बेसीशहर– राष्ट्रिय स्वतन्त्र पार्टीले संगठन विस्तारको अभियान सञ्चालन गरिरहेको छ । सोही क्रममा बेसीशहर नगरपालिका– ११ को चिति, तिलाहारमा वडास्तरीय भेला र राइनास नगरपालिकाको धमिलिकुवामा आमसभाको तयारी गरिएको छ ।
बेसीशहर नगरपालिका– ११ मा हुने वडास्तरीय भेला यही भदौ ३० गते शनिबार हुुने भएको छ । सो भेलामा राष्ट्रिय स्वतन्त्र पार्टीको संसदीय दलका प्रमुख सचेतक माननीय सांसद सन्तोष परियारको समुपस्थिति रहने भएको रास्वपा बेसीशहर नगर समितिले जनाएको छ । सो वडा भेलामा परियारका साथमा जिल्ला संयोजक धर्म केसी, सहसंयोजक अशोक पासकोटा सहित रास्वपाका जिल्लास्तरका नेताहरूको समेत सहभागिता रहने छ ।
उक्त अवसरमा वडा भेलाका साथमा वडा समिति गठन गर्ने कार्यक्रम रहेको रास्वपाको बेसीशहर नगर समितिले जनाएको छ । सो समितिका अनुसार उक्त कार्यक्रममा विशेषतः चितिबासी रास्वपा समर्थक तथा सो दलमा सद्भाव राख्नुहुने सम्पूर्ण बा आमा दाजु भाइ तथा दिदी बहिनीहरूलाई उपस्थितिको लागि अनुरोध गरिएको छ ।
पार्टी सभापति रवि, सांसदद्वय स्वर्णिम वाग्ले र तोसिमा कार्की सहभागी हुने ;
यसैगरी, राइनास नगरपालिका– ७ को धमिलिकुवामा आयोजना हुने आमसभामा राष्ट्रिय स्वतन्त्र पार्टीका पार्टी सभापति रवि लामिछाने, सो दलका सांसदद्वय स्वर्णिम वाग्ले र तोसिमा कार्कीले उक्त सभालाई सम्बोधन गर्न सहभागी हुँदै हुनुहुन्छ ।
उहाँहरू गोर्खाका दुई कार्यक्रम भ्याएर ३ः३० बजे धमिलिकुवा आइपुग्ने कार्यक्रम रहेको सो दलको जिल्ला समितिले बताएको छ ।
प्रकाशित मिति २०८० भाद्र २६, मंगलवार २०:२८ गते
