वयोबृद्ध समाजसेवी प्रेमबहादुर केसीद्वारा श्रीमतीको स्मृतिमा विपन्न परिवारका २५ जना विद्यार्थीलाई पोशाक वितरण

कोइरालाफाँट(लमजुङ)– लमजुङमा एक विदुर वयोबृद्ध समाजसेवी पुरुषले आफ्नी स्वर्गीय श्रीमतीको स्मृतिमा विपन्न परिवारका २५ जना विद्यार्थीलाई पोशाक वितरण गर्नु भएको छ । सुन्दरबजार नगरपालिका– ६ खत्रीठाँटी निवासी वयोबृद्ध समाजसेवी दाता प्रेमबहादुर केसीले आफ्नी सहधर्मिणी भगवती केसीको स्मृतिमा सोही नगरपालिका– १० को यहाँ स्थित सिद्धिसदन आधारभूत विद्यालयमा आफै उपस्थित भएर उक्त कार्य मंसिर २१ गते गर्नु भएको हो ।
उक्त विद्यालयका शिक्षक अभिभावक संघका अध्यक्ष तेजबहादुर अधिकारीको अध्यक्षतामा भएको उक्त कार्यक्रममा ८९ वर्षीय प्रेमबहादुर केसीले सो विद्यालयको माग अनुसार ती सामग्री हस्तान्तरण गर्नु भएको हो । आफ्नो विद्यालयका २५ जना विपन्न परिवारका विद्यार्थीलाई समाजसेवी दाता प्रेमबहादुर केसीले पोशाक वितरण कार्य गर्नुभएको सो विद्यालयका प्रधानाध्यापक दीपक कोइरालाले बताउनु भयो । उहाँका अनुसार वयोबृद्ध दाता केसीले उक्त अवसरमा विद्यालयलाई पाँच हजार पाँच रुपैयाँ नगद समेत प्रदान गर्नु भएको छ ।
उक्त अवसरमा सोही वडाकी वडासदस्य कालीमाया अछामी, राष्ट्रिय स्वतन्त्र पार्टी(रास्वपा)का केन्द्रीय संगठन विभागका सदस्य एवम् रास्वपा लमजुङका संस्थापक संयोजक तथा इञ्जिनियर धर्म केसी, सोही दलका जिल्ला संगठन विभागका प्रमुख बाबुराम अधिकारी लगायतको सहभागिता रहेको सो विद्यालयकी शिक्षक सीता भण्डारीले जानकारी दिनुभयो ।
स्मरणीय छ, वयोबृद्ध दाता प्रेमबहादुर केसीले गत वर्ष पनि सोही वडामा रहेको सौमाग्यसदन माविमा पनि यसरी नै २५ जना विपन्न परिवारका विद्यार्थीहरूलाई पोशाक वितरण गर्नु भएको थियो । समाजसेवी वयोबृद्ध केसीले आफ्नो नाउँमा आउने पेन्सनको रकमलाई पहिलो वर्षदेखिनै यसरी नै समाज सेवाका साथमा मौलिक कला संस्कृति तथा संगीतको श्रीबृद्धिका कार्यमा खर्चने गरिआउनु भएको छ ।