पत्रकारिता तथा आमसञ्चारमा त्रिभुवन विश्वविद्यालयबाट स्नातकोत्तर गर्नु भएका उहाँलाई मिडिया नीतिका जानकार मानिन्छ ।
नवनियुक्त अध्यक्ष श्रेष्ठले सूचना तथा सञ्चारमन्त्री डा.विक्रम तिमिल्सिनाबाट आजै नियुक्तिपत्र ग्रहण गर्नु भएको छ । प्रेस काउन्सिललाई सरकार र सञ्चारमाध्यमबीच समन्वय गर्ने तथा सञ्चारमाध्यमहरूको नियमन गर्ने सरकारी निकायको रुपमा हेर्ने गरिएको छ ।
काठमाडौं– सरकारले प्रेस काउन्सिलको अध्यक्षमा पत्रकार उमेश श्रेष्ठलाई नियुक्त गरेको छ । सूचना तथा सञ्चार मन्त्रालयको सिफारिसमा मन्त्रिपरिषद् बैठकले काउन्सिलको रिक्त पदमा श्रेष्ठलाई यही असार २४ गते नियुक्तको निर्णय गरेको थियो । सोही आधारमा उहाँलाई असार २९ गते नियुक्त गरिएको हो ।
नवनियुक्त अध्यक्ष श्रेष्ठले सूचना तथा सञ्चारमन्त्री डा.विक्रम तिमिल्सिनाबाट आजै नियुक्तिपत्र ग्रहण गर्नु भएको छ । पत्रकारिता तथा आमसञ्चारमा त्रिभुवन विश्वविद्यालयबाट स्नातकोत्तर गर्नु भएका उहाँलाई मिडिया नीतिका जानकार मानिन्छ । अध्यक्ष श्रेष्ठ पछिल्ला वर्षहरूमा मिथ्या सूचनाहरूको तथ्यजाँच र प्रशिक्षकको काम गरिरहेका व्यक्तित्व हुनुहुन्छ । श्रेष्ठ हाल नेपाल फ्याक्टचेको सम्पादकका रुपमा कार्यरत हुनुहुन्थ्यो । उहाँले सिएमआर नेपाल जर्नालिजम एकेडेमीको प्रमुख प्रशिक्षकका रूपमा पत्रकारहरूलाई डिजिटल अनुसन्धान, डाटा पत्रकारिता, र एआईको प्रयोगबारे तालिम दिने काम समेत गर्दै आाउनु भएको थियो ।
यसअघि काउन्सिलको अध्यक्षमा वरिष्ठ अधिवक्ता कुमार शर्मा आचार्य हुनुहुन्थ्यो । सरकारले अध्यादेश जारी गरेसँगै उहाँ सहितका सबै पदाधिकारीहरू पदमुक्त भई पद रिक्त भएको थियो । श्रेष्ठलाई खुला प्रतिस्पर्धाबाट अध्यक्ष नियुक्त गरिएको हो ।
काउन्सिल अध्यक्षका लागि श्रेष्ठसहित १० जनाको नाम सर्ट लिस्टमा परेको सूचना तथा सञ्चार मन्त्रालयले जनाएको छ । मन्त्रालयका अनुसार केदारनाथ कोइराला, गोविन्द्रप्रसाद भण्डारी, जनक नेपाल, नुमाकान्त पौडेल, बालकृष्ण चापागाईं, भुवनप्रसाद आचार्य, रूद्रबहादुर खड्का, लेखनाथ न्यौपाने र शन्तराम बिडारीलाई पछि पार्दै श्रेष्ठ काउन्सिल अध्यक्ष बन्न सफल हुनु भएको हो ।
प्रेस काउन्सिललाई सरकार र सञ्चारमाध्यमबीच समन्वय गर्ने तथा सञ्चारमाध्यमहरूको नियमन गर्ने सरकारी निकायको रुपमा हेर्ने गरिएको छ ।
यसैगरी, नेपाल दूरसञ्चार प्राधिकरणको अध्यक्षमा अर्जुन घिमिरे नियुक्त भएका छन् । नवनियुक्त घिमिरिले पनि आजै सञ्चारमन्त्री तिमिल्सिनाबाट नियुक्तिपत्र ग्रहण गर्नु भएको छ ।
सञ्चारमन्त्री डा. तिमिल्सिनाले नियुक्तपत्र प्रदान गर्दै प्रतिस्पर्धात्मक प्रक्रियाबाट छनोट भई जिम्मेवारीमा आएका दुवै संस्थाका अध्यक्षप्रति उच्च अपेक्षा रहेको बताउनु भयो । उहाँले भन्नुभयो, ‘सिफारिस समितिले अन्य उम्मेदवारभन्दा न्यायपूर्ण, निष्पक्ष र परिणाममुखी ढङ्गले जिम्मेवारी निर्वाह गर्न सक्ने विश्वासका आधारमा उहाँहरूलाई छनोट गरेको हो ।’
प्रकाशित मिति २०८३ असार २९, सोमबार १८:३१ गते
