राष्ट्रिय स्वतन्त्र पार्टी नवलपुरको पहिलो जिल्ला भेला देवचुलीमा सम्पन्न

देवचुली(नवलपुर)– राष्ट्रिय स्वतन्त्र पार्टी (रास्वपा) नवलपुरको जिल्ला भव्य रुपमा सम्पन्न भएको छ । यहाँ स्थित साहारा पार्टी प्यालेसमा सञ्चालन गरिएको पहिलो जिल्ला भेलाको उदघाटन सोही दलका केन्द्रीय सदस्य राजन गौतम(चितवन)ले मंसिर २३ गते गर्नु भएको हो ।
आफ्नो उदघाटन मन्तव्यमा उहाँले पार्टी गतिविधिका साथमा पार्टी सभापति रवि लामिछानेप्रति सरकारले गरिरहेको राजीनिक प्रतिशोधपूर्ण हरकतको जतिसुकै निन्दा गरेपनि पुग्दैन भन्दै भर्त्सना गर्नु भएको थियो ।
सो अवसरमा रास्वपाका केन्द्रीय सदस्य सविना विक, सोही दलका गण्डकी प्रदेश सभापति राजन गौतम तथा कावासोति नगरपालिकाका सभापति मोहन बस्नेत, मध्यविन्दू नगरपालिकाका सभापति सुमित्रा नेपाल, विनय त्रिवेणी गाउँपालिकाका सभापति देव परियार लगायतले शुभकामना मन्तव्य का साथमा आआफ्ना धारणा राख्नु भएको थियो ।
सो भेलाले कोषाध्यक्ष र दुई जना सदस्य पछि मनोनित गर्ने गरी नरिश्वर लामिछानेको नेतृत्वमा हाल नौ सदस्यीय जिल्ला समिति चयन गरेको छ । समितिको सभापतिमा नरेश्वर लामिछाने चयन हुनु भएको छ । उहाँ यसअघि जिल्ला संयोजक हुनुहुन्थ्यो । त्यस्तै, समितिको उपसभापतिमा सीताकुमारी अर्याल तथा सचिवमा रामप्रसाद भुर्तेल चयन हुनुभएको छ ।
सहसचिवमा देव परियार चयन हुनु भएको छ भने सदस्यहरूमा रामप्रसाद अधिकारी(हरि), यमकला पाण्डेय, विन्दू काफ्ले, सुभद्रा पराजुली अधिकारी र कृष्ण पंगेनी चयन हुनु भएको नवनिर्वाचित सचिव रामप्रसाद भुर्तेलले बताउनु भएको छ । उहाँका अनुसार निवर्तमान जिल्ला सहसंयोजक शालिग्राम न्यौपाने प्रदेश सदस्यभएको हुँदा जिल्ला सहसंयोजक छाड्नु भएको छ ।
जिल्ला संयोजक नरिश्वर लामिछानेको अध्यक्षतामा भएको उक्त कार्यक्रममा सहसंयोजक शालिग्राम न्यौपानेले स्वागत गर्नु भएको थियो । उक्त जिल्ला भेलाको सञ्चालन देवचुली नगरपालिकाका सचिव दुर्गा पौडेलले गर्नु भएको थियो ।