पोखरा– राजनीतिक प्रतिशोध साध्नका लागि राज्यले शक्तिको दुरुपयोग गर्दै गरेको राष्ट्रिय स्वतन्त्र पार्टी (रास्वपा) का सभापति रवि लामिछाने विरुद्धको कार्तिक ८ गते दोस्रो पटक सात दिनको म्याद थप गरिएको छ । यो सँगै देश अब दुई कित्तामा विभाजित हुने स्थिति बलियो बन्दै गएको स्थिति छ ।
रास्वपाका सभापति रविलाई कास्की जिल्ला अदालतका न्यायाधीश चन्द्रकान्त पौडेलको इजलासले उनलाई थप सात दिन हिरासतमा राख्न अनुमति दिएको जिल्ला अदालतका सूचना अधिकारी सुरज अधिकारीले बताउनु भयो । उहाँका अनुसार पूर्वडिआईजी छविलाल जोशीलाई पनि थप ७ दिन हिरासतमा राख्न अदालतले अनुमति दिएको छ ।
योसँगै रास्वपाका सभापति रवि लामिछाने तिहार प्रहरी हिरासतमै वित्ने भएको छ । उहाँलाई प्रहरीले कार्तिक १४ गतेसम्म हिरासतमा राख्ने छ । सोही दिनदेखि अदालत बन्द हुने हुँदा रविको तिहार प्रहरी कष्टडीमा वित्ने भएको हो ।
स्मरणीय छ, तिहार बिदापछि कार्तिक २० गतेमात्र जिल्ल अदालत खुल्ने छ । त्यस दिने फेरि म्याद थप गर्ने कि नगर्ने भन्नेबारे अदालतमा बहस हुने छ ।
रास्वपाले भन्यो अबको आन्दोलन काठमाडौं केन्द्रित :
यसैबीच, रास्वपाले अब काठमाडौंकेन्द्रित आन्दोलन गर्ने बताएको छ । यहाँ आयोजित पत्रकार सम्मेलनमा रास्वपाले आज त्यस्तो जानकारी दिएको हो । नेताहरूले प्रदर्शन रचनात्मक, सिर्जनात्मक तवरले भइरहेको दाबी पनि गरेका छन् ।
पार्टी उपसभापतिद्वय डिपी अर्याल र स्वर्णिम वाग्लेसहित पोखरामा केन्द्रीत रहेको आन्दोलन अब काठमाडौंकेन्द्रित हुने बताएको हो । आन्दोलनलाई निलो क्रान्ति तथा राष्ट्रियता र स्वाभिमानका लागि अभियान भन्दै सञ्चालित सो कार्यmममा पार्टीका सबै शीर्ष नेता तथा सांसदहरू पोखरामै केन्द्रित छन् । जिल्ला–जिल्लाबाट पनि नेता, कार्यकर्ता पोखरा उतारेर प्रदर्शनका साथ सभा गर्ने गरिएको थियो ।
पत्रकार सम्मेलन गरेर न्यायिक प्रक्रियामा झक्झक्याउनका लागि पोखराको आन्दोलन सफल भएको दाबी गरेका छन् । नेताहरूले पोखराको आन्दोलन सम्भवत आज अन्तिम हुने र अब काठमाडौंकेन्द्रित हुने बताएका छन् ।
पार्टीका कार्यवाहक प्रवक्ता मनिष झाले पनि अब काठमाडौंकेन्द्रित आन्दोलन गरिने जानकारी दिनुभयो । उहाँले भन्नुभयो, ‘अब काठमाडौंकेन्द्रित आन्दोलन हुन्छ । तर पोखरामा सभापति रहुन्जेल केही न केही कार्यक्रम त भइराख्छ ।’
यसैसन्दर्भमा रास्वापका उपसभापति स्वर्णिम वाग्लेले आक्रोशपूर्ण मुद्रामा भन्नुभयो, बयान लम्ब्याइएको छ, रवि लामिछानेलाई दालभात खुवाउन ल्याइएको हो ? भन्नुभएको छ । वाग्लेले कास्की हिरासतमा रहेका रवि लामिछानेको बयान लम्ब्याएर दुःख दिन खोजिएको दावी गर्नुभयो ।
यहाँले पत्रकार सम्मेलनमा भन्नुभयो, ‘सरकारले १२५ घन्टा हिरासतमा राख्दा जम्मा ४–५ घन्टा मात्र बयान लिने काम गरेको छ, यसले सरकारको नियत नै सभापति लामिछानेप्रति प्रतिशोध साध्ने देखिएको उल्लेख गर्नु भयो ।
उहाँले भन्नुभयो, ‘रवि लामिछानेलाई राजनीतिक प्रतिशोध नै साँधिएको थियो भन्ने हाम्रो दाबी थियो, जनताका बीचमा त्यो कुरा स्थापित गराउनु थियो, हिजो साँझबाट हाम्रो दाबीको थप पुष्ट्याइँ हुन गएको छ ।’ एउटै मात्र आधार, उहाँलाई साँझ पक्राउ गरियो । लामो सडक यात्रा गराएर राति एक बजे ल्याइयो । हिजो साँझ १० बजेसम्मको हिसाब गर्दा १२५ घन्टा उहाँलाई हिरासतमा राखिएको रहेछ । यो अवधिमा ४–५ घन्टामात्रै बयान लिइएको छ वाग्लेले उल्लेख गर्नु भयो । उहाँले थप भन्नुभयो, ‘के उहाँलाई यहाँ दालभात खुवाउन ल्याएको हो ! तयारी थिएन पहिला ? के सोध्ने भन्ने थाहा छैन ?’
पार्टीको संस्थापक सभापति एवम् पूर्वउपप्रधान र गृहमन्त्री समेत रहनु भएका रविको मानमर्दन र अपमानित गर्ने शैलीमा सरकार प्रस्तुत भएको पनि उहाँको तर्क छ ।
उहाँले भन्नुभयो, ‘तेरो सेखी झार्दिन्छु, देखाइदिन्छु, भन्ने शैलीमा सरकार प्रस्तुत भएको छ । यसलाई सभ्य भाषामा राजनीतिक प्रतिशोध नै भनिन्छ ।’ राजनीतिक प्रतिशोध नै साँधेको हो भन्ने रास्वपाको दाबीलाई हिजो पछिल्लो वस्तुस्थितिले पुष्टि गरेको छ ।’
प्रकाशित मिति २०८१ कार्तिक ८, बिहीबार १८:४९ गते
