कृष्णभीर सडक : प्रशासनले बन्द गरेको यातायात सुचारु नहुँदै पूर्ण रूपमा अवरुद्ध

कृष्णभीर(धादिङ)– लगातारको वर्षापछि बिग्रदो मौसमी स्थितिलाई ध्यानमा राख्दै जिल्ला प्रशासन कार्यालय धादिङले बन्द गराएको कृष्ण भिर सडक यातायात सुचारु नहुँदै पूर्ण रूपमा अवरुद्ध भएको छ । गए राती आएको पहिरोका कारणले सो सडक असोज ९ गते अबरुद्ध भएको हो ।
अविरल वर्षाका कारण कृष्णभीरमा पहिरो खस्दा सडक पूर्ण रूपमा अवरुद्ध भएको छ । गए राति सडकमाथिबाट ठुला ढुङ्गा र चट्टानसहितको पहिरो खसेपछि आवागमन पूर्ण रूपमा ठप्प भएको धादिङ प्रहरीले पुष्टि गरेको छ ।
यही असोज १ गते मात्र दुईतर्फी सवारीसाधन सञ्चालनमा ल्याइएको सडक फेरि पहिरो खसेपछि पुनः अवरुद्ध बन्न पुगेको हो । धादिङ प्रशासनले हिजो राती ८ बजेदेखि आज विहान ५ बजेसम्मका लागि उक्त सडकमा सवारी साधनको आवतजावतमा रोक लगाएको थियो । तर आज विहान ५ नबज्दै गएको पहिरोले सो सडक खुल्न पाएन ।
गए राति सडकमाथिबाट ठुला ढुङ्गा र चट्टानसहितको पहिरो खसेपछि आवागमन पूर्ण रूपमा ठप्प भएको इलाका प्रहरी कार्यालय गजुरीले जनाएको छ । सो कार्यालयका अनुसार यसअघि गत भदौ १४ गते त्रिशूली नदीमा आएको बाढीले सडकको भित्ता कटान गर्दा कृष्णभीरमा भीषण पहिरो गएको थियो । पहिरो गएको स्थानभन्दा माथि २ सय ७० मिटर नयाँ ट्र्याक खोलेर ग्राभेल गरिएपछि गत असोज १ गतेदेखि मात्रै सडकमा दुईतर्फी सवारीसाधन सञ्चालनमा ल्याइएको थियो । तर, फेरि पहिरो खसेपछि सडक पुनः अवरुद्ध बन्न पुगेको हो ।
पहिरो गएको सो स्थानमा अझै ठूलो जोखिम कायम रहेकाले यात्रुलाई प्रहरीको नजर छलेर वा लुकीछिपी यात्रा नगर्न आग्रह गरिएको छ । पहिरोग्रस्त क्षेत्र पार गर्ने प्रयास ज्यानकै लागि खतरापूर्ण हुन सक्ने भन्दै सबैलाई सचेत गराइएको हो । सडक सञ्चालनबारे आधिकारिक सूचना नआएसम्म उक्त मार्ग भएर यात्रा नगर्न र सुरक्षाकर्मीको निर्देशन पालना गर्न धादिङ प्रशासनद्वारा अनुरोध गरिएको छ ।