भोटओडार(लमजुङ)– बेसीशहर नगरपालिकाको ल्याण्डफिल्ड साइटमा खेल्ने क्रममा विद्युत प्राधिकरणबाट बेवारिसे छोडिएको विद्युतीय तारबाट करेण्ट लागेर एउटा हात गुमाएका छात्रले छात्रबृत्ति पाउने भएका छन् । जेष्ठ नागरिक समाज, भोटेओडार, लमजुङले राजशान्ति शैक्षिक छात्रवृत्ति पुरस्कार प्रदान गर्ने निर्णय जेठ ३ गते गरेको हो ।
बेसीशहरको बालमान्दिर आधारभूत विद्यालयमा कक्षा– ५ मा अध्ययनरत छात्र बुद्धिबहादुर तमाङले सो छात्रबृत्ति पाउने भएका हुन् । उनलाई जेष्ठ नागरिक समाज, भोटेओडार, लमजुङले राजशान्ति शैक्षिक छात्रवृत्ति पुरस्कार प्रदान गर्ने निर्णय गरेको भोटेओडार निवासी वरिष्ठ साहित्यकार गोविन्दबहादुर कुँवरले बताउनुभएको छ । उहाँका अनुसार समाजका नि. अध्यक्ष नारायणप्रसाद ढकालको अध्यक्षतामा बसेको समाजको बैठकले सो निर्णय गरेको हो । उहाँले भन्नुभयो, ‘समाजले उक्त छात्रवृत्तिबाट निजलाई कक्षा– १० सम्म पढिञ्जेल मासिक पाँच सय रुपैयाँ छात्रवृत्ति उपलब्ध गराइने छ ।’
सो छात्रवृत्ति संचालनका लागि राजशान्ति सुनार दम्पतिले ५० हजार रुपैयाँको अक्षय कोष राखी दिनु भएको समेत कुँवरले जानकारी दिनुभएको छ ।
निमुखा तामाङले अझै पनि क्षतिपूर्ति पाएका छैनन् :
यसैबीच, पहुँच नभएका नावालक बुद्धिबहादुर तमाङले उपचारसमेत राम्रोसँग पाउन नसकेको देखिन्छ । उनले अझै पनि विद्युतीय झड्काका कारण हात गुमाउँदा पनि पूर्णउपचार र त्यसको खर्च तथा क्षतिपूर्ति पाउन सकेका छैनन् । उनका बारेमा बोलिदिने कोही नभएका कारणले उनले क्षतिपूर्ति पाउन नसकेका ह्न् । २०७९ सालको बैशाख महिनामा उनलाई करेन्ट लागेर हात गुमाउनु परेको हो । उनको हातमात्र गुमेको छैन । त्योहात तर्फको शरिरको पुरै अंग जलेको छ, गोडासम्मै । उनी रातको समयमा समेत ‘दुख्यो ! भनेर कराउने गर्दछन् तर उपचार गर्ने पैसा छैन’ उनकी आमाको भनाइ छ ।
तामाङको सो परिवार बेसीशहर नगरपालिका– ८ को कर्पुरेश्वर महादेव मन्दिर नजिक मर्स्याङ्दी नदी किनारका अर्काको जग्गामा टहरो हालेर ज्याला मजदुरी गरी गुजारा गर्दै आएको छ । बुद्धिबहादुर तमाङको परिवारमा उनका पिता, आमा, एक एक जना दाजु, दिदी र भाइ छन् ।
प्रकाशित मिति २०८० जेष्ठ ४, बिहीबार ०६:५२ गते
