अचमको आत्मकथा (कविता)

यो हो आत्मकथा महत्तम सफा आश्चर्य गाथा नव
लेखेका मणिले खुला हरफमा माधूर्य हो वास्तव
बग्छिन् सल्सल शुक्ल छाल सरिता जो गण्डकी पावन
जन्मेका मणि चन्द्र छन्, अचम हून् संक्षेप बुझ्दा घन ।
१.
लेखेका जति काव्य छन् अचम ले माधूर्य माला बुनी
ल्याए अक्षर शब्द वाक्य रसिला आश्चर्य चाला चुनी
ज्ञाता वेद र शास्त्र फेद गहिरा ज्ञानी पिताजी थिया
पाए अक्कल बुद्धि ज्ञान दरिला लाग्दै नलाग्ने खिया ।
२.
आस्था आर्जित कामना सरलता आलोक ऊर्जासित
मोहीको हक काव्य फाँट कविजी छन् लालपूर्जासित
आभा झल्झल झल्किने मणिकथा साहित्यमा उर्वर
निष्ठा नैतिक चेतना गजबको बास्ना छरे हर्हर ।
३.
केले उत्तम सोच खुल्छ कविमा उत्साहमा झल्मल
पाइन्नन् दुविधा कुनै किसिमले संकोच वा अल्मल
खुल्छिन् वस्त्र सफेद साथ जननी आशीषमा शारदा
सौम्या छन् मनकामना प्रकटमा चातुर्यमा कामदा ।
४.
बास्ना मग्मग फैलिए अचमका सौन्दर्य गाथा कथा
ज्योत्स्ना जग्मग पैलिए किरणका उल्लासमा सर्वथा
बस्दैछन् मधुमासमा कचहरी संस्कारका चेतले
आकाङ्क्षा अभिप्रायमा सरलता थप्छन् रमी वेदले ।
५.
भर्ने उत्तम काव्य सुत्र ममता उत्कर्ष मर्यादित
थप्छन् प्रेरक प्रेरणा सुगम छन् यो काव्यमा चर्चित
जप्दै केशवको महत्व कविले पार्दै गए पोषक
निष्ठा मापनको समग्र सुविधा पाए भरे रोचक ।
६.
लेख्दा लाग्छ कमाल चित्र कविता आत्मस्थ बन्छन् कवि
आएका अवतारमा अचम हुन् साक्षात् सफा भारवि
देखिन्छन् नव प्रातका किरणमा खुल्दा कथा भाष्कर
गर्छन् काम लगाम लाग्छ सजिलै देखिन्छ जो दुष्कर ।
७.
आस्थामा अभिमान छैन, रसिला छन् काममा तत्पर
छैनन् लोभ र लालचीपन कुनै, छन् सौम्य यी मत्थर
मान्छन् पाठक पाठिका हृदयले खाट्टी कला साधक
फाल्दिन्छन् कटुता सबै किसिमका पाए भने बाधक ।
८.
छन् लोकान्तर यानमा समयको बेतोड यात्रारत
पालेका मन कामना असल छन् निर्द्वन्द यात्रा भर
साथी बन्न रुचाउँछन् हजुरको आजन्म सत्कारमा
आस्थाको अधिकारमा सुगम छन् सौजन्य संसारमा ।
९.
बुझ्छन् प्राज्ञ छ आँतमा अचम को सौन्दर्य श्रृङ्गारमा
चढ्दैनन् कवि बोटमा कुफतको, मिथ्या अहङ्कारमा
सुम्पन्छन् जति छन् विचार सुकिला यो काव्य सन्देशमा
आँखामा मणि चम्किने अचम हो व्यक्तित्व नेपालमा ।
१०.
शार्दूलविक्रीडित छन्द ।  तनहुँ, नेपाल ।