बेसीशहर– लमजुङमा नवौं उद्योग दिवसको अवसरमा चार जना उद्यमीलाई सम्मान गरिएको छ । पर्यटन तथा उद्योग कार्यालयले एक कार्यक्रमको आयोजना गरी ती उद्यमीहरूलाई मंसिर ९ गते सम्मान गरेको हो ।
सम्मान हुनेहरूमा व्यवसायिक रुपमा विभिन्न उद्योग सञ्चालन गर्दै आउनु भएका बेसीशहर नगरपालिका– ३ मा मनकामना फुड्स प्रोडक्टको व्यवसाय गर्दै आउनुभएका ओमकुमार श्रेष्ठ, बेसीशहर नगरपालिका– ८ मा रहेको सप्तरंगी आर्ट पब्लिसिटिका प्रोपाइटर सुवासचन्द्र अधिकारी, बेसीशहर नगरपालिका– ११ मा कुताल पोल्ट्री फर्म सञ्चालन गदै आउनुभएका कुमारबहादुर विष्ट र बेसीशहर नगरपालिका– ७ मा रिमाल दालमोठ उद्योग सञ्चालन गर्दै आउनु भएकी प्रोपाइटर भवानी रिमाललाई कार्यालयले सम्मानपत्र सहित सम्मान गरेको हो ।
सम्मानित हुनेहरूलाई कार्यक्रमका प्रमुख अतिथि जिल्ला समन्वय समितिका प्रमुख पुर्णबहादुर गुरुङ तथा पर्यटन तथा उद्योग कार्यालयका प्रमुख मिताकुमारी थापाले संयुक्त रुपमा टीका, माला र सम्मानपत्रका साथ उहाँहरूलाई सम्मान गर्नुभएको हो ।
सम्मानित हुने श्रेष्ठले विगत २२ वर्षदेखि, सुवास अधिकारीले १७ वर्षदेखि विष्ट र रिमालले क्रमशः १२ र १० वर्षदेखि उद्योग सञ्चालन गर्दै आउनु भएको सो कार्यालयले जनाएको छ ।
सो अवसरमा पर्यटन तथा उद्योग कार्यालयले अन्तरक्रिया कार्यक्रम पनि गरेको थियो । कार्यक्रममा आयोजक कार्यालयका प्रमुख मिताकुमारी थापाले कार्यक्रमको विषयवस्तुका बारेमा एक कार्यपत्रमार्फत जानकारी दिनुभएको थियो । तर कार्यपत्रमा टिप्पणी गराउने तथा फ्लोर ओपन गरी सुझाब संकलन कार्य भने नगरिएको सहभागीहरूले बताए । उनीहरूका अनुसार कार्यपत्रमा उल्लेख गरिएका धार्मिक पर्यटकीय स्थलभन्दा पनि महत्व राख्ने अन्य स्थल÷मन्दिर तथा गन्तव्यस्थल तथा होमस्टे धेरै रहेका थिए, मौरी पालनलाई उद्योगको रुपमा लिन सकिने व्याख्या गर्दै गर्दा तरकारी तथा मासु र दुग्ध पदार्थको उद्योग हुन सक्ने नसक्नेतर्फ कार्यपत्र मौन रहेको थियो । लगायतका धेरै कुरा छुटेको सहभागीहरूको तर्क छ ।
कार्यक्रमका प्रमुख अतिथि जिल्ला समन्वय समिति प्रमुख पूर्णबहादुर गुरुङले शुभकामना व्यक्त गर्दै उत्पादन मुलक उद्योगहरूलाई प्रवद्र्धन गर्ने नीति लिनुपर्नेमा जोड दिनुभएको थियो । साना तथा मझौला लगायत ठूला उत्पादनमुलक उद्योगहरूलाई प्राथमिकतामा राखेर अगाडि बढ्नुपर्ने उहाँले उल्लेख गर्नु भयो ।
यसैगरी, जिल्ला समन्वय समितिका उपप्रमुख बुनाकुमारी रिमालले स्थानीय तहका सरकारले सानो उद्योग सञ्चालन गर्नुपर्नेमा जोड दिनुपर्ने बताउनुभयो । उहाँले उद्योग कलकारखाना खोल्न सकेमा देशमा रोजगारी सिर्जना हुने हुन्छ, बजारीकरणमा तीनै तहका सरकारले ध्यान दिनु पर्छ भन्नुभयो ।
सो अवसरमा जिल्ला प्रशासन कार्यालय लमजुङको प्रमुुख प्रशासकीय अधिकृत संगीता के.सी, लमजुङ उद्योग वाणिज्य संघका द्वितीय उपाध्यक्ष भरत श्रेष्ठ, पुरस्कृत व्यक्तित्व भवानी रिमाललगायतले शुभकामना मन्तव्य राख्नुभएको थियो ।
उद्योग कार्यालयका प्रमुख मिताकुमारी थापाको अध्यक्षतामा भएको उक्त कार्यक्रमको सञ्चालन पत्रकार वसन्ता भट्टले गर्नुभएको थियो ।a
प्रकाशित मिति २०८० मंसिर ९, शनिबार २०:५४ गते
