प्रभात शान्तिपूर्ण माविको हीरक जयन्तीको अन्तरमावि नृत्य प्रतियोगितामा हिमचुली आमावि पहिलो

बडागाउँ(लमजुङ)– यहाँ स्थित प्रभात शान्ति पूर्ण माविको हीरक जयन्तीका अवसरमा आयोजना गरेको माविस्तरीय प्रतियोगितामा हिमचुली आमावि पहिलो भएको छ । मर्स्याङदी गाउँपालिका– ८ को वडागाउँ स्थिति साही माविको हातामा उक्त प्रतियोगितामा सञ्चालन गरिएको थियो ।
प्रतियोगितामा कुल नौ माविका प्रतियोगी टिमले भाग लिएका थिए । उक्त अवसरमा अन्य प्रतिस्पर्धीहरूलाई पछि पार्दै मर्स्याङदी गाउँपालिका– ३ को खुदी स्थित हिमचुली आमावि पहिलो भएको हो । यसैगरी, सोही स्थानको अमर माविको टिम दोस्रो भयो भने मर्स्याङदी गाउँपालिका– ९ को गणेश मावि सिम्पानी तेस्रो भएको आयोजकको भनाई छ ।
उक्त प्रतियोगितामा आयोजक प्रभात शान्तिपूर्ण माविको टिम र पञ्च विचार प्राविको टिमले सान्त्वना स्थान हासिल गरेको आयोजक माविका प्रधानाध्यापक कृष्णप्रसाद घिमिरेले बताउनु भयो । उहाँका अनुसार उक्त प्रतियोगितामा विजयी हुने टिमलाई पुरस्कार स्वरुप पहिलोलाई आठ हाजर रुपैयाँ, दोस्रोलाई छ हजार रुपैयाँ, तेस्रोलाई चार हजार रुपैयाँ र सान्त्वना स्थान हासिल गर्ने विद्यालयहरूलाई प्रति विद्यालय २/२ हजार रुपैयाँका दरले पुरस्कार र प्रमाणपत्र वितरण गरिएको थियो ।
उक्त अवसरमा स्थानीयस्तरका आमा समूहको टिमको पनि नाच प्रस्तुत गरिएको थियो । त्यसरी नाच प्रस्तुत गर्ने आमा समूहको संख्या पनि नौ नै रहेको समेत उक्त माविका प्रअ घिमिरेले जानकारी दिनुभयो । उहाँका अनुसार सो कार्यक्रमका प्रमुख अतिथि डा. दिलबहादुर गुरुङले विजयी कालाकारहरूलाई पुरस्कार र प्रमाणपत्र वितरण गर्नु भएको थियो ।
विद्यालय व्यवस्थापन समितिका अध्यक्ष पूर्ण घलेको अध्यक्षतामा भएको उक्त कार्यक्रमको सञ्चालन प्रअ घिमिरेले गर्नु भएको थियो । उहाँका अनुसार प्रतियोगितामा भाग लिन आउने टिमलाई बाटो खर्च वापत एक हजार पाँचका दरले सहभागी टिमलाई प्रदान गरिएको थियो ।