लमजुङमा मतगणना अपडेट : नौ हजार ६४२ मतले रास्वपाका धर्म केसी अग्रस्थानमा

बेसीशहर– लमजुङमा जारी मत गणनाको पछिल्लो अपडेट नतिजा अनुसार राष्ट्रिय स्वतन्त्र पार्टी(रास्वपा)का धर्म केसी झण्डै साढे नौ हजार बढी मतको अन्तरले आग्रस्थानमा रहनु भएको छ । केसीकापछि कांग्रेसका उम्मेदवार गमप्रसाद गुरुङ हुनुहुन्छ भने एमालेका उपाध्यक्ष एवम् निवर्तमान सूचना, सञ्चार तथा प्रविधि मन्त्री पृथ्वीसुब्बा गुरूङ तेस्रोमा कायमै रहनु भएको छ ।
प्राप्त पछिल्लो नतिजा अनुसार रास्वपाका धर्मराज केसीले २१ हजार ५६८ मत पाउनु भएको छ । काँग्रेसका गमप्रसाद गुरूङले ११ हजार ९२६ मतका साथ दोस्रो स्थानमा हुनुहुन्छ भने एमालेका पृथ्वीसुब्बा गुरूङले दश हजार ९७६ मतका साथ तेस्रो स्थानमा हुनुहुन्छ । काँग्रेसका गमप्रसादभन्दा उहाँ ९५० मतले पछि हुनुहुन्छ ।
नेकपाका हरिजंग तामाङले दुई हजार २७३ मत पाउनु भएको छ ।
कुल ५० हजार ३४१ मत गणना हुँदा एक हजार ७७७ मत बदर भएको छ । यसले मतदाता शिक्षाको औचित्यमा प्रश्न उठाएको छ कि अनुभवी भनिने थोत्रा मानिसबाट दिइने त्यो शिक्षाको अर्थ प्रायः समाप्त भएको देखिन आएको छ ।
यसैगरी, राप्रपाले ६०६ मत पाएको छ भने श्रम संस्कृति पार्टीले ४३८ मत पाएको स्थिति छ । मंगोल नेसनल अर्गनाइजेसनले २७९ मत, स्वतन्त्र उम्मेदवार सन्तोष घिमिरेले ८७ मत, नेकपा(माओवादी)ले १३० मत, जनादेश पार्टी नेपालले ४६ मत र नेमकिपाले ७ मत पाएका छन् ।
लमजुङमा कुल १ लाख ३७ हजार १ सय २४ मतदाता थिए । १ सय ३० मतदानस्थलको एउटा अस्थायीसहित १ सय ९३ मतदान केन्द्रमा ७५ हजार २५ मत खसेको मुख्य निर्वाचन कार्यालयले जनाएको छ ।
मत गणना कार्य जिल्ला समन्वय समितिको सभाहलमा जारी रहेको छ । मत गणना कार्य रातभर जारी रहेको छ ।
अन्तरङ्गको सर्वेक्षण सत्य सावित हुदै :
तीतो (वस्तुगत) सत्य स्विकार गर्न मानिसहरूलाई कठिन हुन्छ । तर अन्तरङ्ग परिवारले निर्वाचनको सुरुवाती चरणदेखिनै यो पटक घण्टी अर्थात स्वतन्त्र पार्टी लमजुङमा सबैभन्दा अघि हुन्छ । त्यसपछि क्रमशः रुख(काँग्रेस) र सूर्य(एमाले) तेस्रो स्थानमा रहन्छ भनेर गरेको सर्वेक्षण पुग्ने निश्चित भएको छ । अन्तरङ्गले यो पटकको निर्वाचन सम्बन्धि समाचारमा जहिले पनि घण्टी, रुख र सूर्य अनि तारालाई क्रमशः राख्दै आएको थियो । हालसम्म प्राप्त नतिजाले पनि सोही वस्तुगत तथ्यलाई पुष्टि गरेको छ । यसबाट अन्तरङ्ग परिवारको ३४ वर्षको इतिहासमा तथ्यमा आधारित वस्तुगत पत्रकारिता गर्दै आएको थियो, छ र गर्छ भन्ने पुनः एक पटक पुष्टि भएको छ ।