काठमाडौं– प्रधानमन्त्री केपी शर्मा ओलीले संयुक्त राष्ट्रसंघको महासभा भैँसी लिन गएर दूध ल्याए जस्तो नभएको टिप्पणी गर्नु भएकोछ । अमेरिका भ्रमणबाट फर्किएपछि त्रिभुवन अन्तर्राष्ट्रिय विमानस्थलमा राष्ट्रसंघको भ्रमणले के अर्थ राख्छ भन्ने प्रश्नको जवाफका क्रममा उहाँले असोज १४गते त्यस्तो टिप्पणी गर्नु भएको हो ।
‘कुनै भैँसी लिन गएर दूध लिएर आएँ भने जस्तो होइन । हाम्रा समस्या, विचारहरू त्यहाँ राख्न गएको हो, राखियो ।’ संयुक्त राष्ट्रसंघमा तपाईंको सम्बोधनले मुलुकलाई के अर्थ राख्छ ? भन्ने पत्रकारको जवाफमा प्रधानमन्त्री ओलीले त्यस्तो जवाफ दिदै भन्नुभयो, ‘म कुनै भैंसी दुहुन गएर दूध लिएर आएँ भनेजस्तो होइन, हाम्रा विचार, समस्याहरू त्यहाँ राख्न गएको हो, राखियो । यी समस्याहरू एउटा देशका मात्र होइन, सबैका हुन्, सबै देश मिलेर समाधान गर्नुपर्छ भन्ने भयो । अल्पविकसित देशहरूले क्षति र मार सहनु परेको छ, त्यसमा विश्व समुदायको ध्यान जानुपर्छ ।
विपद्का बेला सरकारको भूमिका देखिएन भन्ने छ, के भन्नुहुन्छ ? भन्ने प्रश्नको जवाफमा प्रधानमन्त्री ओलीः विरोधका लागि विरोध होला । सरकारले गर्नेसम्मको प्रयास ग¥यो । तत्काल बैठक गरेर सेना, प्रहरी परिचालन गरेर उद्धार ग¥यो । अब बाढी आउने कुरालाई त रोक्न सकिँदैनथ्यो । पूर्वसूचना गरेर पहिरो जाँदैन । उद्धार गर्ने र राहत पु¥याउने हो । पहिरो गएपछि क्षति पु¥याउने नै भयो । त्यसमा सरकारले तदारूकताका साथ उद्धार कार्य र राहत कार्य पु¥याउने हो, त्यो पुर्याएको छ भन्ने मलाई लाग्छ । मैले बाहिरै हुँदा पनि यस विषयमा जानकारी लिँदै र निर्देशन गर्दै आएको छु । विरोधका लागि विरोध गर्ने होइन ।
उहाँले विपदको संवेदनशील बेलामा विरोध गरेर परिस्थिति झन् बिगार्न खोजिएको भन्दै असन्तुष्टि व्यक्त गर्नु भएको थियो । प्रधानमन्त्री ओलीले भने, ‘संवेदनशील बेलामा विरोधका लागि विरोध नगरौं, सरकार छ । यसले परिस्थिति सम्हाल्छ । गरिरहेको पनि छ ।’
मेयर बालेन शाहले खोला किनारामा संरचना बनाउँदा डुबान भयो भन्दै आएका छन्, के बालेनका कुरा ठिक हो भनेर नागरिकले बुझ्नुपर्ने हो ? भन्ने पत्रकारको प्रश्नमा प्रधानमन्त्री ओलीले ‘हा हा ! राम्रो प्रश्न, धन्यवाद ।’ भन्दै उडाउनु भएको थियो ।
सो अवसरमा पत्रकार सम्मेलनपछि जारी प्रेस वक्तव्यमा विपद्का मृतकप्रति श्रद्धान्जली व्यक्त गर्दै घाइतेको स्वास्थ्यलाभ कामना गरिएको छ । उहाँले सरकारी निकाय र जनस्तरबाट उद्धार कार्य जारी रहेको भन्दै धैर्य गर्न आग्रह साथ सरकारले सहायता र राहतमा कसर बाँकी नराख्ने प्रतिबद्धता पनि जनाउनु भएको छ ।
