काँग्रेसको मतदान अझै सुरु भएन : नाम फिर्ता लिनेको पनि मतपत्रबाट नाम हटेन

बेसीशहर(लमजुङ)– नेपाली काँग्रेसको १५ औं महाधिवेशनको क्रममा लमजुङमा आज हुने भनिएको मतदान ऐलेसम्म सुरु भएको छैन भने केही उम्मेदवारले नाम फिर्ता लिए पनि उनीहरूको नाम मतपत्रबाट नहटाइको भन्ने गुनासो आएको छ । यसअघिको सूचना अनुसार आज असोज १३ गते विहान ८ बजेदेखि जिल्ला समन्वय समितिको हलमा मतदान सुरु हुने भनिएको थियो । एक प्रतिनिधिले भने मतपत्र आएकै छैन रे ! सुरु हुन १२ बज्ने छाट छ ।
केन्द्रीय महाधिवेशन प्रतिनिधिका लागि मनोनयन दर्ता गरेका तर पछि फिर्ता लिन चाहना राखेर नाम फिर्ता गरिएको भनिए पनि मतदाता सूचिबाट भने नाम हटाइन, ‘बरु मतमत्र छाप्ने खर्च म दिन्छु, नाम फिर्ता लिएपछि किन राख्ने ? भनेको हुँदैन भने, यस्तै त हो राजनीति,’ जिल्ला सचिव समेत रहनु भएका विमल श्रेष्ठले बताउनु भयो ।
विमल श्रेष्ठले आफ्नो फेसबुक वालामा लेख्नु भएको छ, ‘नेपाली कांग्रेसको १५औं महाधिवेशन अन्तर्गत केन्द्रीय महाधिवेशन प्रतिनिधि खुल्लातर्फबाट म विमल श्रेष्ठले दिएको उम्मेदवारी पार्टी संगठन भित्र सहमति, सहकार्य र एकताबाट मात्रै संगठन दिगो, दरिलो र बलियो रहन्छ भन्ने मान्यता राख्दै सबै साथीहरूले मप्रति देखाउनु भएको साथ र मायाका लागि हार्दिक धन्यवाद व्यक्त गर्दै मैले दिएको उम्मेदवारी सहर्ष फिर्ता गरेको सबैमा जानकारी गराउँदछु ।’
त्यसरी नाम फिर्ता लिनेमा राइनास नगरपालिकाका निवर्तमान नगर सभापति श्रीकृष्ण पौडेल पनि हुनुहुन्छ । श्रेष्ठ र पौडेलले संयुक्त वक्तव्यमार्फत उम्मेदवारबाट नाम फिर्ता लिएको उल्लेख गर्नु भएको हो । सो पदमा अन्य पनि दुई जनाले नाम फिर्ता गरेको जानकारीमा आएको छ ।
काँग्रेसको विधान अनुसार केन्द्रीय महाधिवेशनका लागि ३३ जना महाधिवेशन प्रतिनिधि चयन हुने भएता पनि कुल ८९ जनाले मनोनयन दर्ता गरेका छन् । तर नाम फिर्ता लिन चाहनेहरूले समेत नाम फिर्ताको प्रक्रिया पुरा गरेर पनि मतपत्रमा भने नाम नहटेको स्थितिको सामना गरिरहेका छन् ।
मतदान कार्य ऐले बिहानको खाना खाएपछि सुरु हुने भनेर सबै खाना खान गएको तर मतदान हुने सयम यत्ति नै बजे भन्ने किटान अझै नभएको बताइएको छ ।
क्षेत्रीय सभापतिमा क क्षेत्रतर्फ विजय गुरुङ निर्विरोध भइसक्नु भएको छ भने अन्य पदमा पनि मतदान नहुने भएको छ । त्यस्तै, ख क्षेत्रतर्फ ३/३ जना प्रतिस्पर्धी हुनुहुन्छ । सभापति पदका प्रत्यासीमा अमृत न्यौपाने, ई. दिपेन्द्र रावल र राजेश थापा हुनुहुन्छ । त्यस्तै, सचिवमा रामजी कँडेल, शंकर न्यौपाने र शोभाकर बराल बीच प्रतिस्पर्धा हुँदैछ ।
सो क्षेत्रमा पनि उपसभापति तथा सहसचिव निर्विरोध भइसकेको छ ।
यो निर्वाचनमा जिल्लाभरबाट एक हजार ८०२ जनाले मतदानमा भाग लिदै छन् । त्यस्तै निर्वाचन क्षेत्र नं ‘ख’ मा मतदाता संख्या ९५५ रहेको छ ।