लालीगुराँस आवासीय बोर्डिङ स्कूलमा गुञ्जियो ठाडोभाका : तिहारको शुभकामना आदानप्रदानसहितका कार्यक्रमको फोटो फिचरसमेत

फेदीकुना(लमजुङ)– लालीगुराँस बोर्डिङ स्कूलमा लमजुङको पहिचान र गौरवका रुपमा रहेको ठाडोभाका गुञ्जिएको छ । भोलि कार्तिक १ गतेदेखि सुरु भइरहेको तिहार पर्वको पावन अवसरमा शुभकामना आदानप्रदानसहित सो कार्यक्रम विद्यालय प्रांगणमा असोज ३१ गते गरिएको हो ।
लमजुङको सुन्दरबजार नगरपालिका– ९ को फेदीकुना स्थित लालीगुराँस आवासीय बोर्डिङ स्कूलको आयोजना तथा ठाडोभाका लोककला प्रतिष्ठान नेपालको प्राविधिक सहयोगमा उक्त कार्यक्रम गरिएको हो । लालीगुराँस आवासीय बोर्डिङ स्कूलका संस्थापक एवम् व्यवस्थापन समितिका अध्यक्ष रामजी कँडेलको अध्यक्षतामा भएको कार्यक्रममा प्रतिष्ठानका संरक्षक एवम् ठाडोभाका महानायक बुद्धिमान दुरा ‘धम्पु’ एवम् प्रतिष्ठानका अध्यक्ष नवराज पहाडीको विशेष उपस्थिति रहेको थियो ।
सो अवसरमा लालीगुराँस आवासीय बोर्डिङ स्कूलका संस्थापक कँडेलले कालाकार टिमलाई स्वागत गर्नु भएको थियो । उहाँले नयाँ पुस्तामा ठाडोभाकाका बारेमा जानकारी दिने उद्देश्यले यो कार्यक्रम राखिएको बताउनु भयो । उहाँले आज असोज महिनाको अन्तिम शुक्रबार विद्यालयमा विदा दिने प्रचलन भएपछि तिहार भित्रदै गरेको यहीबेलामा संयोगले ठाडोभाकाको समेत कार्यक्रम जुर्यो र संयुक्त रुपमा यो कार्यक्रमको आयोजना गरिएको हो भन्नुभयो । उहाँले कार्यक्रममा सहभागी हुन आएका कलाकार टोली तथा कार्यक्रमको शोभा बढाउन आउने अभिभावक वर्ग तथा स्कूलका शुभचिन्तकहरूलाई स्वागत गर्नु भएको थियो ।
विद्यालयका छात्राहरूको स्वागत नृत्य पछि सुरु भएको ठाडोभाका सहितको सांगीतिक कार्यक्रममा मिश्रित रुपमा ठाडोभाकाको प्रस्तुति र स्कूलका छात्रछात्राहरूले तयार गरेको तिहार स्पेशल नाच प्रदर्शन गरिएको थियो ।
ठाडोभाकाको प्रस्तुतिमा स्कूलका छात्रछात्राहरूले नाचेर अभिभावक तथा शिक्षकहरूले गीत छोपेर साथ दिनु भएको थियो । केही शिक्षिकाले ठाडोभाकामा नाच्ने अभ्यास समेत गर्नु भएको थियो । ठाडोभाकाको नाचको प्रतिष्ठानका संरक्षक एवम् ठाडोभाका महानायक बुद्धिमान दुरा ‘धम्पु’ले अभ्यास गराउनु भएको थियो । उहाँले कार्यक्रमस्थलमा निर्माण गरिएको रङ्गेलीको चर्चा गर्र्दै सुरुमा भैलो गाउनु भएको थियो भने छात्रछात्राहरूलाई बाबु– आमाप्रति कृतज्ञ हुनुपर्ने भावनाले ओतप्रोत भएको आफ्नै रचना, स्वर र संगीतको गीत गाउँदै छात्रछात्राहरूलाई छोप्न लगाउनु भएको थियो ।