वक्तव्यमा ओलीले १० दिने भ्रमण क्रममा गरेका भेटवार्ता र तिनको उपलब्धिबारे समेत प्रकाश पारिएको छ ।
प्रधानमन्त्री ओलीले विमानस्थलको अतिविशिष्ट कक्षमा पत्रकार सम्मेलन अघि परराष्ट्र मन्त्रालयका प्रवक्ता सहसचिव अमृत राईले प्रधानमन्त्री ओलीले संयुक्त राष्ट्रसंघलगायतमा गरेको सम्बोधन र त्यस क्रममा भएका भेटवार्ताहरू लगायतबारे पत्रकारहरूलाई ब्रिफिङ गर्नु भएको थियो ।
संयुक्त राष्ट्रसंघको ७९ औं महासभामा भाग लिन जानु भएका प्रधानमन्त्री ओलीले संघको महासभालाई असोज १० गते सम्बोधन गर्नु भएको थियो । सो सम्बोधनका क्रममा उहाँले ‘शान्ति प्रक्रियाका बाँकी काम छिट्टै सक्न नेपाल प्रतिबद्ध छ’ भन्नु भएको थियो ।
महासभामा सम्बोधन गर्नुअघि र पछि प्रधानमन्त्री ओलीले विभिन्न देशका सरकार प्रमुखहरूसँग भेटवार्ता समेत गर्नु भएको थियो ।
प्रधानमन्त्री ओली अमेरिकामै रहँदा नेपालमा अविरल वर्षा भयो र जनधनमा क्षति पुर्यायो । स्वदेशमा विपद आइलागेका बेला प्रधानमन्त्री ओली कार्यक्रम छोट्याएर स्वदेश नफर्केकोमा पनि आलोचना भइरहेको थियो ।
प्रधानमन्त्री ओली पूर्वनिर्धारित कार्यक्रमअनुसार नै आज अपराह्न स्वदेश फर्किनु भएको हो । त्रिभुवन अन्तर्राष्ट्रिय विमानस्थलमा उहाँलाई स्वागत गर्न सभामुख देवराज घिमिरे, राष्ट्रिय सभाका अध्यक्ष नारायणप्रसाद दाहाल, उपप्रधानमन्त्री प्रकाशमान सिंहलगायत उच्च पदस्थ अधिकारीहरूसमेत पुगेका थिए ।
प्रधानमन्त्री फर्किंदा विमानस्थल भद्रगोल, आधा घण्टा उडान प्रभावित :
यसैबीच, अमेरिका भ्रमण सकेर प्रधानमन्त्री केपी शर्मा ओली नेपाल अवतरणका बेला आधा घण्टा नियमित उडान पूर्णरूपमा प्रभावित भयो । जसले विमानस्थलको उडान व्यवस्थापन अझ भद्रगोल बनेको छ । दिउँसो ३ः५५ बाट आघा घण्टाका लागि ‘भीभीआईपी मुभमेन्ट’ भन्दै ‘नोटिस फर एयर मेन’ (नोटाम) जारी भएको विमानस्थल स्रोतले जनाएको छ ।
नोटाम जारी भएको समयमा आन्तरिक विमानस्थलमा रहेका जहाज र अन्तर्राष्ट्रिय जहाजलाई यहाँबाट उड्न दिइएको थिएन अवतरण गर्न आइरहेका जहाजलाई भने ‘होल्ड’ गराइएको छ ।
आज बिहानैबाट त्रिभुवन विमानस्थलमा उडान व्यवस्थापनमा चाप भएको थियो । जसले गर्दा निर्धारित उडानहरू नै एक घण्टासम्म ‘डिले’ भइरहेका थिए । त्यसमाथि प्रधानमन्त्रीको सवारीले उडान अझ प्रभावित बनेका हुन् ।
प्रकाशित मिति २०८१ आश्विन १४, सोमबार १९:०४ गते
