काठमाडौं– कविशिरोमणि लेखनाथ पौड्यालको १३९ औँ जयन्ती विविध कार्यक्रमका साथ मनाइएको छ । सो जयन्तीका उपलक्ष्यमा सञ्चारग्रामस्थित लेखनाथ पौड्यालको पूर्णकदको सालीक हातामा उक्त कार्यक्रम पुस १५ गते गरिएको हो ।
सो अवसरमा त्रिमूर्ति निकेतनका अध्यक्ष इन्दिरा प्रसाईले आज माल्यार्पण गर्नुभयो । सोही अवसरमा उहाँले नाट्यसम्राट् बालकृष्ण सम र महाकवि लक्ष्मीप्रसाद देवकोटाका पूर्णकदको सालीकमा पनि माल्यार्पण गर्नुभयो ।
त्रिमूर्ति निकेतनद्वारा आयोजित सो कार्यक्रममा निकेतनका अध्यक्ष इन्दिरा प्रसाई, लेखनाथ पौड्याल काव्यसभाका संयोजक प्रा. केशव सुवेदी आदिले त्रिमूर्ति अर्थात् कविशिरोमणि, नाट्यसम्राट् र महाकविले देखाएको बाटोमा हिँड्नु नै त्रिमूर्तिप्रतिको सच्चा श्रद्धाञ्जली हुने बताउनुभएको थियो ।
कार्यक्रममा गीता निरौला भण्डारी, यादव भट्टराई, ललिता दोषी, भगवती बस्नेत लगायतले आ–आफ्ना कविता वाचन गर्नुभएको थियो ।
उक्त अवसरमा त्रिमूर्ति निकेतनका सदस्यसचिव नरेन्द्रराज प्रसाईले लेखनाथ पौडयालको सङ्क्षिप्त परिचय पस्किनु भएको थियो । उहाँले लेखनाथ पौडयालको जन्म १९४१ साल पुस १५ गते कास्कीको अर्घौअर्चलेमा भएको थियो । २००८ साल असार २९ गते पौड्याललाई राजा त्रिभुवनद्वारा कविशिरोमणिको पद्वी र मासिक दुई सय रुपियाँ आजीवन भत्ता प्रदान गरिएको जानकारी दिनु भयो ।
लेखनाथ पौडयाल, बालकृष्ण सम र लक्ष्मीप्रसाद देवकोटा २००९ सालमा दार्जीलिङ जाँदा त्यहाँका त्रिरत्न सूधपा अर्थात् सूर्यविक्रम ज्ञावाली, धरणीधर शर्मा र पारसमणि प्रधानद्वारा पौड्याल, सम र देवकोटालाई त्रिमूर्तिको पद्वीले सम्मान गरिएको प्रसाइले बताउनु भयो ।
२०११ सालमा पौडयालकै शुभजन्मोत्सवको उपलक्ष्यमा काठमाडौँमा पौड्यालको रथयात्रा गरिएको थियो । गोपाल पाण्डे असीमको अग्रसरतामा देवकोटा र सम समेत भएर पौडयाललाई रथारोहण गराइएको समेत प्रसाईले स्मरण गर्नु भयो । उहाँले पौडयालका डेढ दर्जन जति कृति प्रकाशनमा आए । ती कृतिहरू नेपाली आधुनिक भाषासाहित्यका अनुपम नमुना मानिन्छन् । साहित्यप्रतिको कदरस्वरूप पौड्याललाई मरणोपरान्त २०२६ सालमा त्रिभुवन प्रज्ञापुरस्कार प्रदान गरिएको जानकारी दिनु भएको थियो ।
२०२२ सालको शिवरात्री अर्थात् फागुन ७ गते कविशिरोमणि लेखनाथ पौड्यालको देहावसान भएको थियो ।
प्रकाशित मिति २०७९ पुष १६, शनिबार ०९:०९ गते
