विभिन्न दलका नेता उम्मेदवारहरूद्वारा मतदान, एमालेका उपाध्यक्ष गुरुङले १ बजे खसाल्ने

बेसीशहर– लमजुङमा विभिन्न दलबाट उम्मेदवार बनेका नेताहरू अधिकांशले मतदान गरे भने नेकपा(एमाले)बाट उम्मेदवार रहनु भएका सो दलका उपाध्यक्ष पृथ्वीसुब्बा गुरुङले आज फागुन २१ गते १ बजे खसाल्ने हुनु भएको छ ।
राष्ट्रिय स्वतन्त्र पार्टी(रास्वपा)का उम्मेदवार एवम् केन्द्रीय संगठन विभागका सदस्य, इन्जिनियर धर्म केसीले सुन्दरबजार नगरपालिका– ६ को आदर्शबाल मावि मतदान केन्द्रमा सवेरै पुगेर मतदानमा भाग लिनु भएको छ । नेपाली काँग्रेसका उम्मेदवार गमप्रसाद गुरुङले क्ब्होलासोथर गाउँपालिका– ८ को घाम्राङ स्थित आफ्नो गाउँको सूर्योदय निमावि मतदान केन्द्रमा मतदान गर्नु भएको छ । एमालेका उम्मेदवार एवम् उपाध्यक्ष पृथ्वीसुब्बा गुरुङले दिउँसो १ बजे खसाल्ने हुनु भएको उहाँ निकट स्रोतले जनाएको छ ।
यसैगरी नेपाली कम्युनिष्ट पार्टीका उम्मेदवार हरिजङ तामाङले पनि आफ्नो नाम रहेको मतदान स्थलमा गएर मतदान गर्नु भएको जानकारीमा आएको छ ।
त्यस्तै, अन्य उम्मेदवारहरू राप्रपाका केविन्द्रजंग गुरुङ, नेपाल कम्युनिष्ट पार्टी (माओवादी)का रविन्द्र नखोला, श्रम संस्कृति पार्टीका कोषलाल गुरुङ, मंगोल नेसनल अर्गनाइजेसनका विकास गुरुङ, जनादेश पार्टी नेपालका मिलन बास्कोटा तथा स्वतन्त्र उम्मेदवार सन्तोष घिमिरे पनि आआफ्नो मतदाता नामावाली भएको स्थानमा उपस्थित भई मतदान गर्नु भएको जानकारीमा आएको छ ।
उता, नेपाल मजदुर किसान पार्टीकी उम्मेदवार गुजेश्वरी प्रजापति मगजु र नेश्नल रिपब्लिक पार्टीका भरत गुरुङले भने आफू उठेको क्षेत्रबाट मतदान गर्न नपाउनु भएको बुझिएको छ । उहाँहरू क्रमशः भक्तपुर र कास्कीका स्थायी बासिन्दा हुनुहुन्छ । मगजु यस जिल्लामा एक मात्र महिला उम्मेदवार हुनुहुन्छ ।
लमजुङ जिल्लामा कुल १ लाख ३७ हजार १२४ मतदाता रहेका छन् । तीमध्ये ६९ हजार ५२४ महिला र ६७ हजार ६०० पुरुष मतदाता छन् । २०७९ सालमा सम्पन्न प्रतिनिधिसभा निर्वाचनको तुलनामा यो पटक मतदाताको संख्या ३ हजार ४०७ ले वृद्धि भएको जिल्ला निर्वाचन कार्यालयले जनाएको छ । सो कार्यालयका अनुसार गत निर्वाचनमा १ लाख ३३ हजार ७१७ मतदाता रहेका थिए ।
मतदानका लागि जिल्लामा १३० मतदानस्थलमा १९२ मतदान केन्द्र तथा एक अस्थायी मतदान केन्द्र तोकिएका छन् ।
यसैबीच, जिल्ला मुख्य निर्वाचन अधिकृतको कार्यालयले ४० प्रतिशत हाराहारीमा मतदान भइसकेको जानकारी दिएको छ । सो कार्यालयका अनुसार रेकर्ड संकलन कार्य जारी रहेको छ ।