लमजुङमा अपाङ्गता भएका व्यक्तिका लागि दुई दिने आधारभूत पत्रकारिता तालिम सुरु

बेसीशहर– लमजुङमा अपाङ्गता भएका व्यक्तिका लागि दुई दिने आधारभूत पत्रकारिता तालिम सुरु भएको छ । अपाङ्ग संरक्षण समाज लमजुङको आयोजना र सूचना तथा प्रविधि मन्त्रालयको आर्थिक सहयोगमा सो तालिम असार १८ गते यहाँ सुरु भएको हो ।
अपाङ्गता भएका व्यक्तिहरू, तिनका अभिभावक तथा सहयोगीका लागि सो तालिम दिइएको हो । सो तालिममा १८ जनाको सहभागिता रहेको छ । ‘समावेसी र दिगो भाविष्यको पुर्वाधार, अपाङ्गता भएका व्यक्तिहरूको प्रवल नेतृत्व यसको आधार ।’ नाराका साथ सो तालिम सञ्चालन गरिएको हो ।
तालिमको उदघाटन सत्रमा आयोजक अपाङ्ग संरक्षण समाज लमजुङका अध्यक्ष चन्द्रकान्त पौडेलको अध्यक्षतामा भएको सो तालिममा उहाँले स्वागत मन्तव्य राख्दै तालिमको उद्देश्यमा प्रकाश पार्नु भएको थियो । पत्रकारिताका लागि पेशा बनाउन दुई दिनको तालिम पर्याप्त नहोला तर यसले तपाईलाई यो पेशाको महत्व, आवश्यकता र औचित्यका बारेमा बुझ्नु हुने छ र निरन्तर लाग्नु भयो भने भोलिका दिनमा व्यवसायिक रुपमा पत्रकार बन्न सक्ने जनशक्ति उत्पादन गर्ने लक्ष्य यो तालिमको रहेको उहाँले उल्लेख गर्नुभयो ।
सो तालिममा पत्रकार महासंघका सस्थापक जिल्ला अध्यक्ष एवम् वरिष्ठ पत्रकार नवराज पहाडी, पत्रकार महासंघका पूर्व केन्द्रीय सदस्य नवीनराज कुइँकेल र पत्रकार महासंघका केन्द्रीय सदस्य कृष्ण केसीले प्रशिक्षण दिनु भएको थियो ।
सैद्धान्तिक र प्रयोगात्मक रुपमा सञ्चालन तालिममा पत्रकार को हो ? पत्रकारिता के हो ? समाचार केलाई भनिन्छ ? समाचार बन्ने आधार तथा तत्व केके हुन् ? पत्रकारिताको सिद्धान्त ? सात कप, उल्टो पिरामिड, समाचारका स्रोत, आचार संहिता आदि सैद्धान्तिक विषयमा जानकारी दिइएको थियो । साथमा समाचार लेखन अभ्यास समेत गरिएको थियो ।
सो कार्यक्रमको सञ्चालन आयोजक अपाङ्ग संरक्षण समाज लमजुङका सचिव सिताराम बसेलले गर्नु भएको थियो । उहाँका अनुसार भोलि पत्रकार महासंघका सस्थापक जिल्ला अध्यक्ष एवम् वरिष्ठ पत्रकार नवराज पहाडीका अतिरिक्त पत्रकार महासंघका पूर्वकेन्द्रीय सदस्य किसान संगीत, राससका प्रतिनिधि बिराट न्यौपानेले प्रशिक्षण दिनुहुने कार्यक्रम रहेको छ ।
भोलि सहभागीलाई चार समूहमा विभाजन गरी चार कार्यालयमा समाचार संकलन गर्न लगाई लेखनको अभ्यास गराइने कार्यक्रम समेत रहेको प्रमुख प्रशिक्षक पहाडीले जानकारी दिनुभएको छ ।
सो तालिमको बेसीशहर नगरपालिका– ८ का वडाध्यक्ष पवित्रा थापा रानाको प्रमुख आतिथ्यतामा समापन कार्यक्रम गर्ने तयारी रहेको आयोजक संस्थाका अध्यक्ष चन्द्रकान्त पौडेलले बताउनुभयो । उहाँका अनुसार सहभागीहरूलाई प्रमाणपत्रको प्रवन्ध गरिएको छ भने भोलि बिहान ७ बजेदेखिनै कक्षा सञ्चालन हुने कार्यक्रम छ ।