बैतडी– एमालेद्वारा पूर्वउपाध्यक्ष एवम् नेता भीम रावल फेरि किकआउट गरिएको छ । निकै तामझामका साथ ‘झुलाघाट–चिवा भञ्ज्याङ मध्यपहाडी संकल्प यात्रा’ अभियानमा एमालेको सिङ्गो पार्टीपंक्ति जुटेको बेलामा नेता रावलदाई फेरि मंसिर १४ गते पनि किकआउट गरिएको हो ।
एमालेका नेता पूर्वउपाध्यक्ष भीम रावललाई सो अभियानमा पनि बाहिरै पारिएको हो । उहाँ निकट स्रोतले रावललाई ‘इग्नोर’ गरेरै अभियान सञ्चालन गरिएको बताएको छ । ‘पार्टीको कुनै जिल्ला, प्रदेशको कार्यक्रम भएको भए केही थिएन । तर पार्टीको केन्द्रीय कार्यक्रममा पार्टीका सशक्त नेतालाई बाहिर राखेर कार्यक्रम गर्नु भनेको सरासर उहाँलाई इग्नोर गरिएको हो । यसले पार्टीलाई कतिको असर गरेको भन्ने त गत आमनिर्वाचनको परिणामले देखाइसकेको छ । तर अझै पनि नेता रावललाई पार्टीले खेद्ने काम गर्दै आएको छ ।’ रावल निकट एक नेता बताउँछन् ।
एमालेले गत फागुनमा ग्रास रुट अभियान सञ्चालन क्रममा पनि एमालेभित्र ओली र रावलबिच कडा मतभेद देखिएको थियो । त्यतिमात्र हैन केही साता अघि सम्पन्न एमालेको सुदूरपश्चिम प्रदेश अधिवेशन पनि रावललाई बाहिरै राखेर गरिएको थियो ।
संकल्प यात्राको क्रममाअछामको साँफेबगर र मंगलसेनमा एमालेले कार्यक्रम गर्ने सार्वजनिक गरिसकेको छ । रावलको गृह जिल्लामा गरिने कार्यक्रममा उनलाई नै उपेक्षा गरिएको भन्दै नेतृत्वप्रति अछाममा नेता कार्यकर्ताको तीव्र असन्तुष्टि देखिएको छ । मंगलसेनमा जनसभा नै सञ्चालन गर्ने एमालेले जनाएको छ ।
एमाले सुदूरपश्चिम अध्यक्ष कृष्णप्रसाद जैशीले पार्टीको केन्द्रीय तहबाट निम्तो नभए पनि प्रदेश समितिको तर्फबाट आफूले नै निम्तोसहितको खबर रावललाई गरेको बताउनु हुन्छ । जैशीले अगाडि भन्नुभयो, ‘हामी र उहाँ एकै निर्वाचन क्षेत्रको हो । लामो समय सँगै काम गरेका छौँ । उहाँ कार्यक्रममा सहभागी भएको भए राम्रो सन्देश जान्थ्यो । तर उहाँ सहभागी नभए पनि कार्यक्रम त अगाडि बढ्छ नै ।’
रावलले पार्टीको मध्यपहाडी संकल्प यात्राबारे आफूलाई जानकारी गराइएको भन्ने कुरा सत्य नभएको बताउँछन् । रावलले सामाजिक सञ्जाल ‘एक्स’मा लेख्दै आफ्नो सहभागिताबारे अध्यक्ष ओलीले चासो नदिएको र महासचिव शंकर पोखरेलले पनि उपेक्षा गरेको प्रस्ट्याउनु भएको छ ।
रावलले लेख्नु भएको छ, ‘एमालेको मध्यपहाडी पुष्पलाल राजमार्ग अभियानबारे धनगढीमा आयोजित पत्रकार सम्मेलनमा मेरो बारेमा सोधिएको प्रश्नको जवाफमा मलाई निम्तो दिइएको भन्ने सत्य होइन । तथ्य यस्तो छः प्रदेश अध्यक्ष कृष्ण प्र जैशीले फोनमा पत्र पठाउँ कि ? भन्नुभयो । मैले भनेँ– ‘अभियान प्रदेशको भए तपाईंले भन्दा म आइहाल्थेँ । तर केन्द्रको भएकोले तपाईं अध्यक्षलाई फोन गरी मेरो सहभागिताको कुरा गर्नुस्, उहाँले मलाई भन्नुभयो भने म सहभागी हुन्छु । केही समयपछि उहाँले फोनमा भन्नुभयो– फोन गरेँ, अध्यक्षको स्वकीयसँग कुरा हुँदा महासचिवसँग कुरा गर्न भनियो । महासचिवसँग कुरा गर्दा इच्छा हुने जाँदा हुन्छ भन्ने जवाफ आएकोले तपाईं झुलाघाट जानु परेन, अछाम आफ्नै किसिमले गए हुन्छ । अब सबै विवेकशील व्यक्तिले सोचौँ । यही हो त मलाई अभियानमा निम्ता गरिने कायदा ?’
आफ्नै प्रदेशको कार्यक्रममा पनि भीम रावल सहभागी हुन नपाउने अवस्था बारम्बार दोहोरिन थालेको बताउँदै अब के गर्ने भन्नेबारे आन्तरिक छलफल गरिरहेको र विरोधका क्रियाकलाप पनि हुन सक्ने उनी निकट नेता– कार्यकर्ता बताउँछन् ।
एमालेको संकल्प यात्रा १९ दिनमा पाँचथरको चिवा भञ्ज्याङ पुगेर समापन हुने बताइएको छ । सो यात्रा आजदेखि सुरु भएको हो ।
प्रकाशित मिति २०८० मंसिर १४, बिहीबार २०:३९ गते
