काठमाडौं– यतिबेला नेकपा एमाले प्रदेश अधिवेशनको अभियानमा छ । सो क्रममा कर्णाली प्रदेशको अध्यक्षमा गुलाबजंग शाह निर्वाचित हुनु भएको छ । यसैगरी, कोशीको अध्यक्षमा घनश्याम खतिवडा निर्वाचित हुनुभएको छ । कर्णालीको नतिजा असोज १५ गते साँझ र कोशीको राती अबेर घोषणा गरिएको हो ।
नेतृत्वको चाहना विपरित जबरजस्त निर्वाचन भइरहेको छ भने प्यानल समेत बनेको बताइएको छ । सो दलका अध्यक्ष केपि ओलीले आफ्नो पक्षमा सहमति जुटाउनका लागि गर्नु भएको पहल कुनै पनि प्रदेशमा काम लागेन । त्यसो त उहाँले आफ्ना अनुकुलका नेताका लागिमात्र सहमतिको प्रयास गर्ने÷गराउने प्रयत्न गर्नु भएका कारणले समेत निर्वाचनको स्थिति सुनिश्चित हुन गएको स्रोतले बताएको छ ।
कर्णाली प्रदेशमा शाह ३ सय ६९ मत ल्याएर अध्यक्षमा विजयी हुनु भएको हो ।
उहाँका निकटतम प्रतिद्वन्द्वी मीनबहादुर शाहीले २ सय ७ मत पाउनु भएको छ । मतगणना परिणाममा उल्लेख छ ।
त्यस्तै, सो निर्वाचनका अर्का प्रत्यासी प्रकाश रोकायले ४ मत पाउनु भएको छ ।
मतपरिणाम अनुसार शाहको प्यानल नै विजयी भएको छ । उहाँ केन्द्रीय अध्यक्ष ओलीको इशारा विरुद्ध उम्मेवार बन्नु भएको बताइन्छ । उहाँलाई स्थायी कमिटी सदस्य यामलाल कँडेलको समर्थन थियो । शाह महासचिव शंकर पोखरेलका विश्वास पात्र मानिनु हुन्छ । पोखरेलले नै कुनै बेला सल्यानका प्रकाश ज्वालालाई कमजोर पार्न शाहलाई नै अग्रसर गराउनु भएको थियो ।
कर्णालीमा यामलाल कँडेल बलियो नेता मानिनु हुन्छ । त्यति हुँदाहुँदै केपी ओलीले कँडेललाई प्रायः असहयोग गर्दै आएकोे बताइन्छ । कँडेलले केपी ओलीकै चाहना विपरीत कर्णालीमा शाहलाई जिताएर आफ्नो वर्चश्व कायमै रहेको पार्टी केन्द्रलाई जवाफ दिन सफल हुनु भएको रुपमा हेरिएको छ ।
नवनिर्वाचित अध्यक्ष शाहले पार्टीभित्र भएको लोकतान्त्रिक विधिमा विजय र पराजयलाई सामान्य रुपमा लिनुपर्ने बताउनु भएको छ । उहाँले भन्नुभयो, ‘कुनै समूह र गुट थिए, हुने पनि छैन ।’
हक्की र निर्णय लिन सक्ने नेताका छवि बनाउन सफल हुनुहुन्छ– गुलाबजङ्ग शाह । सल्यानको बनगाड कुपिण्डे नगरपालिकामा वि.सं.२०२२ सालमा जन्मिनु भएका शाहको राजनीतिक यात्रा आफैमा संघर्षमय छ । शाहले ०४० सालमा अनेरास्ववियु पाँचौमा आवद्ध भएर राजनीतिक यात्रा थालनी गर्नु भएको हो ।
यसैगरी, अध्यक्षमा पराजित शाहीले प्रत्येक प्रतिनिधिलाई आफ्नो नेता छान्ने अधिकार रहेको बताउनु भयो । उहाँले हार जित स्वभाविक हुन्छ, ‘भविष्यमा पार्टी निर्माणमा ल्याउने योजनामा एकैसाथ अगाडि बढ्न सक्छौं । कुनै मतभेद भए आपसी सम्वादबाट हल गर्ने र पार्टीलाई कर्णालीमा पहिलो बनाउने छौं’ भन्नुभयो ।
उपाध्यक्षमा टेकराज पछाई ३४२ मत पाएर विजयी हुनुभएको छ । लालबहादुर महताराले १७६ र दानसिंह परिवारले ५९ मत पाउनु भएको छ । त्यस्तै, सचिवमा ध्रुवबहादुर शाही ४०६ मतका साथ चुनिनु भएको छ भने उहाँका निकटतम प्रतिद्वन्द्वी रूर्दबहादुर शाहीले १६९ मत पाउनु भएको छ ।
कोशी अध्यक्षमा घनश्याम खतिवडा निर्वाचित :
विराटनगरबाट प्राप्त समाचार अनुसार नेकपा एमाले कोशी प्रदेश कमिटी अध्यक्षमा घनश्याम खतिवडा विजयी मात्र विजयी हुनु भएको छैन उहाँले पदाधिकारीहरू समेत सबै आफ्नै प्यानकालाई जिताउन सफल हुनुभएको छ । खतिवडा मोरङ– १ बाट निर्वाचित पूर्व सांसद्समेत हुनुहुन्छ ।
प्रतिस्पर्धी विनोद ढकाललाई ८२ मत अन्तरले पराजित गर्नु भएको हो । सो निर्वाचनमा ३५ मत बदर भएको थियो । खतिवडाले ५१२ मत र विनोद ढकालले ४३० मत प्राप्त गर्नु भएको हो ।
पार्टी अध्यक्ष पदमा खतिवडा र ढकालबीच प्रतिस्पर्धा भएको यो दोस्रोपटक हो । २०६६ मा उनीहरू मोरङ अध्यक्षमा पहिलोपटक आमनेसामने बन्दा विनोद ढकाल विजयी हुनु भएको थियो । जिल्ला अध्यक्षमा प्रतिस्पर्धा गरेको १४ वर्षपछि उहाँहरूबीच प्रदेश अध्यक्षमा ‘रिम्याच’ भएको हो ।
ढकाल जिल्लामा विजेता बन्दा उनलाई हालका पार्टी अध्यक्ष केपी शर्मा ओलीको साथ थियो । यसपटक भने ओली र उहाँको समूहको साथ खतिवडालाई रहेको बताइन्छ । ओली निकटका प्रदेशबाट केन्द्रमा प्रतिनिधित्व गर्ने बहुसंख्यक नेताहरूको साथ पाउनु भएका मोरङ लेटाङका खतिवडाले प्रदेश पार्टीको अब ३ वर्ष नेतृत्व गर्नु हुनेछ ।
सचिव र उपसचिव पदमा पनि खतिवडा प्यानलकै उम्मेदवारहरू निर्वाचित भएका छन् । सचिवमा राजकुमार भण्डारी(पाँचथर) ५२४ मतसहित विजयी हुँदा उहाँका प्रतिस्पर्धी शैलेश लामा(उदयपुर)ले ३८१ मत प्राप्त गर्नु भएको हो ।
उपसचिवमा देवान राई (खोटाङ) ६२८ र जलवर्षा राजवशी (झापा) ६१० विजेता बन्नु भएको छ । उपाध्यक्षमा यसअघि टीकराम चेम्जोङ(धनकुटा) निर्विरोध निर्वाचित भइसक्नु भएको छ ।
प्रकाशित मिति २०८० आश्विन १६, मंगलवार ०६:५६ गते