यसैगरी, प्रतिष्ठानका अध्यक्ष नवराज पहाडीले ठाडोभाकाका बारेमा प्रकाश पार्दै यसको उत्पत्ती के कसरी उत्पत्ती भयो र कसरी लोपोन्मुख अवस्थामा पुगेको थियो ? यसलाई लोप हुन दिनु हुँदैन भन्ने उद्देश्यले २०७२ सालमा प्रतिष्ठानको स्थापना गरेका हौं भन्नुभयो । उहाँले ठाडोभाकाको संरक्षण र प्रवद्र्धनका लागि प्रतिष्ठानले यस्ता प्रस्तुतिका कार्यक्रमका अतिरिक्त प्रशिक्षण, प्रतियोगिता, छायांकनका कार्यहरू गर्र्दै आएको जानकारी दिनुभयो । उहाँले प्रतिष्ठान गैरनाफामूलक संस्था भएका कारणले बजेटको अभावका कारणले गर्दा इच्छाएको जति कार्य गर्न नसकेको, कला, साहित्य, संस्कृतिमा गरिने लगानीको प्रतिफल भौतिक निर्माणझैं बाटोघाटो, खानेपानी धारा, स्कूल भवन आदि बनाएको जस्तो तत्कालै नदेखिने हुँदा पनि कतिपय नीति निर्मातामा यो अनुत्पादक क्षेत्र हो र लगानी गर्न हुन्न भन्ने भ्रम छ । तर संगीतले मानिसलाई मनोरञ्जन दिई खुशी बन्न, बनाउन भूमिका खेल्ने भएको हुँदा यो समाज, परिवार र जन–जनका लागि अपरिहार्य छ भन्ने उल्लेख गर्नु भयो । उहाँले लालीगुराँस आवासीय बोर्डिङ स्कूलका संस्थापक कँडेल सरजस्ता मनकारी व्यक्तित्वहरूको माया, ममता, सद्भाव र सहयोगले यो संस्थाले विभिन्न कार्य गरिआएको छ भन्ने जानकारी दिनुहुँदै आज यो कार्यक्रममा सहभागी हुन अवसर दिनु हुने लालीगुराँस आवासीय बोर्डिङ स्कूलका संस्थापक कँडेललगायत विद्यालय परिवारप्रति आफ्नो प्रतिष्ठान र आफू आभारी छौं भन्नुभयो ।
सो अवसरमा ठाडोभाका महानायक धम्पुले सञ्चालन गरेको सो कार्यक्रममा उहाँका गायन जोडी एवम् प्रतिष्ठानका उपाध्यक्ष सीतादेवी दुरा र हरि रानाभाट, आयोजक लालीगुराँस आवासीय बोर्डिङ स्कूलका ७७ वर्षीय अभिभावक पदमबहादुर भुजेल र रमाना भण्डारी, अमरध्वज गुरुङ र मीना गुरुङ, आशबहादुर विक र देउकुमारी गुरुङ, अमरध्वज गुरुङ र भुन्टीमाया तामाङको जोडीले ठाडोभाका प्रस्तुत गर्नु भएको थियो ।
उक्त अवसरमा धम्पु तथा पृथ्वीराज गुरुङ र लोकगायिका समिक्षाले सुगम दोहोरी गाउनु भएको थियो ।
सो अवसरमा प्रतिष्ठानका कार्यकारी सदस्य कृष्ण केसी लगायतको सहभागिता रहेको सो कार्यक्रममा कार्यकारी सदस्य देवराज गुरुङ, अमरध्वज गुरुङ तथा आश विकले बाध्यवादनमा सहयोग गर्नु भएको थियो । त्यस्तै, कोषाध्यक्ष सीता गुरुङ तथा नृत्यांगना पानमाया गुरुङले नाचेर साथ दिनु भएको थियो । उक्त कार्यक्रममा तथा सामाजिक व्यक्तित्व सिर्जना अधिकारीका अतिरिक्त प्रतिष्ठानको निमन्त्रणामा ग्रामीण पर्यटन तथा सांस्कृतिक अभियन्ता गीता अधिकारी पाण्डेको समेत समुपस्थिति रहेको थियो । प्रस्तुत छ, उक्त कार्यक्रमको फोटो फिचरसमेत :