मतगणनाका लागि ‘मिडिया डेक्स कक्ष’ र गणना स्थलको तयारी पुरा

लमजुङ । आमनिर्वाचन २०८२ को मत गणनाका लागि समाचार प्रवाहमा सञ्चारकर्मीको सहजताका लागि ‘मिडिया डेक्स कक्ष’को स्थापना गरिएको छ । जिल्ला सदरमुकाम बेसीशहर स्थित जिल्ला समन्वय समितिको सभाहलमा मतगणनास्थलका लागि सिसिटिभी क्यामरा जडानका साथ तार जाली लगाई व्यवस्थित गर्ने कार्य बुधबार पुरा भएको हो ।
मतगणनाको समाचार संकलन, लेखनका लागि जिल्ला स्थित सबै पत्रकारहरूको सुविधाका लागि ‘मिडिया डेक्स कक्ष’ स्थापना गरिएको छ । जिल्ला समन्वय समितिको बैठक कक्षलाई सो प्रयोजनका लागि सो कक्षको एक कार्यक्रमका बीच जिल्ला न्यायाधीश एवम् जिल्ला मुख्य निर्वाचन अधिकृत शिशिरराज ढकालले उदघाटन गर्नु भयो । सो अवसरमा पत्रकारसँग अन्तरक्रिया समेत गरिएको थियो ।
अन्तरक्रियाका क्रममा निर्वाचन आचारसंहिता, पत्रकारले पालना गर्नु पर्ने आचारसंहित लगायतका विषयमा छलफल भएको थियो । पत्रकारहरूका जिज्ञासाका बारेमा जिल्ला न्यायाधीश एवम् जिल्ला मुख्य निर्वाचन अधिकृत शिशिरराज ढकालका साथै प्रमुख जिल्ला अधिकारी कृष्णप्रसाद खनालले जवाफ दिनु भएको थियो । त्यस्तै परिचय पत्र भएका पत्रकारहरूका लागि सवारी साधनको पास नचाहिने बारेमासमेत प्रष्ट्याउने काम भएको थियो ।
पत्रकारहरूले निर्वाचन पर्यवेक्षण तथा समाचार संकलनका क्रममा कुनै बाधा पर्ने, सवारी साधन रोक्ने आदि कार्य भएमा तत्काल आफूलाई जानकारी दिन आग्रह गर्दै तत्कालै समाधान गर्ने जिल्ला प्रहरी कार्यालयका प्रमुख जितेन्द्रकुमार बस्नेतले प्रतिवद्धता व्यक्त गर्नु भयो ।
मत गणनाका लागि जिल्ला समन्वय समितिको सभाहलमा तारजालीले बारेर सुरक्षित गरिएको छ । सभाहलको आधा खण्डमा जाली भित्र निर्वाचन लडेका दल तथा उम्मेदवारका प्रतिनिधिहरू बस्न कुर्चीको प्रवन्ध गरिएको छ । हलको आधा भागमा म्याट विच्छ्याएर चार ठाउँमा मत गणना गर्न सक्ने प्रवन्ध गरिएको बताइएको छ । मतगणना स्थलमा दुई थान सिसिटिभी क्यामरा समेत जडान गरिएको छ ।
आजदेखि मुख्य निर्वाचन अधिकृतको कार्यालय समेत सोही हलको मञ्चतर्फको खण्डमा सञ्चालन गर्न थालिएको सो कार्यालले जनाएको छ ।
कार्यक्रममा जिल्लामा कार्यरत राष्ट्रिय तथा स्थानीयस्तरमा सञ्चालित सञ्चारमाध्यमका प्रमुख तथा प्रतिनिधिहरूले भाग लिएका थिए ।