९७ वर्षीया वृद्धा दशकौँ पहिले हजारौँको हत्यामा संलग्न भएको अभियोगमा दोषी ठहर

बर्लिन– एउटा नाजी यातना शिविरका कमान्डर पदमा काम गरेका एकजना पूर्वसचिवलाई १० हजार ५०५ जना भन्दा बढी मानिसको हत्यामा संलग्न रहेको अभियोगमा पुस ६ गते दोषी ठहर गरिएको छ । ९७ वर्षीया एर्मगार्ड फर्चनरलाई स्टथोफमा किशोरावस्थामा टायपिस्टको नोकरी दिइएको थियो । उनले त्यहाँ सन् १९४३ देखि १९४५ सम्म काम गरेकी थिइन् । दसकौँपछि नाजी अपराधका लागि मुद्दा चलाइएकी फर्चनर पहिलो महिला हुन् ।
उनीविरुद्ध दुई वर्ष लामो कारावास सजाय सुनाइएको हो । न्यायाधीशले एक सरकारी कर्मचारी भएपनि उनलाई यातना शिविरमा के भइरहेको थियो भन्ने पूर्ण जानकारी रहेको बताएका छन् । स्टथोफमा यहुदी बन्दी, गैरयहुदी पोलहरू तथा समातिएका सोभियत सेनालगायत करिब ६५ हजार जनाको ज्यान लिइएको थियो ।
घटनाका बेला १८ वा १९ वर्षकी मात्र भएकीले फर्चनरलाई विशेष बाल अदालतमा मुद्दा चलाइएको हो । अहिलेको पोल्यान्ड शहर नजिके पर्ने डान्स्कमा कैदीहरूलाई विभिन्न तरिकाले हत्या गरिएको थियो । सन् १९४४ को जुन यता हजारौँ व्यक्तिलाई त्यहाँका ग्यास च्याम्बरमा राखेर मारिएको थियो ।
उत्तरी जर्मनीको इत्जेहोएस्थित अदालतमा उक्त शिविरमा रहेर पनि बाँच्न सफल व्यक्तिहरूबाट सुनुवाइ भएको थियो । मुद्दा चल्ने क्रममा उनीहरूमध्ये केहीको मृत्यु भएको थियो ।
सन् २०२१ को सेप्टेम्बरमा आफूविरुद्ध मुद्दा सुरु भएपछि फर्चनर अवकाश प्राप्तहरू बस्ने घरबाट भागेकी थिइन् । अन्ततः प्रहरीले उनलाई ह्याम्बर्गको एउटा सडकमा फेला पारेको थियो ।
स्टथोपका कमान्डर पाउल–वेर्नर होप्पेलाई सन् १९५५ मा हत्या कार्यमा सहयोग गरेको आरोपमा पक्रेर काराबास चलान गरिएको थियो । तर उनलाई पाँच वर्षपछि नै कारागार मुक्त गरिएको थियो ।

स्रोत : बीबीसी ।