अपाङ्गता भएका व्यक्तिहरूलाई एक दिने कुखुरा पालन तालिम सहित चल्ला, दाना र विउँ पूँजी वितरण

बेसीशहर– लमजुङमा अपाङ्ग संरक्षण समाजले अपाङ्गता भएका व्यक्तिहरूलाई एक दिने कुखुरा पालन तालिम सहित चल्ला, दाना र विउँ पूँजी वितरण कार्य गरेको छ । बेसीशहर नगरपालिकाका मेयर गुमानसिंह अर्यालको प्रमुख आतिथ्यतामा एक कार्यक्रमको आयोजना गरी समाजले चैत ३० गते गरिएको हो ।
कार्यक्रमका सहभागीहरूलाई बेसीशहर नगरपालिका पशुपन्छी शाखाका डा. सन्दीप विष्टले कुखुरा पालनका बारेमा तालिम दिनु भएको थियो । सो अवसरमा ५१ जना सहभागी रहेको अपाङ्ग संरक्षण समाजका अध्यक्ष चन्द्रकान्त पौडेलले बताउनु भयो । उहाँका अनुसार तालिम पश्चात सहभागी भएका ३२ जनालाई प्रतिव्यक्ति २० वटाका दरले चल्ला तथा दाना साढे १२ केजीका दरले वितरण गरिएको थियो । उहाँले भन्नुभयो, ‘उक्त अवसरमा १३ जनालाई १० हजार रुपैयाँका दरले बीउ पूँजीसमेत वितरण गरिएको थियो ।’ उहाँले उक्त कार्यक्रम सामाजिक विकास कार्यालयको सहयोगमा गरिएको बताउनु भयो । 
सो वितरण कार्य बेसीशहर नगरपालिकाका मेयर गुमानसिंह अर्यालले गर्नु भएको हो । उहाँले अपाङ्गताका मुद्दामा आफू संवेदनशील भएको बताउँदै नगरपालिकाकै अपाङ्गता कार्यक्रममा जोड दिने गरेको उल्लेख गर्नु भयो ।
सो अवसरमा नेकपाको पोलिटब्यूरो सदस्य राजु थापाले महिला, बालबालिका तथा जेष्ठ नागरिकसँग सम्बन्धित मन्त्रालय आफ्नो दलको भागमा परेको हुँदा जिल्लामा अधिकत्तम कार्यक्रम ल्याउन पहल गर्ने प्रतिवद्धता व्यक्त गर्र्नुभयो । एमालेका जिल्ला सचिव सुभास पौडेलले आफूले अपाङ्गताका मुद्दामा धेरैपटक विभिन्न स्थानमा गएर छलफल र लविङका कार्य गरेको स्मरण गर्नु भयो ।
अपाङ्ग संरक्षण समाजका अध्यक्ष पौडेलको अध्यक्षतामा भएको कार्यक्रममा समाजका सचिव सीताराम बसेलले स्वागत तथा समाजका सल्लाहकार राजेन्द्र घिमिरेले सञ्चालन गर्नु भएको थियो ।