घोराही(दाङ)– यहाँका एक पुरुषलाई हनिट्रयाप अर्थात मायाजालमा पारी रकम असुल्न प्रयास गर्ने तीन महिलालाई अदालतले डेढ वर्ष कैद, नगद जरिवाना र क्षतिपूर्तिसहितको फैसला गरेको छ । उनीहरूविरुद्ध अपराधिक लाभ शिर्षकमा मुद्धा चलाइएको थियो ।
त्यस्तो सजाय पाउनेमा स्थानीय घोराही उपमहानगरपालिका– १५ की ३४ वर्षीया सुष्मा परियार, सोही ठाउँकी ३५ वर्षीया सीतादेवी थापा र ४६ वर्षीया खुमा वली रहेका छन् । उनीहरूलाई अदालतले दोषी ठहर गरेको हो ।
अदालतले उनीहरू तीनै जनालाई जनही एक वर्ष छ महिना कैदका साथै १५ हजार जरिवाना र १० हजार क्षतिपुर्ति दिने फैसला गरेको छ । दाङ देउखुरी जिल्ला अदालतका न्यायाधीश जगतबहादुर पौडेलको इजलासले ती तीन जना महिलालाई दोषि ठहर गरी कैद सजायको आदेश भएको जिल्ला अदालतका सूचना अधिकारी दामोदर घिमिरेले बताउनुभयो । उहाँका अनुसार सीतादेवी थापाले ती पुरषसँग लगेको १ लाख समेत फिर्ता गर्नुपर्ने अदालतले फैसला गरेको छ ।
उनीहरूले एक जना पुरुषलाई प्रेमको प्रलोभनमा पारेर ५० लाख रुपैयाँ मागेर नदिएमा बलात्कार गरेको मुद्धा हाल्ने भन्दै धम्की दिने गरेका थिए । पीडित पुरुषले अदालतमा २०७८ असोज १९ गते तीन जना महिलाविरुद्ध उजुरी दिएका थिए ।
फौजदारी अपराध संहिता २०७४ को दफा २५३ को उपदफा १ को खण्ड ख अनुसार यस्तो कसुर गर्नेलाई तीन वर्ष कैद र ३० हजार जरिवाना हुने व्यवस्था रहेको कानुनव्यवसायीहरूले बताएका छन् ।
प्रकाशित मिति २०८० पुष ५, बिहीबार १९:४१ गते
