शोभराजका बाबु भारतीय मूलका हुन् भने आमा भियतनामी हुन् । उनी त्यस्ता व्यक्ति हुन् जसले कुनै बेला ‘नेपालको एअरपोर्टबाट हात्ती छिराइदिन सक्छु’ भनेका थिए । भारतीय मूलका फ्रेन्च नागरिक शोभराजको वास्तविक नाम हाचन्ड भओनानी गुरु मुख चार्ल्स शोभराज हो ।
सन् १९६३ मा १९ वर्षको उमेरमा पहिलो पटक पेरिसमा चोरी प्रयास गर्दा उनी एक वर्ष जेल परेका थिए । जेल बसाईकै क्रममा अन्डरवर्ल्ड समूहसँग सम्बन्ध विस्तार गरेका उनी जेलबाट छुटेपछि थप आपराधिक क्रियाकलापमा संलग्न भएका थिए ।
फ्रान्समा प्रहरीले उनी उपर निगरानी बढाउन थालेपछि उनी सन् १९७० मा भारतको मुम्बईमा आए र त्यहाँ उनले शुरुका दिनमा कार चोर्ने र बेच्ने काम थाले ।
भारतबाट इरान, टर्की, ग्रिस हुँदै उनी सन् १९७५ (विसं २०३२)मा थाइल्याण्ड पुगे । त्यहाँ उनले त्यसैवर्ष तीन पर्यटकको हत्या गरेका थिए भन्ने आरोप छ । भएको उक्त घटनाले थाइल्यान्डमा तहल्का समेत मच्चाएको थियो । हत्या गरिएका पर्यटकको पासपोर्ट लिएर उनी पुनः भारत छिरेका थिए । सन् १९७० देखि १९७६ को बीचमा मात्र उनले २० भन्दा बढीको हत्या गरेको आरोप छ ।
सन् १९७५ मा नेपाल आएका एक अमेरिकी र एक क्यानडेली नागरिकको हत्या अभियोग उनी उपर लाग्यो । सन् २००३ मा उनलाई नेपाल प्रहरीले पक्राउ गरेको हो । सन् २००४ मा अदालतले उनलाई आजीवन कारावासको सजाय सुनाएसँगै उनी कैद भुक्तान गर्दै थिए ।
हत्यापछि फरार भएका शोभराज २०६१ सालमा काठमाडौं आएका थिए । त्यही बेला उनलाई प्रहरीले पक्राउ गरेको हो । पक्राउ परेपछि काठमाडौं र भक्तपुर जिल्ला अदालतमा हत्या मुद्दा अघि बढेको थियो ।
दुवै अदालतले उनलाई फरक फरक समयमा जन्मकैद हुने फैसला सुनाएका छन् । काठमाडौं जिल्ला अदालतमा चलेको उनको मुद्दा सर्वोच्च अदालतसम्म पुगेको थियो । जिल्ला अदालतले उनलाई गरेको जन्मकैदको फैसला सर्वोच्च अदालतले सदर गरेको थियो ।
पक्राउ परेपछि अहिलेसम्म उनले केन्द्रीय कारागार सुन्धारामा कैद सजाय काटिरहेका छन् । उनलाई २०८० साल असोज १ गतेसम्म कैद राख्नु पर्ने पुर्जी अदालतले जारी गरेको थियो ।
तर उनै चार्ल्स शोभराजलाई सर्वोच्चले आजै कैदबाट मुक्त गर्न र आदेश भएको १५ दिन भित्र आफ्नो देश फर्काउन आवश्यक व्यवस्था मिलाउन समेत आदेशमा भनिएको छ ।
जेलभित्र असल चालचलन भएका ७५ वर्ष उमेर पुगेका कसुरदारलाई ७५ प्रतिशतसम्म कैद छुट दिन सकिने कानुनी व्यवस्था छ । उक्त व्यवस्था कैद सजाय भोगिरहेका नेपालीमात्र होइन विदेशी नागरिकको हकमा पनि लागु हुनु पर्ने शोभराजको जिकिर थियो । उनको जिकिरलाई अदालतले स्वीकार गरेको छ ।
जेष्ठ नागरिकले पाउनु पर्ने ७५ प्रतिशत कैद छुटको सुविधा दिलाउन माग गर्दै सर्वोच्चमा रिट हालेका थिए ।
आदेशमा उनलाई वृद्धको सुविधा दिएर छाड्न भनिएको छ ।
शोभराजले गृह मन्त्रालय, कारागार व्यवस्थापन विभाग लगायतलाई विपक्षी बनाई रिट दायर गरेका थिए ।
प्रकाशित मिति २०७९ पुष ६, बुधबार १९:३८ गते
