काठमाडौं– म्यानमारको ७५औं स्वतन्त्रता दिवसको अवसरमा सरकारपक्षीय दैनिक पत्रिका ‘म्यान्मा अलिनो’मा नेपालका राष्ट्रपति विद्यादेवी भण्डारीका नाममा प्रेशित नै नभएको शुभकामना सन्देश प्रकाशित भएको छ । सैनिक शासन चलिरहेको म्यानमारको सरकारी पत्रिकामा राष्ट्रपति भण्डारीको नाममा शुभकामना सन्देश पुस २१ गते प्रकाशित भएको हो ।
म्यानमारमा यतिबेला सैनिक शासन चलिरहेको छ । प्रजातन्त्रवादी नेतृ सुकीलाई नजरबन्दमा राखेर शासन चलाइरहेको सैनिक सरकारको कदमलाई अहिलेसम्म समर्थन गर्ने मुलुकहरू नगन्य मात्र छन् ।
‘म्यान्मा अलिनो’ पत्रिकामा नेपालका राष्ट्रपति भण्डारीसँगै प्रधानमन्त्री पुष्पकमल दाहाल प्रचण्डको समेत नाममा शुभकामना सन्देश प्रकाशित गरिएको छ । ‘म्यान्मा अलिनो’ दैनिक पत्रिका म्यानमारको सेनाको मुखपत्र हो । सो पत्रिका म्यानमारको सञ्चार मन्त्रालयले प्रकाशित गर्ने गर्दछ । शुभकामना सन्देशमा त्यहाँका सैन्य नेता जनरल मिन आङ हृलाइङको स्वास्थ्य लाभको कामनासमेत गरिएको उल्लेख छ ।
प्रकाशित शुभकामना सन्देशमा भनिएको छ– ‘म्यान्मारको ७५औं हीरक स्वतन्त्रता दिवशको उपलक्ष्यमा प्रिय मित्र (जनरल मिन आङ हृलाइङ), शहीद र म्यान्मारको सम्पूर्ण जनतालाई स्वतन्त्रता दिवशको हार्दिक शुभकामना व्यक्त गर्दछौं । प्रिय मित्रलाई सुस्वास्थ्यको कामनासहित म्यान्मारका सम्पूर्ण जनताको उत्तरोतर प्रगतिको शुभकामना व्यक्त गर्दछौं ।’ उक्त पत्रिकामा नेपालसँगै रसिया र कम्बोडियाको सरकारको पनि शुभकामना सन्देश प्रकाशित गरिएको छ ।
त्यहाँका अन्य सबै निजी प्रेस(पत्रिका)माथि सैनिक सरकारले प्रतिबन्ध लगाएको छ । यसरी प्रकाशित भएको शुभकामना सन्देशमा जनरल मिन आङ हृलाइङलाई समेत सम्बोधन गरेपछि नेपाल सरकारले त्यहाँको सैनिक सरकारलाई समर्थन गरेको सन्देश प्रवाह हुन आएको छ ।
राष्ट्रपति कार्यालय शितल निवासले नेपालबाट यस्तो कुनै प्रकारको सन्देश म्यानमार नपठाएको बताएको छ । राष्ट्रपतिका सञ्चार सल्लाहकार टीका ढकालले राष्ट्रपति भण्डारीमार्फत त्यस्तो कुनै पनि सन्देश नपठाएको बताउनु भएको छ । उहाँले भन्नुभयो, ‘राष्ट्रपति कार्यालयले त्यस्तो प्रकारको कुनै पनि सन्देश म्यानमारको सरकारलाई पठाएको छैन ।’ तर यो समाचार तयार गर्दासम्म राष्ट्रपति तथा प्रधानमन्त्री कार्यालयले आधिकारिक प्रतिक्रिया दिएको छैन ।
म्यानमारकी नोबेल पुरस्कार विजेता प्रजातन्त्रवादी नेतृ ७७ वर्षीया आङसाङ सुकीलाई त्यहाँको सैनिक सरकारले २०२१ फेब्रुअरीदेखि नजरबन्दमा राखेको छ । त्यसको विश्वभरबाट विरोध भइरहेको छ । राजधानी नेपिडोस्थित घरमा सुकीले आफ्नो जीवनको लामो समय नजरबन्दमा बिताएकी छन् ।
गत साता मात्रै म्यानमारको सैन्य अदालतले उनलाई थप ७ वर्ष जेल सजाय सुनाएको छ । यससँगै उनको कूल जेल सजाय ३३ वर्ष पुगेको छ । सैन्य अदालतले उनको सरकारका एक मन्त्रीले हेलिकोप्टर भाडामा लिँदा नियम पालना नगरेको भन्दै उनलाई भ्रष्टाचारमा दोषी ठहर गरेको जनाइएको छ । सुकीलाई यसअघि नै कोभिडको नियम पालना नगरेको लगायतका १४ आरोपमा दोषी ठहर गरेर सजाय सुनाइएको छ । उनीमाथि सैनिक सरकारले लगाएका १९ वटा आरोपमाथि १८ महिना लामो अनुसन्धान र सुनुवाइ चलाएको दावी गरिएको छ ।
संयुक्त राष्ट्रसंघले गत साता मात्र सुकीलाई रिहा गर्न आग्रह गरेको छ ।
प्रकाशित मिति २०७९ पुष २२, शुक्रबार ०८:३४ गते
