राइनासकोट(लमजुङ)– लमजुङको एक ग्रामीण पर्यटकीय गाउँमा आयोजित नवौँ ग्रामीण पर्यटन फुटबल कपको उपाधि आयोजक शिव शंकर युवा क्लवले हात पार्न सफल भएको छ । पूर्वीक्षेत्रमा रहेको ग्रामीण पर्यटकीय स्थल राइनासकोटमा शिवरात्रीका अवसरमा सञ्चालित सो प्रतियोगितामा आयोजक क्लब विजयी भएको हो ।
आयोजक शिवशंकर युवा क्लव र तमु एकता युवा क्लव कुडुले, राइनास नगरपाकिला– ९ का विच भएको फाइनल खेलमा निर्धारित खेल समयमा दुवै टिमबाट १/१ गोलको बरावरीमा टुंगियो । त्यसपछि थप भएको समयमा पनि कुनै पक्षबाट पनि गोल हुन सकेन । अन्त्यमा ट्राइब्रेकरमा तमु एकता कुडुलेलाई आयोजक शिव शंकरले २– १ अन्तरले हराउदै नवौँ ग्रामीण पर्यटन कप फुटबल प्रतियोगिताको विजेता बनेको आयोजक क्लबका पूर्वअध्यक्ष प्रकाश गुरुङले बताउनु भयो । उहाँका अनुसार प्रतियोगिताको विजेता शिव शंकर टिमलाई एक लाख ११ हजार एक सय एघार रुपैया, कप, मेडल र प्रमाणपत्र प्रदान गरिएको छ । त्यस्तै, उपविजेता टिमलाई ५५ हजार पाँच सय ५५ रुपैया, कप, मेडल र प्रमाणपत्र पुरस्कार दिइएको छ ।
प्रतियोगिताका विजयी टिम तथा खेलाडीलाई राइनास नगरपालिका प्रमुख खडुगवहादुर गुरुङ र राइनास नगरपालिका– ९ का वडाअध्यक्ष लुविन्द्र गुरुङले संयुक्त रुपमा पुरस्कार वितरण गर्नु भएको थियो । सो फुटबल प्रतियोगितामा २६ टिम सहभागी थिए ।
प्रदेश सभा सदस्य डा. टकराज गुरुङले उदघाटन गरेको सो प्रतियोगिता एक सातासम्म चलेको आयोजकको भनाइ छ ।
शिव शंकर युवा क्लवले महाशिवरात्रीको अवसरमा ग्रामिण पर्यटन कप फुटबल प्रतियोगिता सँगै विभिन्न सास्कृतिक कार्यक्रम आयोजना गरेको थियो ।
सो अवसरमा सञ्चालन गरिएको नृत्य प्रतियोगितामा सुन्दरबजार नगरपालिका– ८ भोटआडारकी अमिसा गुरुङ प्रथम, राइनास नगरपालिका– ९ कुडुले गाउँकी संञ्जिता गुरुङ द्वितीय तथा सोही गाउँकी सलिना थापा मगर तृतीय भएका छन् । प्रतियोगितामा प्रथम र द्वितीयलाई क्रमशः २० हजार र १० हजार नगद सहित कप र प्रमाणपत्र, प्रदान गरिएको थियो । तृतीय हुनेलाई सान्त्वना स्वरुप नगद २ हजार र प्रमाणपत्र दिइएको क्लवका पूर्वअध्यक्ष प्रकाश गुरुङले जानकारी दिनु भयो ।
प्रकाशित मिति २०८० चैत्र २, शुक्रबार २०:१४ गते
