ठूला तीन दलको वैठक निष्कर्ष बिहीन, गृहमन्त्रीको राजीनामा विपक्षी दलहरूको बटमलाइन

काठमाडौँ– प्रमुख प्रतिपक्षी नेकपा (माओवादी केन्द्र) सहितका विपक्षी दलले भिजिट भिसा प्रकरणमा मुछिएका गृहमन्त्री रमेश लेखकले राजीनामा नदिएसम्म संसद् अवरोध कायमै राख्ने अडान राखेका छन् । राष्ट्रिय स्वतन्त्र पार्टी रहित तीन दलीय बैठकमा सहमति जुट्न नसके पछि यो मुद्दा थप पेचिलो बनेको छ । विपक्षीदलहरूले साझा रणनीति बनाउन आज २० गतेका लागि बैठकको आयोजना गरेका छन् ।
विपक्षी दलहरूले गृहमन्त्री रमेश लेखकको राजीनामालाई बटमलाइन बनाएर संसद अवरोध जारी राख्ने रणनीतिमा अडिक देखिएका छन् । विपक्षी दलको सो अडानले प्रधानमन्त्री केपी शर्मा ओली थप अप्ठ्यारोमा पर्नु भएको छ । आजबाट अवरुद्ध संसद् खुलाउन सत्ता साझेदार दुई दल कांग्रेस र एमालेसहित प्रमुख प्रतिपक्ष माओवादी सहित प्रधानमन्त्री कार्यालयमा भएको बैठक बसेको थियो । माओवादी केन्द्रका अध्यक्ष पुष्पकमल दाहाल ‘प्रचण्ड’ले भ्रष्टाचारको विषयमा लचिलो बन्न नसक्ने जवाफ दिएसँगै राजनीतिक परिस्थिति थप पेचिलो बन्न गएको छ ।
तीन ठूला दलका शीर्ष नेताको बैठकमा आफूहरूले गृहमन्त्री रमेश लेखकले राजीनामा नदिएसम्म संसद् चल्न नदिने अडान राखेको पार्टी प्रमुख सचेतक हितराज पाण्डेले बताउनु भयो । प्रमुख सचेतक पाण्डेका अनुसार बैठकमा राजावादीको बढ्दो सक्रियता र संसद्को गतिरोध अन्त्यको विषयमा छलफल भएको थियो ।
उक्त बैठकमा प्रधानमन्त्री तथा नेकपा अध्यक्ष केपी शर्मा ओली, कांग्रेस सभापति शेरबहादुर देउवा र माओवादी अध्यक्ष प्रचण्डले भाग लिनु भएको थियो ।
ओली र देउवाले गृहमन्त्रीको राजीनामाको मागबाट पछि हटेर संसद् खुलाउन आग्रह गरे पनि माओवादी अध्यक्ष प्रचण्डले त्यो मा स्वीकार गर्नु भएन । उहाँले गृहमन्त्रीको राजीनाामाको अडान यथावत राखेको बताउनु भएको छ । गृहमन्त्रीको राजीनामा माग कायमै राखेको र अन्य प्रतिपक्षी दलहरूसँग छलफल गरेर थप निर्णय लिने पाण्डेको भनाइ छ ।
प्रधानमन्त्रीका विज्ञ सल्लाहकार अग्नि खरेलले सत्तापक्षले संसद् खुलाएर अघि बढ्नुपर्ने प्रस्ताव राखेकोमा माओवादीले छलफल गरेर अघि बढ्ने जवाफ दिएको बताउनु भयो । उहाँका अनुसार भिजिट भिसा प्रकरणमा गृहमन्त्री लेखकको संलग्नताबारे पुष्टि हुने आधार नभेटिएकाले संसदको अवरोध खुलाएर अघि बढ्न अनुरोध गरेको छ ।
यसैबीच, विपक्षी दलहरूले संसद् अवरोधको साझा रणनीति बनाउन आजै बैठक बस्ने भएका छन् ।
संसद्को चौथो शक्ति रास्वपा र तेस्रो शक्ति माओवादी अहिले बिहान साझा रणनीति तय गर्न बैठक बस्ने भएको राष्ट्रिय स्वतन्त्र पार्टीका प्रमुख सचेतक सन्तोष परियारले जानकारी दिनु भएको छ । उहाँका अनुसार सो विषयमा विपक्षी दलहरूले साझा रणनीति तय गर्नेछन् ।
गृहमन्त्रीले राजीनामा र प्रधानमन्त्रीले जवाफ नदिए संसद्  चल्दैन  : रास्वपा
यसैबीच, राष्ट्रिय स्वतन्त्र पार्टीले भिजिट भिसा प्रकरणमा गृहमन्त्रीले राजीनामा तथा प्रधानमन्त्रीले संसद्मा जवाफ नदिएसम्म संसद्को कारबाही अघि बढ्न नदिने निर्णय गरेको छ । पार्टी केन्द्रीय कार्यालयमा बसेको पार्टी संसदीय दलको बैठकले जेठ १८ गते उक्त निर्णय गरेको कार्यवाहक प्रवक्ता मनिष झाले बताउनु भयो । उहाँका अनुसार सो बैठकमा पनि जेठ १३ र १४ गतेकै भूमिकामा प्रस्तुत हुने निर्णय भएको छ ।
भिजिट भिसा प्रकरणमा गृहमन्त्री रमेश लेखकले पद छोडेर अनुसन्धानमा सघाउनुपर्ने कार्यवाहक प्रवक्ता झाले बताउनु भयो । उहाका अनुसार परिवारको सदस्यले गरेको बदमासीको जिम्मेवारी अभिभावकले लिने उल्लेख गर्दै उक्त प्रकरणबारे गृहमन्त्री स्वयम्ले नभई प्रधानमन्त्रीले जवाफ दिनुपर्छ ।
उहाँले भन्नुभयो, ‘संसद्को कारबाही अगाडि बढाउने र गृहमन्त्रीको राजीनामाबारे अन्य प्रतिपक्षी दलहरुसँग समेत सहकार्य गर्ने निर्णय भएको छ ।’