सर्वोदय मा.वि.को ७४औं वार्षिकोत्सव तथा ५५ औं अभिभावक दिवस सप्ताहव्यापी रुपमा विविध कार्यक्रमका साथ मनाइयो

दुराडाँडा– लमजुङको ऐतिहासिक थलो यहाँ स्थित सर्वोदय माध्यमिक विद्यालयको ७४ औं वार्षिकोत्सव समारोह एवम् ५५औं अभिभावक दिवस विविध कार्यक्रमका साथ भव्य रुपमा सुसम्पन्न भएको छ । दिवसको मूल कार्यक्रम सुन्दरवजार नगरपालिकाका नगरप्रमुख कृष्णप्रसाद कोइरालाको प्रमुख आतिथ्यतामा साप्ताहिकमा कार्तिक २० गते सम्पन्न भएको हो ।
प्रमुख अतिथि सुन्दरवजार नगरपालिकाका नगरप्रमुख कृष्णप्रसाद कोइरालाले पानसमा दीप प्रज्ज्वलनका साथ बिष्णुभक्त पौडेलको शालिकमा माल्यार्पण गरी कार्यक्रमको समुदघाटन भएको थियो । उक्त कार्यक्रममा विद्यालयका प्रधानाध्यापक कृष्णप्रसाद पोखरेलद्वारा विद्यालयको वार्षिक प्रगति प्रतिवेदनसँगै विद्यालयको भावी योजना प्रस्तुत गरिएको थियो ।
उक्त अवसरमा विद्यार्थीहरूको विभिन्न सांस्कृतिक नृत्य, जनचेतनामूलक अभिनय र लाखेनाच समेत प्रस्तुत गरिएको थियो । विद्यालयको शैक्षिक उन्नयनमा योगदान पुर्याउनु हुने अक्षयकोषदाता सम्मान, वर्ष उत्कृष्ट शिक्षक तथा अभिभावक सम्मान, एवम् पञ्चेबाजाको साथमा दोहोरी र आकर्षक नृत्य प्रस्तुतीले कार्यक्रमलाई थप आकर्षक, रोचक एवम् मनोरञ्जनात्मक बनाएको थियो । यसै कार्यक्रमको अवसरमा विद्यालयका उपजहरूबाट कक्षा १ देखि १० सम्मका विद्यार्थीहरूका लागि ट्रयाक सुट र टोपी हस्तान्तरण गर्नुभएको थियो । उक्त समारोहमा विद्यालयको चौतर्फी विकासका विभिन्न शीर्षकका अक्षयकोषमा करिब १४ लाख रुपैयाँ रकम जम्मा भएको विद्यालयका प्रधानाध्यापक कृष्णप्रसाद पोखरेलले जानकारी दिनुभयो ।
सो अवसरमा सर्वोदय रनिङशिल्ड अन्तर्गत म्याराथुन छात्र छात्रा, राष्ट्रिय व्यक्तित्व पहिचान, निबन्ध लेखन, हिसाब दौड र सामान चिन्ने खेल सम्पन्न भएका थिए । यसैगरी, शिक्षक अभिभावक मैत्रीपूर्ण भलिबल र अभिभावक म्युजीकल चियर पनि गरिएको थियो ।
मुख्य कार्यक्रममा नेपाल सरकारका पूर्व सचिव एवम् लोकसेवा आयोग बागमती प्रदेश पूर्व अध्यक्ष सुरेशमान श्रेष्ठ, वरिष्ठ इन्जीनीयर अर्जुनभक्त पौडेल, वरिष्ठ इन्जीनीयर कृष्ण राना आदि विशिष्ट अतिथि हुनुहुन्थ्यो । कार्यक्रममा विभिन्न राजनैतीक दल, जग्गादाता, अक्षयकोषदाता, विभिन्न विद्यालयका प्र.अ., चन्दादाता, जनप्रतिनिधिहरू, सामाजिक संघसंस्थाका प्रतिनिधि,  सोही वडाका अध्यक्ष एवम् सो माविका व्यवस्थापन समितिका पूर्वअध्यक्ष अमृत न्यौपानेलगायतले शुभकामना मन्तव्य दिएका थिए ।
वरिष्ठ लोक स्वर सम्राट गायक राजु परिवार र लोक गायिका लुमा के.सी.को विशेष प्रस्तुतीले कार्यक्रम थप आकर्षक र मनोरञ्जनात्मक बनाएको थियो ।
विद्यालय व्यवस्थापन समितिका अध्यक्ष नारायणवहादुर के.सी.को अध्यक्षतामा भएको उक्त कार्यक्रममा स्वागत मन्तव्य विद्यालय व्यवस्थापन समितिका सदस्य जगन्नाथ न्यौपानेले गर्नुभएको थियो भने सञ्चालन शिक्षक पशुपति नेउपानेले गर्नुभएको थियो ।