पाँच जना साधकलाई नइ पुरस्कार– २०८० का लागि छनौट

काठमाडौँ— नेपाली भाषा साहित्यको श्रीबृद्धिका लागि निजीक्षेत्रबाट योगदान गर्ने मुलुककै सर्वश्रेष्ठ संस्था नइ प्रकाशनले विविध क्षेत्रमा समर्पित राष्ट्रिय जीवनका पाँच जना साधकलाई २०८० सालको ‘नइ पुरस्कार’ समर्पण गर्ने निर्णय गरेको छ । सम्मानित हुनेहरूमा कृष्णप्रसाद वस्याल पाल्पा, ठाकुर शर्मा भण्डारी काठमाडौं, धनकुटे कान्छा झापा, तेस्रो लिङ्गी रजनी थकाली पोखरा र सुश्री मनीषा राजबंशी झापालाई माघ १३ गते छनौट गर्ने निर्णय गरिएको हो ।
कृष्णप्रसाद वस्याल पाल्पालाई ‘नइ देरुनीख प्रदीप्ति पुरस्कार’ समर्पण गरिने भएको छ । उहाँले साढे छ दशकदेखि नेपाली भाषासाहित्यको श्रीवृद्धिका लागि समर्पित रही कविता र निबन्धको सिर्जनाका साथै अनुवाद र सम्पादनमा समेत विशेष योगदान गरेको पुरस्कार समर्पण गरिएको हो । सो पुरस्कारको राशि साठी हजार रुपैयाँ राशि रहेको छ ।
साहित्यकार ठाकुर शर्मा भण्डारीलाई ‘नइ कपिल शोध पुरस्कार’ समर्पण गरिने भएको छ । उहाँले ‘नइ कीर्ति विवेचना’नामक कृतिमार्फत नइ प्रकाशनको कीर्ति, गरिमा र महिमाको अभिवृद्धिका लागि योगदान गर्नु भएको हुँदा सो पुरस्कारका लागि योग्य ठानिएको नइ प्रकाशनले जनाएको छ ।
यसैगरी, धनकुटे कान्छा झापालाई ‘नइ देरुनीख गौरव पुरस्कार’ समर्पण गरिने भएको नइ प्रकाशनका सदस्यसचिव नरेन्द्रराज प्रसाईले बताउनु भयो । उहाँका अनुसार काठमाडौँ उपत्यकाबाहिर रहेर नेपाली भाषासाहित्यको सिर्जना र सङ्गठनको संवर्धनमा समर्पित हुँदै शिक्षा सेवामा समेत योगदान पुर्याउनु भएको हुँदा उहाँलाई सम्मान गर्नु भएको हो ।
तेस्रो लिङ्गी रजनी थकाली पोखरालाई ‘नइ रामलक्ष्मी पुरस्कार’ समर्पण गर्ने निर्णय भएको छ । उहाँले यौनिक तथा लैङ्गिक अल्पसङ्ख्यक व्यक्तिहरूको हित, मर्यादा र सङ्गठनमा क्रियाशील र समर्पित रही देशदेशान्तरमा समेत उल्लेखनीय योगदान पुर्याएको हुँदा उहाँलाई सो पुरस्कार समर्पण गरिने भएको नइ प्रकाशनले जनाको छ ।
यी तीनओटा पुरस्कारका राशि जनही पचास÷पचास हजार रुपैयाँका दरले रहेको नइ प्रकाशनका सदस्यसचिव नरेन्द्रराज प्रसाईले उल्लेख गर्नु भयो ।
यस्तै, सुश्री मनीषा राजबंशी झापालाई ‘नइ देरुनीख पौरख पुरस्कार’ समर्पण गरिने भएको छ । उहाँले थाइल्यान्डमा सम्पन्न विश्वका चवालीस राष्ट्रका आदिवासी किशोरीको अन्तर्राष्ट्रिय सौन्दर्य प्रतियोगितामा मिस हेरिटेज पेटाइट युनिभर्सबाट सर्वोत्कृष्ट घोषित भई नेपालको प्रतिष्ठा बढाए बापत सो पुरस्कार समर्पण गरिने भएको हो । उक्त पुरस्कारको राशि पच्चीस हजार रुपैयाँ रहेको नइ प्रकाशनका सदस्यसचिव नरेन्द्रराज प्रसाईले जानकारी दिनु भयो ।
उहाँका अनुसार नइ प्रकाशनका कुलपति श्रीमती इन्दिरा प्रसाईको अध्यक्षतामा बसेको नइ प्रकाशनको बैठकले उक्त निर्णय गरेको हो ।