पञ्जाब(भारत)– अन्ततः खलिस्तान समर्थक अमृतपाल सिंह भारतमा पक्राउ परेका छन् । उनी पक्राउ परेको पञ्जाबका प्रहरी अधिकृतहरूले बैशाख १० गते पुष्टि गरेका छन् । उनीमाथि ज्यान मार्ने उद्योग, कानुन कार्यान्वयनमा अवरोध पुर्याएको र अशान्ति मच्चाएको आरोप छ ।
पञ्जाब प्रहरीले अमृतपाल सिंह पञ्जाबकै मोगा भन्ने स्थानबाट पक्राउ परेको जनाएको हो ।
शिख समुदायका लागि स्वायत्त राज्यको माग गर्दै उनले ‘वारिस पञ्जाब दे’ संगठनको नामबाट गतिविधि गर्दै आएका छन् ।
त्यो संगठनका प्रमुख रहेका अमृतपाल सिंह नेपालमा लुकेर बसेको नेपालस्थित भारतीय दूतावासले दावी गर्दै आएको थियो । तर नेपाल प्रहरीले त्यसको खण्डन गरेको थियो । अमृतपाल सिंहको बारेमा प्रतिनिधि सभामा पनि चर्चा चलेको थियो ।
यसैसन्दर्भमा काठमाडौंस्थित भारतीय दूतावासले सिंह नेपाल आउन सक्ने भन्दै अध्यागमन विभागलाई पत्र लेखेको थियो । अध्यागमन विभागले पनि सिंहलाई निगरानी सूचीमा राखेको थियो ।
सिंह भारतीय प्रहरीको फरार सूचीमा थिए ।
लामो समय दुबईमा बसेपछि उनी गत वर्षको अगष्ट महिनामा पञ्जाब फर्किएको बताइन्छ । त्यसपछि उनले अमृत सञ्चार नशा मुक्ति आन्दोलनको नामबाट युवाहरूलाई संगठित गर्न सुरु गरेका थिए । पञ्जाबबाट उनका थुप्रै समर्थकहरूलाई प्रहरीले गिरफ्तार गरेको थियो । अमृतपाल भने लुकेर बस्दै आएका थिए ।
लामो समय दुबईमा बसेपछि उनी गत वर्षको अगष्ट महिनामा पञ्जाब फर्किएका थिए । त्यसपछि उनले अमृत सञ्चार नशा मुक्ति आन्दोलनको नामबाट युवाहरूलाई संगठित गर्न सुरु गरेका थिए । पञ्जाबबाट उनका थुप्रै समर्थकहरूलाई प्रहरीले गिरफ्तार गरेको थियो । अमृतपाल भने लुकेर बस्दै आएका थिए ।
को हुन् अमृतपाल सिंह ?
सन् २०२० भन्दाअघि सिंह कुनै चर्चामा थिएनन् । त्यतिबेला भएको किसान आन्दोलनका क्रममा अभियन्ता बनेका सन्दीप सिंहको सामाजिक सञ्जालमा समर्थन गरेपछि उनलाई केही मानिसले चिन्न थालेका थिए ।
सन् २०२२ को मार्चमा उनी अचानक वारिस पञ्जाब दे अर्थात् पञ्जाबका सन्तति समूहका नेता बनेपछि उनको चर्चा चुलिएको हो । दीप सिधुले सन् २०२१ मा बनाएको उक्त समूहलाई पञ्जाबको अधिकारका लागि केन्द्रविरूद्ध लड्ने र पञ्जाबको संस्कृति, भाषा र सामाजिक सद्भावविरूद्ध भइरहेको आक्रमणको प्रतिरोध गर्ने भनिएको थियो ।
सन् २०२२ को विधान सभा चुनावका बेला वारिस पञ्जाब दे खलिस्तानतर्फ ढल्किएको थियो ।
२९ वर्षीय अमृतपाल सिंह वारिस पञ्जाब देको नेता चुनिएपछि २०२२ सेप्टेम्बरमा दुबईबाट पञ्जाब फर्किएका थिए । दुबईमा उनको परिवारको ट्रान्सपोर्टको व्यापार छ ।
पञ्जाब फर्किएपछि सार्वजनिक र गोप्य रूपमा गरेका विभिन्न कार्यक्रमबाट उनको चर्चा चुलिँदै गयो ।
उनले सार्वजनिक रूपमै पनि हिंसाका पक्षमा वकालत गरेका थिए । पछिल्लो समय उनले शिखहरूको छुट्टै राज्य खलिस्तानको भावना दबाउन नसकिने बताउँदै आएका थिए । सुरूमा भारतको पञ्जाबभित्र खलिस्तान बनाउने र पछि पाकिस्तानको पञ्जाबबाट पनि खलिस्तान भूमि गाभ्ने योजना उनले एक अन्तर्वार्ताका क्रममा सुनाएका थिए ।
एउटा युट्युब भिडिओमा उनले भारतले पञ्जाबमा उपनिवेश लादेको बताएका थिए । चर्चा चुलिँदै गएपछि अमृतपाल हतियारधारी समर्थकहरूको स्कर्टिङमा हिँड्न थालेका थिए ।
अमृतपालका एक जना निकट पक्राउ परेपछि उनका समर्थकले गत फेब्रुअरी २३ एउटा स्थानीय प्रहरी चौकी घेरेका थिए । उनीहरूसँग भएको झडपका क्रममा केही प्रहरीहरू घाइते भएका थिए ।
त्यसपछि प्रहरीले उनी र उनका समर्थकमाथि कारबाही तीव्र पार्दै आएको हो ।
गत साता पञ्जाबको जलन्धर जिल्लामा प्रहरीले उनलाई पक्रन अपरेशन चलाएका बेला उनी मोटरसाइकलमा भागेको बताइएको छ ।
उनका बुवा तरसेम सिंहले छोरा अमृतपाल पक्राउ परेपछि उनको ज्यानको खतरा रहेको बताएको भारतीय सञ्चार माध्यमहरूले उल्लेख गरेका छन् ।
प्रकाशित मिति २०८० बैशाख १०, आईतवार ०९:३८ गते
