उद्योग वाणिज्य संघद्वारा शुभकामना आदानप्रदानका साथमा स्वागत

बेसीशहर– लमजुङ उद्योग वाणिज्य संघद्वारा बडादशैं, तिहार, छठपर्व आदिको पावन अवसरमा शुभकामना आदान प्रदान कार्यक्रमका साथमा जिल्लामा नवागन्तुक तीन जना कार्यालय प्रमुखहरूलाई स्वागत गरिएको छ । गण्डकी प्रदेश सभाका सदस्य एवम् लउवासंघको पूर्वअध्यक्ष भेषबहादुर पौडेलको प्रमुख आतिथ्यतामा आफ्नै कार्यालयको सभाहलमा उक्त कार्यक्रम असोज २६ गते आयोजना गरिएको हो ।
सो अवसरमा प्रमुख अतिथि पौडेलले शुभकामना व्यक्त गर्दै समाजका सबै व्यक्तिहरू जहाँ, जहाँ, जो जो छौं सबैले इमान्दार बनेर जिम्मेवारी, कर्तव्य पुरा गरौं, यो आजको आवश्यकता हो भन्ने आग्रह गर्नु भयो । उहाँले पत्रकारहरूले राखेका चाडवाड लक्षित सहुलियत पसलका बारेमा लमजुङ सुमग जिल्ला भएर नराखिएको हो कि ? भन्नु भयो ।
यसैगरी, प्रमुख जिल्ला अधिकारी रामकृष्ण अधिकारीले सहुलियत पसलका बारेको प्रसङ्ग ढिला उठेको बताउनु भयो । उहाँले यो प्रसङ्ग गत आवको अन्तिम वा चालु आवको सुरुकै महिनामा उठेको भए केही गर्न सकिन्थ्यो कि ! ऐले त समय ढिला भयो भन्ने तर्क गर्नु भयो । तर रहेक वर्ष प्रमुख जिल्ला अधिकारी फेरिने गर्दा जुन कुनै पनि प्रजिअका लागि यो कार्य नयाँ बन्ने गरेको कटु सत्य जिल्लाबासीले भोग्नु परेको छ  ।
उक्त अवसरमा जिल्ला प्रहरी कार्यालयका प्रमुख प्रनाउ मीनबहादुर घले, सशस्त्र प्रहरी बलका प्रमुख प्रनाउ खेमराज शर्मा र करदाता सेवा कार्यलय बेसीशहरका प्रमुख एवम् कर अधिकृत हरिप्रसाद ढकाललाई स्वागत गरिएको थियो ।
सो अवसरमा प्रनाउ घलेले शान्ति सुरक्षालाई चुस्त बनाई राख्न, आत्महत्या न्यूनीकरण लगायतका कार्य गर्नका लागि आफूहरू लागि परेको उल्लेख गर्नु भयो । उहाँले चाडबाड लक्षित सुरक्षा स्थितिलाई सबल बनाउनका लागि प्रहरी सहायता कक्ष जिल्लाका विभिन्न नौ स्थानमा सञ्चालनमा ल्याएको जानकारी दिनुभयो ।
लउवासंघका पूर्वअध्यक्ष राजेश थापाले पत्रकारहरू पार्टीमा आवद्ध हुँदा स्वतन्त्र पत्रकारिता कसरी सम्भव हुन्छ ? भन्ने प्रश्न उठाउँदै पत्रकारहरूले पार्टीको झण्डा बोक्न नहुने बताउनु भएको थियो ।
पत्रकार कमला केसीले बेसीशहरमा सञ्चालन गरिएका केही सहकारीले बचतकर्ताहरूको रकम लामो सयमदेखि फिर्ता दिन नसकेको प्रति जिज्ञासा राख्नु भएको थियो ।
सो अवसरमा लमजुङमा चाडबाड लक्षित सहुलियत पसल सञ्चालन नगरिएको प्रति सम्बद्ध पक्षको पत्रकारहरूबाट ध्यानाकर्षण गरिएको थियो । त्यसको जवाफमा लमजुङ सुगम भएको र सबै जिल्लाबासीका लागि सेवा दिन सम्भव नभएर पसल सञ्चालन नगरिएको भन्ने समेत बताइएको थियो । राजधानी, पोखरा, दमौलीभन्दा लमजुङ सुगम हो ? अनि ती जिल्लाका बसै मानिसले त्यो सेवा पाउन सकेका छन् ? जस्ता प्रश्नहरू भने अनुत्तरित नै रहेका थिए ।
लउवासंघका अध्यक्ष गुणराज सिलवालको अध्यक्षतामा भएको कार्यक्रमको सञ्चालन संघका  सचिव प्रदीप बस्नेतले गर्नु भएको थियो भने समापन प्रथम उपाध्यक्ष मृगेन्द्र घिमिरेले गर्नुभएको थियो । उक्त कार्यक्रममा लउवासंघकका पूर्वअध्यक्ष रामकुमार श्रेष्ठ, पत्रकार महासंघका जिल्ला अध्यक्ष परमेश्वर अधिकारी लगायतका पत्रकारहरूको सहभागिता थियो ।
कार्यक्रममा परिचय सहित आ–आफ्ना धारणा राख्न अनुरोध गरिएको थियो ।