सहकारीका सञ्चालकहरूले बचतकर्ताको तीन हजार रूपैयाँ पनि फिर्ता दिन नसकेपछि ‘फरार’

काठमाडौं– नेपालका बचत तथा ऋण सहकारी संस्था एक पछि अर्को गर्दै डुब्दै गएका छन् । त्यस्तो लाइनमा यहाँको अर्को एक सहकारी संस्था पनि माघ १५ गते थपिएको छ ।
काठमाडौंमा सञ्चालनमा रहेको सन्ध्या बचत तथा ऋण सहकारी(साकोस) ले आफ्ना बचतकर्ताहरूलाई तीन हजार रूपैयाँ पनि फिर्ता गर्न नसक्ने स्थिति उत्पन्न भएपछि त्यसका सञ्चालकहरू ‘फरार’ भएका छन् ।
त्यस साकोसको मुख्य कार्यालय नयाँबानेश्वर रहेको छ । सन्ध्या बचत तथा ऋण सहकारीले पुस २१ गतेबाट बचतकर्तालाई एकपटकमा तीन हजार रूपैयाँसम्म मात्र दिन सकिने भनेको थियो । त्यस्तो सूचना जारी भएपछि दैनिक १५ जनाभन्दा बढी बचतकर्ता आउन थालेपछि व्यवस्थापन गर्न समस्या भएको संस्थाले बताउँदै आएको थियो । त्यो संस्थाको मुख्य कार्यालय आज एकाएक बन्द गरिएको छ ।
उक्त साकोसमा बचत फिर्ता माग्न गएका पीडितहरू सञ्चालक फरार भएको भन्दै सहकारी विभागमा उजुरी गर्न पुगेका छन् ।
त्यस संस्थाको मु्ख्य सञ्चालक मनबहादुर राई रहेका छन् । राईले केही दिनअघिसम्म संस्थाको कुल बचत ५ करोड र कर्जा लगानी ४ करोड ५० लाख रूपैयाँ रहेकाले बचत फिर्ता गर्न सकिने बताएका थिए । तर उनको दाबीविपरीत संस्था अहिले आफैंले तोकेको रकमसमेत दिन असमर्थ भएको छ ।
यतिबेला उनको फोन उठ्दैन । फेकबुक पेजसमेत निष्क्रिय राखेको संस्थाकी एक बचत संकलककर्ताले बताइन् । उनका अनुसार ‘राईले आफ्नो घरसमेत बिक्री गरेको बुझिएको छ ।’
हामीले केही दिनअघि संस्थाका सञ्चालक राईसँग कुरा गर्दा उनले आफू चन्द्रागिरिमा ११ लाख रूपैयाँ ऋण उठाउन आएको र तत्कालै बचतकर्ताहरूको रकम फिर्ता गर्ने बताएका थिए । उनी त्यसयता बचतकर्ताहरूको सम्पर्कमा भने थिएनन् ।
राई संस्थाको मुख्य लगानीकर्ता हुन् । सो संस्थाको हाल अध्यक्ष प्रदीप बराल हुन् भने पूर्वअध्यक्षमा पद्मा लिम्बू हुन् ।
सो संस्थाका बौद्ध नयाँबस्ती निवासी बचतकर्ता रणकिशोर डाँगीले बचत फिर्ता लिन जाँदा रित्तै फर्किनुपरेको बताउनु भयो । उनले भने, ‘मेरो जम्मा ३२ सय रूपैयाँ बचत थियो, त्यही लिन जाँदा पनि पाइनँ ।’
टेकुका राजेश कुमारको त १४ लाख रूपैयाँ बचत छ । उहाँले असोजदेखि रकम माग्न आउँदा पनि एक रूपैयाँ फिर्ता पाउन नसकेको बताउनु भयो । उहाँले भन्नुभयो, ‘मेरो छोरा अस्पतालमा रहेकाले म दुई महिनादेखि पैसा लिन मुख्य कार्यालय धाइरहेको छ्ु, जति सक्छ उति रकम देऊभन्दा पनि दिएका थिएनन् अहिले त मान्छे नै गायव भए ।’
त्यस्तै, अर्का बचतकर्ता गृष्मा गिरीले आफ्नो ९६ हजार बचत रहेको र पुस ८ गते बचतको अवधि परिपक्व भएको फिर्ता लिन जाँदा नपाएको बताउनु भयो । गिरीले भन्नुभयो, ‘उहाँहरू सम्पर्कमा नआउने तर ब्याक डेटको चेक काटेर पठाउने गरिरहनुभएको थियो, उहाँहरू बजारबाट बचत संकलनसमेत गरिरहनुभएको थियो, तर हामीले कुर्दा पनि उहाँहरू सम्पर्कमै आउनु भएको छैन ।’