बुद्ध पूर्णिमाका लागि साई संगठनको बालविकास टोली पुट्टपर्ती प्रस्थान

बेसीशहर– बुद्ध पूर्णिमाका अवसरमा श्रीसत्य साई बाबा धाम पुट्टपर्ती, बंलोर, भारतमा आयोजना हुने कार्यक्रममा भागका लागि सत्य साई संगठन बेसीशहर, लमजुङको बालविकास शाखाको टोली त्यसतर्फ प्रस्थान गरेको छ । बुद्ध पूर्णिमामा पुट्टपर्तीमा सञ्चालन हुने तीन दिवसीय कार्यक्रममा भाग लिनका लागि सो टोली त्यसतर्फ बैशाख १९ गते प्रस्थान गरेको हो ।
बुद्ध पूर्णिमाका अवसरमा पुट्टपर्तीमा बाल प्रतीभा प्रस्फुटनप, बाबाको स्पेशल भजन तथा बालविकासका सांस्कृति कार्यक्रमसहितका विभिन्न कार्यक्रमहरू तीन दिनसम्म सञ्चालन हुने आयोजकको भनाइ छ । आयोजकका अनुसार सो अवसरमा मूलतः बालविकास केन्द्रीत कार्यक्रमहरूका साथमा भजन, आध्यात्मिक प्रवचन आदि सञ्चालन हुने तयारी छ ।
सत्य साई संगठन बेसीशहरका सदस्य सुधा ढकाल पहाडीको नेतृत्वमा बालविकासको छ सदस्यीय टोली त्यसतर्फ प्रस्थान गरेको हो । बालविकासको सो टोलीमा अपूर्वराज अधिकारी, दिप्सिना श्रेष्ठ, अर्जुन विक, संगीता श्रेष्ठ र किर्तन तामाङ रहेको जानकारीमा आएको छ । बुद्धजयन्तिमा हुने कार्यक्रम बैशाखको २९, ३० र ३१ गते सञ्चालन हुने आयोजकको भनाइ छ ।
पुट्टपर्तीसम्म जानका लागि रेलको यात्रा गर्नु पर्ने र सो स्थानमा रेल हप्तामा एकपटकमात्र जाने भएको हुँदा केही दिन छिटो जानु परेको बताइएको छ । लमजुङको छ सदस्यी टोलीका साथमा पोखराबाट १० जना र काठमाडौंबाट १६ जनाको टोली समेत सँगै जाने भएको सत्य साई केन्द्र बेसीशहरले जनाएको छ ।