सहकारीको ठगी प्रकरण : अनुसन्धानमा एक महिना, ६५ करोड ७७ लाख रुपैयाँ बिगो असुल गर्नुपर्ने राय

काठमाडौं– ललितपुरको सातदोबाटो स्थित देउराली बहुउदेश्यीय सहकारी संस्थाको ठगी प्रकरणको अनुसन्धान कार्य झण्डै एक महिना लगाएर प्रहरीको केन्द्रीय अनुसन्धान ब्युरो (सीआईबी)ले सकेको छ । सीआईबीले फाइल जिल्ला सरकारी वकिल कार्यालय काठमाडौंमा मंसिर १० गते बुझाएको हो ।
सीआईबीले सो संस्थामा ६५ करोड ७७ लाख रुपैयाँ बिगो असुल गर्नुपर्ने राय सरकारी वकिल कार्यालयलाई दिएको छ । सीआईबीले त्यसका अध्यक्ष ३९ वर्षीय रविन्द्र चौलागाईंलाई गत कार्तिक १६ गते नियन्त्रणमा लिएर अनुसन्धान थालेको हो । बचतकर्ताले राखेको रकम फिर्ता नदिएको भन्दै सीआईबीमा उजुरी परेपछि उनीहरू पक्राउ परेका थिए ।
ललितपुरको सातदोबाटो र भक्तपुरको सूर्यविनायकमा रहेको देउराली सहकारीमा जम्मा गर्ने बचतकर्ताको रकम हिनामिना भएको प्रहरी अनुसन्धानमा खुलेको सीआईबीका एसएसपी दिनेश आचार्यले बताउनु भयो । उहाँका अनुसार क्रमशः सहकारीका प्रबन्धक दिपक केसी र राजेन्द्र खत्रीलाई समेत पक्राउ गरेको हो, यतिबेला तीनै जना प्रहरी कष्टडीमा छन् । तर सहकारी ठगी प्रकरणमा अध्यक्ष चौलागाईंसहित १५ जनामाथि ठगी मुद्दा चलाउनु पर्ने राय सीआईबीको छ ।
देउराली सहकारीका सञ्चालकविरुद्ध ५५३ उजुरी परेको एसएसपी आचार्यले जानकारी दिनुभयो । उहाँका अनुसार सोही उजुरीको आधारमा पक्राउ परेका अध्यक्षसहित आरोपीबाट ६५ करोड ७७ लाख रुपैयाँ बिगो असुल गर्नुपर्ने राय दिएको हो ।
उहाँले भन्नुभयो, ‘सहकारीमा जम्मा भएको कुल दुई अर्ब २० करोड ९२ लाख जोखिममा परेको छ ।’ सहकारीमा अर्बौ बचत भएपनि सबैले उजुरी नदिँदा बिगो ६६ करोड मात्रै माग दाबी गरिएको एसएसपी आचार्य बताउनु हुन्छ ।
सो सहकारीको ठगी प्रकरणबारे एक वर्ष अघिदेखि नै बचतकर्ता प्रहरी कार्यालय धाउन थालेका थिए । उनी सहकारीमा जम्मा गरेको बचतकर्ताको रकमले करिब तीन करोड रुपैयाँ पर्ने टोयटाको सेतो ल्याण्डक्रजुर प्राडोमा कालो सिसा लगाएर प्रहरीलाई छक्काउँदै भागिरहेका थिए । तर, त्यसदिन भने सीआईबीको टोलीले लाजिम्पाटबाट वाग्मती प्रदेश सी २३२९ नम्बरको सोही प्राडोसहित पक्राउ गरेको थियो ।
अध्यक्षको चलअचल सम्पत्ति सबै रोक्का गरिएको सीआईबीका एसएसपी आचार्यले जानकारी दिनु भयो । उहाँका अनुसार काभ्रेको देउराली गाउँपालिका– ६ का स्थायी बासिन्दा उनले करोडौँको उक्त गाडीबाहेक काठमाडौं, ललितपुर, भक्तपुर र काभ्रेमा गरेर १०० रोपनीभन्दा बढी जग्गा खरिद गरेको खुल्न आएको छ । अनुसन्धानको क्रममा प्रहरीले देउराली सहकारीको रकम ठगी गर्न उनले आफ्नै श्रीमतीको नाममा डमी कम्पनी समेत खोलेको खुल्न आएको छ ।
उनले सो सहकारी संस्था आफ्नै गाउँको नामबाट स्थापना गरेका थिए ।