३३ औँ त्रिवेणी कप सुरु : पहिलो खेलमा एपीएफको जितमा समीरको ह्याट्रिक

बेसीशहर– लमजुङको जिल्ला सदरमुकाम बेसीशहरमा हरेक वर्षको पुस १२ गते सुरु हुने त्रिवेणी कप राष्ट्रव्यापि फुटवल प्रतियोगिता यो वर्ष पनि सुरु भएको छ । गण्डकी प्रदेश सरकारका वन तथा वातावरण मन्त्री भेषबहादुर पौडेलले सहजी खेल मैदानमा आयोजित एक भव्य समारोहका विच पुस १२ गते उद्घाटन गर्नु भएको हो ।
यो वर्ष प्रतियोगिताको ३३ औँ शृंखला सुरु भएको हो । जसलाई ३३ औँ त्रिवेणी कपको संज्ञा दिइएको छ । क्लवका संस्थापक कोषाध्यक्ष एवम् पूर्वअध्यक्ष समेत रहनु भएका मन्त्री पौडेलले खेलकुदको माध्यमबाट मुलुक समृद्ध बनाउन सकिने बताउनु भयो । उहाँले त्रिवेणी कपको सुरुवाती दिन सम्झँदै भैलो खेलेर उठाइएको पैसाबाट प्रतियोगिता सञ्चालन गरिएको स्मरण गर्दै अहिले त्यो अभियान ठूलो प्रतियोगितामा रुपान्तरण हुनु गर्वको विषय भएको उल्लेख गर्नु भयो । खेलकुदले युवालाई अनुशासित, ऊर्जावान र सकारात्मक दिशातर्फ डोर्याउने उहाँको तर्क थियो । त्रिवेणी रङ्गशालाको स्तरोन्नति र समग्र जिल्लाको विकासका लागि आफूले सक्दो सहयोग गर्ने मन्त्री पौडेलले प्रतिवद्धता व्यक्त गर्नु भएको छ । खेलकुदको माध्यमबाट जिल्ला, प्रदेश हुदै देशको नाम अन्तर्राष्ट्रियस्तरमा चिनाउन सक्ने भएकाले खेलकुद क्षेत्रको विकासका लागि सरकारले उच्च प्राथमिकताका साथ काम गरिरहेको मन्त्री पौडेलको कथन छ ।
आयोजक त्रिवेणी युवा क्लवका अध्यक्ष टेकजंग गुरुङको अध्यक्षतामा भएको उद्घाटन कार्यक्रममा क्लवले पूर्व राष्ट्रिय खेलाडी सुवास गुरुङलाई बख्खु ओढाएर सम्मान गरिएको थियो । सो अवसरमा बेसीशहर नगरपालिका– ८ का वडा अध्यक्ष पवित्रा थापा रानालगायतले शुभकामना मन्तव्य व्यक्त गर्नु भएको थियो ।
यो प्रतियोगितामा यसवर्ष १६ टीमले भाग लिएका छन् । आज प्रतियोगिताको पहिलो खेल भएको छ । जसमा साविक विजेता विभागीय टीम सशस्त्र प्रहरीको एपीएफ फुटबल क्लब र सुन्दरबजार फुटबल क्लबबीच भएको थियो । सो खेलमा ५–० गोल अन्तरले सशस्त्र प्रहरीको एपीएफ फुटबल क्लब विजयी भएर फुटबल प्रतियोगितामा फराकिलो जित निकालेको छ । एपीएफको जितमा समीरबाहेक प्रदीप लामा र मणिकुमार लामाले समान एक गोल थपेको आयोजकको भनाइ छ । खेलको २०औं मिनेटमै समीरले एपीएफलाई सुरुआती अग्रता दिलाएका थिए । त्यसको १० मिनेटपछि उक्त अग्रता दोब्बर बनाउन सफल भए ।
३७औं मिनेटमा प्रदीपले गोल गर्दा एपीएफ पहिलो हाफमा ३–० ले अगाडि रहेको थियो । खेलको ६३औं मिनेटमा मणिले अर्को गोल थपेका थिए । योसँगै एपीएफले ४–० को अग्रता बनाएको थियो । तर, समीर भने रोकिएनन् । त्यसको ७ मिनेटपछि नै गोल गर्दै उनले पहिलो ह्याट्रिक गर्ने कीर्तिमानसमेत बनाएका छन् । समीर नै खेलको ‘म्यान अफ दी म्याच’ घोषित भएसँगै नगद १० हजार रुपैयाँ पुरस्कार समेत जितेका छन् ।
आयोजक त्रिवेणी युवा क्लबका अध्यक्ष टेकजङ गुरुङले पहिलो दिन उद्घाटन खेल भएकाले एउटामात्रै खेल खेलाइएको जानकारी दिनु भयो । उहाँका अनुसार दोस्रो दिन भोलिदेखि फाइनल बाहेक हरेक दिन २ वटा खेल खेलाइने छ ।
उक्त प्रतियोगितामा विजेता हुने समुहलाई नगद १२ लाख रुपैयाँ, ट्रफी, मेडल र प्रमाणपत्र प्रदान गरिनेछ । उपबिजेता समुहलाई नगद ६ लाख रुपैयाँ, मेडल र प्रमाणपत्र प्रदान गरिने भएको क्लवका पूर्व अध्यक्ष सिजन श्रेष्ठले जानकारी दिनु भयो । उहाँका अनुसार सर्वोत्कृष्ट खेलाडी, सर्वाधिक गोलकर्ता र उत्कृष्ट गोल किप्परले जनही २५÷२५ हजार, ट्रफी र प्रमाणपत्र प्रदान गरिने छ भने प्रत्येक खेलमा म्याद अफ दि म्याच घोषणा गरिने र सो उपाधि प्राप्त गर्नेलाई १० हजार रुपैयाँ र ट्रफी प्रदान गरिने छ ।
प्रतियोगितामा गतवर्ष सेमीफाइनलमा पराजित हुने २ समुहलाई नगद २÷२ लाख रुपैयाँ प्रदान गर्दै आएकोमा यसवर्षदेखि खर्चको अभावका कारण हटाइएको आयोजक त्रिवेणी युवा क्लवले जनाएको छ ।
क्लवले प्रत्येक वर्ष पुस १५ गते त्रिवेणी साँझ कार्यक्रम सञ्चालन गर्ने गर्दछ । यसवर्ष फुटवल प्रतियोगिता तथा त्रिवेणी साँझ कार्यक्रम सञ्चालनका लागि १ करोड ३२ लाख ३५ हजार रुपैयाँ खर्च लाग्ने अनुमान गरिएको क्लवका पूर्व अध्यक्ष विनोद गुरुङले जानकारी दिनु भयो । उहाँका अनुसार क्लवले विगथमन वर्षझैं यो वर्ष पनि पुस १५ गते तमू ल्होसार विशेष सांगीतिक साँझ आयोजना गर्ने तयारी गरेको छ ।
– अनुज अधिकारीको सहयोगमा ।