काठमाडौं– काठमाडौं महानगरपालिकाका मेयर बालेन साहले चीन सरकारको निमन्त्रणामा लागि आज तय भएको पाँचदिने चीन भ्रमण स्थगित गर्नु भएको छ । मेयर साहले आफूहरूले लिपुलेक, लिम्पियाधुरा र कालापानीलाई समेटेर नयाँ चुच्चे नक्सा निकालेको बेवास्ता गर्दै चीनले नेपाललाई नै नसोधी ती भू–भाग भारतको भनी नक्शा निकालेका कारण आफूले भ्रमण स्थगित गरेका भदौ १४ गते जानकारी दिनु भएको हो ।
सामाजिक सञ्जाल फेसबुकमा मेयर बालेले चीनको सो कदमप्रति आपत्ति व्यक्त गर्नु भएको छ । नेपाली भू–भागलाई चीनले नेपाललाई नै नसोधी भारतको देखाउनु हाम्रो संवेदनशीलतामाथि चालेको गलत कदम हो बालेनले उल्लेख गर्नु भएको छ ।
उहाँले फेसबुकमा लेख्नु भएको छ, ‘हामी नेपालले २०७७ साल जेठ ७ मा लिपुलेक, लिम्पियाधुरा र कालापानीलाई समेटेर नयाँ चुच्चे नक्सा निकालेका थियौँ । केही दिन पहिले चीनको प्राकृतिक स्रोत मन्त्रालयले उक्त स्थानलाई हटाएर पहिलेको बुच्चे नक्सालाई कायम गरेर नेपालको नक्सा सार्वजनिक गरेको छ । नेपाली भू–भागलाई चीनले नेपाललाई नै नसोधी भारतको देखाउनु हाम्रो संवेदनशीलतामाथि चालेको गलत कदम मानेका छौँ । त्यसैले आज मेरो, चीनको निमन्त्रणामा हुँदै गरेको ५ दिने भ्रमण नैतिकताको आधारमा नजाने निर्णय गरेको छु ।’
नक्सा प्राकृतिक संसाधन मन्त्रालयको वेबसाइटमा सार्वजनिक गरिएको हो । चीनले अरुणाचल प्रदेशको ९० हजार वर्गकिलोमिटर जमिन आफ्नो भएको दाबी गर्दै आएको छ । त्यसै सन्दर्भमा चीनले भदौ ११ गते मात्रै भारतको अरुणाचल प्रदेशलाई समेटेर नयाँ नक्सा सार्वजनिक गरेको थियो । चीनले उक्त नयाँ नक्सालाई ‘२०२३ को चीनको स्टान्डर्ड नक्सा’ बताएको छ ।
उता, भारतले चीनले पश्चिमी क्षेत्रमा करिब ३८ हजार वर्गकिलोमिटर क्षेत्रमा अवैधानिक रूपमा कब्जा जमाएको दावी गर्दै आएको छ ।
दुई देशबीच सीमा क्षेत्रलाईलाई लिएर बेलाबेलामा विवाद हुँदै आइहेको छ ।
यसअघि, दक्षिण अफ्रिकामा सम्पन्न भएको ब्रिक्स शिखर सम्मेलनका क्रममा भारतीय प्रधानमन्त्री नरेन्द्र मोदी र चिनियाँ राष्ट्रपति सी चिनफिङबीच सीमा विवादबारे छलफल भएको बताइएको थियो ।
प्रकाशित मिति २०८० भाद्र १४, बिहीबार १९:१६ गते
