मन्थली (रामेछाप)– रामेछापको तामाकोशीमा भएको बस दुर्घटनामा मृत्यु हुनेको संख्या १२ पुगेको प्रहरीले जनाएको छ । मृतक १२ मध्ये ११ जनाको पहिचान खुलेको मन्थली अस्पतालको हवाला दिदै प्रहरीले माघ २७ गते साँझ ५ बजे जनाएको हो । रामेछापको मन्थली नगरपालिका– ६, मसानटारस्थित सडकबाट बस तामाकोसीमा खसेको थियो ।
दुर्घटनामा आठजनाको जीवितै उद्धार गरेर विभिन्न अस्पतालमा पठाइएको रामेछापका प्रहरी प्रमुख प्रहरी नायव निरीक्षक भोला भट्टले जानकारी दिनुभयो । उहाँका अनुसार घाइते केहीको अवस्था गम्भीर छ ।
सो दुर्घटनामा मृत्यु हुनेमा दोलखा भिमेश्वर– ७ का २५ वर्षीया बबी तामाङ, भिमेश्वर– ८ की ६० वर्षीय मानबहादुर तामाङ, रामेछाप लिखु–४ का २८ वर्षीय दिपेश बस्नेत, लिखु– ७ की सानुमाया तामाङ, ३१ वर्षीया तारा तामाङ, ३६ वर्षीया भिमबहादुर तामाङ र १६ वर्षीया रमिता तामाङ प्रमुख जिल्ला अधिकारी श्यामकृष्ण थापाले बताउनु भयो । उहाँका अनुसार लिखु– ४ का २५ वर्षीय दिपेन्द्र बस्नेत, लिखु– ६ की ४५ वर्षीया मानकुमारी बरूवाल, उपाकुण्ड– ६ का २४ वर्षीय विशाल सुनुवार र सिन्धुली गोलन्जोर– ६ का ३४ वर्षीय शिव श्रेष्ठ रहेका छन् । करिब ५० वर्षीय पुरूषको पहिचान खुल्न बाँकी छ ।
माघ २७ गतेका दिन बिहान काठमाडौँबाट रामेछाप हुँदै ओखलढुंगातर्फ जाँदै गरेको बस तामाकोशी नदीमा खसेर दुर्घटना हुँदा उनीहरूको ज्यान गएको प्रमुख जिल्ला अधिकारी थापाले बताउनु भयो । उहाँका अनुसार घाइते ८ जनाको उपचार भइरहेको छ ।
आज बिहान १०ः४० बजे काठमाडौंबाट मन्थली–खुर्कोट पुष्पलाल मार्गमार्फत सिरिसे ढाँडे हुँदै ओखलढुंगा जाँदै गरेको बस दुर्घटनामा परेको थियो । अरनिको यातायातको प्र–३–००१–०५ ख ९९७५ नम्बरको बस त्रिवेणी घाटस्थित तामाकोशी नदीमा खसेको प्रमुख जिल्ला अधिकारी श्यामकृष्ण थापाले बताउनु भयो । उहाँका अनुसार ११ जनाको सनाखत भएको छ । उहाँले भन्नुभयो, ‘एक जनाको सनाखत गर्न बाँकी छ ।’
ज्यान गुमाएका १२ जनामध्ये ७ जना पुरूष र ५ जना महिला छन् । उनीहरूको शव मन्थली अस्पतालमा राखिएको प्रमुख जिल्ला अधिकारी थापाले जानकारी दिनु भयो ।
दुर्घटनामा आठ जना घाइते समेत छन् । तीमध्ये पाँच जना पुरूष र तीन जना महिला छन् ।
मन्थली– ११ का ३१ वर्षीय चालक सुशान्त थापामगरलाई प्रहरीले नियन्त्रणमा लिएको छ । उनी सामान्य घाइते छन् । घाइते सात जनालाई उपचारको लागि काठमाडौं पठाइएको प्रजिअ थापाले बताउनु भएको छ ।
सो बसमा काठमाडौंबाट चढेका थिए २० यात्रु चढेका थिए ।
बसका बाँकी यात्रुको अझै खोजतलास जारी रहेको प्रहरीले जनाएको छ ।
प्रकाशित मिति २०८२ माघ २७, मंगलवार २०:०४ गते
