समृद्धिका लागि सुशासन जरुरी : वरिष्ठ उपाध्यक्ष श्रेष्ठ, नेकपा माओवादी केन्द्र

दोर्दी(लमजुङ)– नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठले भ्रष्टाचारीलाई कार्वाही गरी मुलुकमा सुशासन कायम हुने, विकास हुने र समृद्धि ल्याउछौँ भन्नु दिवा सपना मात्र भएको बताउनु भएको छ । लमजुङको नेकपा माओवादी केन्द्र दोर्दी गाउँपालिका दोस्रो सम्मेलनका अवसरमा नौथर सेरामा आयोजित कार्यक्रमको उदघाटन गर्दै वरिष्ठ उपाध्यक्ष श्रेष्ठले बैशाख ३ गते त्यस्तो बताउनु भएको हो ।
पूर्व उपप्रधानमन्त्री समेत रहनु भएका माओवादी नेता श्रेष्ठले आफ्नो पार्टीले सरकारको नेतृत्व भ्रष्टाचारीलाई कार्वाहीको प्रक्रिया थालनी गरेको बताउनुभयो । उहाँले भन्नुभयो ‘नेपालीलाई भुटानी शरणार्थी बनाएर बेच्ने कार्वाही, ललिता निवास जग्गा हडप्नेलाई कार्वाही गर्न, अरबौँको सरकारी जग्गा फिर्ता लिन तथा मिटर व्याज पीडितलाई न्याय दिन सफल भएका छौं ।’
उहाँले सत्यनिरुपण तथा मेलमिलाप आयोगमार्फत विगतका द्वन्द्वका घाउ निवारण गर्नुपर्नेमा जोड दिनुभयो । राजनीतिक व्यवस्थामा आएको परिवर्तनलाई आधार मानेर बाँकी कार्यभार पूरा गर्ने जिम्मेवारी माओवादी केन्द्रको काँधमा आएको श्रेष्ठले उल्लेख गर्नुभयो ।
उक्त गाउँपालिका सम्मेलनमा नेकपा माओवादी केन्द्रका इन्चार्ज पारसमणि पौडेल, केन्द्रीय सदस्य मधु अधिकारी, क्षितिज लामिछाने, दोर्दी गाउँपालिका पूर्वअध्यक्ष ओमबहादुर गुरुङ, राइनास नगरपालिका उपप्रमुख पुष्पराज खनाल लगायतले शुभकामना व्यक्त गर्नु हुँदै सम्मेलन सफलताको कामना गर्नु भएको थियो ।
माओवादी केन्द्र दोर्दी गाउँपालिकाका अध्यक्ष सागर गुरुङको अध्यक्षतामा भएको कार्यक्रममा दोर्दी गाँउपालिका– ९ का वडा अध्यक्ष आशिष तामाङले स्वागत गर्नुभएको थियो । कार्यक्रम सञ्चालन माओवादी केन्द्र दोर्दी गाउँपालिकाका सचिव यम गुरुङले गर्नुभएको थियो ।