बेसीशहर– बास नेपाल लमजुङ शाखाले भ्रष्टाचार विरुद्ध खुल्ला सडक कविता वाचन कार्यक्रम जिल्ला सदरमुकाम बेसीशहरमा तयारी गरेको छ । शाखाको असार २६ गते यहाँ सम्पन्न भएको बैठकले सो निर्णय गरेको हो ।
भ्रष्टाचार विरुद्ध सडक कविता वाचन कार्यक्रम आउँदो साउन १३ गते शनिबारका दिन विहान ११ बजे भीमसेन स्थान चोकमा सञ्चालन गर्ने निर्णय गरिएको बास नेपाल लमजुङका सचिव रामजी बसौलाले बताउनु भयो । उहाँका अनुसार खुल्ला रुपमा आयोजना गरिने सडक कविता वाचन कार्यक्रम भाग लिनका लागि विभिन्न विद्यालय, क्याम्पस तथा अन्य संघसंस्थाहरूका साथै कविहरूले स्वतन्त्र रुपमा पनि कविता सुनाउन सक्नु हुने निर्णय गरिएको छ ।
त्यसैगरी, साउन २७ गतेका दिन ‘सुशासनमा युवाहरूको भूमिका’ विषयक खुल्ला वक्तृत्वकला प्रतियोगिता सञ्चालन गरिने भएको उहाँको भनाइ छ । त्यस्तै, आगामी भदौ ३० गते तीजका अवसरमा भ्रष्टाचार विरुद्ध तीज विशेष कार्यक्रम गरिने समेत निर्णय गरिएको सचिव बसौलाले जानकारी दिनु भएको छ ।
बास नेपाल लमजुङ शाखाका अध्यक्ष लक्ष्मी धितालको अध्यक्षतामा बसेको उक्त बैठकमा सल्लाहकारहरू नवराज पहाडी, रमाराज खनिया, कृष्ण केसी, कृष्णराज ओलिया लगायतका पदाधिकारीहरू सहभागी हुनुहुन्थ्यो ।
स्मरणीय छ, बास नेपाल ट्रान्सपरेन्सी इन्टरनेशनलसँग आवद्ध रहेको सुशासनका लागि पैरवी गर्ने संस्था हो । यस संस्थाका मुलुकका अधिकांश जिल्लामा शाखाहरू सञ्चालनमा आएका छन् ।
प्रकाशित मिति २०८० असार २७, बुधबार ०५:५५ गते
