बेसीशहर । सशस्त्र प्रहरीका एक जवान मर्स्याङ्दी नदीमा खसेर बेपत्ता भएका छन् । वेपत्ता हुने शसस्त्रका प्रहरी जबान ३२ बर्षीय अनन्त महत भएको लमजुङ स्थित सशस्त्र प्रहरी कार्यालयले जनाएको छ । उनको पुस १६ गते दिनभर खोजी कार्य गर्दा पनि फेला नपरेको हुँदा भोलि पनि खोजी कार्य जारी रहने शसस्त्रको भनाई छ ।
उनी २२ नम्बर गण महेश्वरी भक्तपुरबाट सरुवा भई ३२ नम्बर गुल्म हेडक्वाटर मनाङ हाजिर हुन हिंडेका थिए । बेसीशहरबाट शुक्रबार बिहान करिब १० बजेको समयमा मनाङतर्फ जान हिडेका उनी लमजुङको उत्तरी क्षेत्रमा रहेको मर्स्याङ्दी गाउँपालिकाको– ४ स्थित काभ्रे भिरमा पिसाब फेर्न जाने क्रममा मर्स्याङ्दी नदीमा खसेको सशस्त्र प्रहरी बल आश्रित गुल्म लमजुङका डीएसपी मानबहादुर शाहीले बताउनु भयो । उहाँका अनुसार वेपत्ता जवानको खोजीका लागि बेसीशहरबाट सशस्त्र प्रहरी र नेपाल प्रहरीको टोली घट्ना स्थल पुगेर खोजतलास भइरहेको छ । उहाँले भन्नुभयो, ‘हिजो र आज दिनभर गरिएको प्रसास सफल भएन ।’ उहाँले थप भन्नुभयो, ‘आज शनिबार पनि त्यो क्षेत्रमा दिनभर खोजी कार्य जारी रह्यो, तर फेला परेन । आज रात पर्यो, भोलि पनि खोजी कार्य जारी रहन्छ ।’
वेपत्ता भएका प्रहरी जबान महत रामेछापको लिखु तामाकोसी गाउँपालिका– ४, बिजुलीकोटका बासिन्दा हुन् ।
उनी भक्तपुरबाट मनाङ सरुवा भई हाजिर हुन हिंडेका थिए । वेसीशहरबाट मनाङतर्फ जाँदै गरेको ग १ ज ७३३५ नम्बरको जीपमा सवार रहेको शसस्त्र प्रहरीको यहाँ स्थित कार्यालयले जनाएको छ ।
प्रकाशित मिति २०७९ पुष १६, शनिबार १९:१३ गते
