सुन्दरबजार(लमजुङ)– नेपाल अर्बुद रोग निवारण संस्था लमजुङ शाखाको पदीय जिम्मेवारी बाडफाड गरिएको छ । सो संस्थाको यहाँ स्थित HDCS– नमूना सामुदायिक अस्पतालको बैठककक्षमा बसेको बैठकले पदीय जिम्मेवारी बाडफाडका साथमा विविध निर्णय मंसिर १८ गते गरेको हो ।
नेपाल अर्बुद रोग निवारण संस्था लमजुङ शाखाका सभापति नवराज पहाडीको अध्यक्षतामा बसेको बैठकले पदीय जिम्मेवारी बाडफाड गरेको हो । जस अनुसार उपसभापति द्वय नवराज बराल र शोभा ठकुरी, सचिव विराट न्यौपाने, कोषाध्यक्ष तैमाया गुरुङ र सहसचिवमा श्रीभक्त न्यौपाने चयन हुनुभएको छ । सो संस्थाको विधान अनुसार अधिवेशनमा सभापति र सदस्य मात्र चयन हुने र सो समितिको पहिलो बैठकले पदीय वाडफाँड गर्ने प्रावधान रहेको छ । विधानको प्रावधान अनुसार मंसिर १४ गते सम्पन्न भएको जिल्ला अधिवेशनबाट चयन भएको समितिको बैठकले आज पदीय जिम्मेवारी वाडफाड गरेको हो ।
सो बैठकले शाखाको सल्लाहकारमा पूर्वप्रजिअ रमेशचन्द्र अधिकारी, सामाजिक व्यक्तित्व रामबाबु अधिकारी, HDCS– नमूना सामुदायिक अस्पतालका प्रमुख हेमन्त श्रेष्ठ, सामाजिक कार्यकर्ताद्वय कृष्णबहादुर राउत र बाबुराम अधिकारीतथा त्रिभुवन क्याम्पस मानेचौका सहप्राध्यापक ज्ञानेन्द्र शर्मालाई चयन गरेको सो संस्थाका सचिव विराट न्यौपानेले बताउनु भयो । उहाँका अनुसार बैठकले आउँदो पुस १९ र २० गते काठमाडौंमा हुने नेपाल अर्बुद रोग निवारण संस्थाको केन्द्रीय सभा एवम् अधिवेशनका लागि प्रतिनिधि र पर्यवेक्षक समेत छनौंट गरेको छ । उहाँले भन्नुभयो, ‘प्रतिनिधिमा शाखाका सभापति नवराज पहाडी, उपसभापति शोभा ठकुरी, कोषाध्यक्ष तैमाया गुरुङ र सदस्य मीनबहादुर तामाङ गुरुङका साथै सल्लाहकार ज्ञानेन्द्र शर्मा चयन हुनुभएको छ ।’
त्यस्तै, पर्यवेक्षकहरूमा सल्लाहकारहरू रमेशचन्द्र अधिकारी, रामबाबु अधिकारी र बाबुराम अधिकारी, उपसभापति नवराज बराल, सचिव विराट न्यौपाने, सदस्य राम थापा चयन हुनुभएको छ ।
बैठकले यही मंसिर २१ र २२ गते HDCS– नमूना सामुदायिक अस्पतालमा सञ्चालन गर्न लागेको दुई दिने निःशुल्क क्यान्सर र आँखा शिविरको अन्तिम तयारीका वस्तुस्थिति बुझ्नका लागि पनि शिविर हुने स्थलमै कार्यसमितिको बैठक बसेको शिविरको आयोजक रहेको नेपाल अर्बुद रोग निवारण संस्था लमजुङ शाखाका सभापति नवराज पहाडीले बताउनु भएको छ । उहाँका अनुसार शिविरको तयारी लगभग पुरा भएको छ । उहाँले भन्नुभयो, ‘शिविर HDCS– नमूना सामुदायिक अस्पतालको व्यवस्थापन, लायन्स इन्टरनेसनल 325– E को प्राविधिक तथा औषधि सहयोगमा सञ्चालन गर्न लागिएको हो ।’
विशेषज्ञ डाक्टरहरू आउने :
शिविरको सञ्चालकका लागि नेसनल क्यान्सर अस्पताल जावलाखेलमा कार्यरत प्रसुति तथा क्यान्सर विशेषज्ञ रोग विशेषज्ञ एवम् अंकोलोजिष्ट डा. सुशीला वैद्य तथा पाटन अस्पतालमा कार्यरत आँखा रोग विशेषज्ञ डा.द्वय सहितको टिम आउँदै छ । यसैगरी, लायन्स इन्टरनेसनल 325– E का गभर्नरसहितको २५ सदस्यीय टोली लमजुङ आउने तयारीमा रहेका नेपाल अर्बुद रोग निवारण संस्था लमजुङका सल्लाहकार रामबाबु अधिकारीले बताउनु भएको छ ।
उहाँले काठमाडौंमा बसेर शिविरका लागि आवश्यक संयोजन कार्यमा भूमिका निभाइरहनु भएको शाखाका सभापति पहाडीले जानकारी दिनुभएको छ । उहाँका अनुसार सल्लाहकार अधिकारी पनि चिकित्सक एवम् लायन्सको टोलीका साथ शिविरमा सहभागी हुन आउँदै हुनुहुन्छ । पहाडीले भन्नुभयो, ‘२१ गते विहान ऐतिहासिक थलो दुराडाँडाको पाणिती संस्कृत माविमा हुने कार्यालम र २० गते सुन्दरबजार नगरपालिकामा हुने कार्यक्रमको समेत संयोजन कार्य उहाँबाट भइरहको छ ।’
प्रकाशित मिति २०८१ मंसिर १८, मंगलवार १८:१९ गते
