राजविराज– हत्या तथा डाँका अभियोगमा पक्राउ परेका मधेस प्रदेश सांसद अनिरुद्धकुमारसिंह यादव पुर्पक्षका लागि कारागार चलान भएका छन् । जिल्ला अदालत सप्तरीले सांसद यादवलाई मुलुकी फौजदारी कार्यविधि संहिता, २०७४ बमोजिम मुद्दा पुर्पक्षको लागि थुनामा राख्न भदौ १९ गते पठाएको हो ।
सप्तरी निर्वाचन क्षेत्रनं. ४ (ख) बाट निर्वाचित सांसद यादवलाई २०६४ सालमा भएको घटनामा यादवलाई अघिल्लो दिन प्रहरीले राजविराज नगरपालिका– ७ बाट पक्राउ गरेको थियो । कर्तव्य ज्यान मुद्दामा जिल्ला न्यायाधीश राजेन्द्रकुमार आचार्यको इजलासले उनलाई पूर्पक्षका लागि थुनामा राख्न आदेश दिएको हो । अदालतको आदेश बमोजिम सांसद यादवलाई सप्तरी कारागार कार्यालय राजविराजमा पठाईएको जिल्ला प्रहरी कार्यालय सप्तरीका प्रवक्ता प्रहरी नायव उपरीक्षक नरेशकुमार सिंहले बताउनु भयो ।
खोक्सर प्रवाहा गाविस– १ का ३२ वर्षीय दिपु भन्ने गोविन्द चौधरीको हत्या आरोपमा उनी फरार सूचीमा थिए ।
तत्कालीन बोदे बर्साइन गाविस– ४ बाट २०६४ असार ९ गते अपहरण गरी सोही दिन नेङ्गडा गाविस– ५ वैरिया टोलमा पु¥याई पाँचवटा गोली हानी चौधरीको हत्या गरिएको थियो । उक्त विषयमा जाहेरी परेपछि अदालतमा बयान दिन समेत नगई यादव फरार भएका थिए । मृतकका दिदी धनगढी गाविस– ३ की रीताकुमारी चौधरीले जिल्ला प्रहरी कार्यालय सप्तरीमा २०६४ असार १४ गते सिंह समेत नौ जनाविरुद्ध किटानी जाहेरी दिनु भएको थियो ।
प्रकाशित मिति २०८० भाद्र २०, बुधबार ०५:१९ गते
