काठमाडौं– कोरोनाको सन्त्रास फेरि बढ्न थालेको छ । कोरोनाको नयाँ सब भेरियन्ट जेएन. १ विश्वका ४१ देशमा फैलिसकेको विश्व स्वास्थ्य संगठन (डब्लूएचओ)का पुस ९ गते जनाएको हो ।
डिसेम्बर २३ सम्म ४१ देशमा जेएन.१ का केसहरू रेकर्ड गरिएको डब्लूएचओले जनाएको छ । अमेरिकामा पछिल्ला दिनहरूमा यही सब भेरियन्टका कारण कोरोना संक्रमित तीव्र बन्दै गएको त्यहाँका सञ्चारमाध्यमले जनाएका छन् ।
पछिल्लो दुई सातामा मात्रै संक्रमितको संख्या दोब्बरले थपिएको अमेरिकाको सेन्टर फर डिजिज कन्ट्रोल एन्ड प्रिभेन्सन (सीडीसी)ले जनाएको छ । उसका अनुसार जसमा ४४ प्रतिशत जेएन. १ बाट संक्रमित छन् ।
डिसेम्बरको पहिलो साता अमेरिकामा देखिएका कोरोना केसमध्ये १५ देखि २० प्रतिशतमा मात्रै जेएन. १ देखिएको सीडीसीको रिपोर्ट छ ।
भारतमा पछिल्लो २४ घण्टामा थप ६२८ जनामा कोरोना संक्रमण पुष्टि, एकको गयो ज्यान :
यसैबीच, छिमेकी मुलुक भारतमा पछिल्लो २४ घण्टामा थप ६२८ जनामा कोरोना संक्रमण पुष्टि भएको छ । जसमा जेएन. १ बाट संक्रमित ६३ जना रहेको भारतको स्वास्थ्य तथा परिवार कल्याण मन्त्रालयले पुष्टि गरेको छ । भारतमा हाल सक्रिय संक्रमितको संख्या चार हजार ५४ छ । पछिल्लो २४ घण्टामा संक्रमणका कारण केरलामा एकजनाको मृत्यु भएको छ ।
कोडिभ– १९ को सब– भेरियन्ट जेएन.१ का संक्रमित ६३ जना रहेको भारतीय सञ्चार माध्यमले उल्लेख गरेका छन् ।
भारतमा देखिएका संक्रमितहरूमा यसअघिका ओमिक्रोन र डेल्टाको संक्रमणमा देखिएजस्ता जटिल लक्षण नदेखिएको भारतीय सञ्चारमाध्यमहरूले जनाएका छन् । भारतमा हाल संक्रमण भएकाहरूमा ज्वरो, रुघाखोकी, घाँटी दुख्ने, टाउको दुख्नेजस्ता लक्षण नै देखिएको म्याक्स अस्पतालका वरिष्ठ कन्सल्टेन्ट डा. रजनीश श्रीवास्तवले द इकोनोमिक टाइम्ससँग बताएका छन् । यस्ता लक्षण ४ देखि ५ दिन देखिने र केही संक्रमितमा श्वासप्रश्वासमा समेत समस्या निम्त्याएको उनको भनाइ छ ।
कोरोनाको नयाँ सब भेरियन्टलाई डब्लूएचओले ‘भेरियन्ट अफ इन्ट्रेस्ट’को वर्गमा राखेको डब्लूएचओले जनाएको छ । उसका अनुसार नयाँ भेरियन्टबारेमा आफूले चासो राखेको तर तत्काल जनस्वास्थ्यमा उच्च जोखिम ननिम्त्याउने प्रकृतिका भाइरस प्रजातिहरूलाई ‘भेरियन्ट अफ इन्ट्रेस्ट’मा राख्ने गरेको छ ।
भारतमा कोभिड– १९ बाट हालसम्म संक्रमित हुनेको संख्या चार करोड ५० लाख ९ हजार २४८ रहेको छ । संक्रमितमध्ये चार करोड ४४ करोड ७१ हजार ८६० जना कोरोना जित्न सफल भइसकेका छन् । त्यस्तै, मृत्यु हुनेको संख्या पाँच लाख ३३ हजार ३३४ छ ।
के छ नेपालमा सतर्कता ?
जेएन.१ विश्वका ४१ देशमा फैलिएसँगै नेपलमा यसको जोखिमबारे चासो बढेको छ । नेपालले यसलाई हालसम्म हवाई यात्रा र स्थलगत सीमा हुँदै भारतबाट भित्रिनेहरूका लागि यात्राको कुनै थप मापदण्ड तोकेको छैन ।
स्वास्थ्य तथा जनसंख्या मन्त्रालयका प्रवक्ता डा. प्रकाश बुढाथोकीले नेपालको सीमाभन्दा टाढा केरला राज्यमा देखिएको संक्रमणबाट डराउन नपर्ने बताउनु भयो । उहाँका अनुसार अहिले जेएन.१ लाई लिएर आत्तिनुपर्ने अवस्था छैन । उहाँले भन्नुभयो, ‘हामीसँग भएका भौतिक पूर्वाधार र जनशक्ति तालिमप्राप्त भएकाले आत्तिहाल्नु पर्ने अवस्था छैन ।’
वरिष्ठ संक्रामक रोग विशेषज्ञ डा. शेरबहादुर पुनले यसअघिका अनुभवहरूलाई हेरेर नयाँ सब भेरियन्टको जोखिमलाई नजरअन्दाज गर्न भने नमिल्ने बताउनु भएको छ । उहाँका अनुसार विशेषगरी सीमा नाका र नयाँ लक्षण बोकेका व्यक्तिमा सरकारले निगरानी बढाउनुपर्छ ।
जिन सिक्वेन्सिङमा देखिएन जेएन. १ :
राष्ट्रिय जनस्वास्थ्य प्रयोगशाला (एनपीएचएल)ले पछिल्लोपटक संकलन गरिएका नमुनाहरूको जिन सिक्वेन्सिङ गर्दा जेएन.१ नदेखिएको एनपीएचएलले पुष्टि गरेको छ । एनपीएचएल निर्देशक डा. रञ्जनराज भट्टले १४ वटा नमुनाको जिन सिक्वेन्सिङ गर्दा भारतमा देखिएको जेएन.१ फेला नपरेको बताउनु भयो ।
उहाँले भन्नुभयो, ‘नयाँ सब भेरियन्टबारे चिन्तित नहुन तर यसअघिका संक्रमणका लहरहरूमा जस्तै व्यक्तिगत सुरक्षाका मापदण्ड भने अपनाउन अनुरोध छ ।’
प्रकाशित मिति २०८० पुष ९, सोमबार २०:०३ गते
