आज तीव्र गतिको हावाहुरी चल्ने, प्राधिकरणको सातबुँदे आग्रह

काठमाडौं– राष्ट्रिय विपद् जोखिम न्यूनीकरण तथा व्यवस्थापन प्राधिकरणले आज वैशाख १६ मुलुकका विभिन्न भागमा तीव्र गतिको हावाहुरी चल्ने जानकारी दिदै सावधानी अपनाउन आग्रह गरिएको छ । सुदूरपश्चिमदेखि कोशी प्रदेशका विभिन्न जिल्लामा तीव्र हावाहुरीको सम्भावना रहेको राष्ट्रिय विपद जोखिम न्यूनिकरण तथा व्यवस्थापन प्राधिकरणले वैशाख १५ गते एक विज्ञप्ति जारी गरी त्यस्तो जानकारी दिएको हो ।
प्राधिकरणका केही स्थानमा आज वैशाख १६ तीव्र हावाहुरीको पूर्वानुमान छ ।
सुदूरपश्चिम प्रदेशका डडेलधुरा र डोटीसहित आसपासका जिल्ला, लुम्बिनी प्रदेशका बर्दिया, बाँके, दाङ र अर्घाखाँची हित आसपासका जिल्लामा तीव्र गतिको हावाहुरी चल्ने सम्भावना रहेको प्राधिकरणले जनाएको छ । मधेस प्रदेशका धनुषा र बारासहित आसपासका जिल्ला र कोसी प्रदेशको मोरङसहित आसपासका जिल्लामा हावाहुरी चल्ने सम्भावना रहेकोले आवश्यक सतर्कता अपनाउन प्राधिकरणले आग्रह गरेको छ ।
हावाहुरी साँझ करिब ५ः४५ बजे सुरु हुने सम्भावना छ । वैशाख १७ बिहान करिब ७ः४५ बजे हावाहुरी ‘समाप्त हुने’ सम्भावना रहेको विज्ञप्तिमा उल्लेख छ ।
मेघगर्जन÷चट्याङ÷हावाहुरी÷असिनासहित पानी पर्ने प्रणाली पश्चिमदेखि क्रमशः पूर्वतिर सर्दै जाने सम्भावना रहेकोले देशका धेरै ठाउँहरूमा यसको प्रभाव पर्ने सम्भावना छ ।
प्राधिकरणको ७ बुँदे आग्रह यस्तो छ :
सकेसम्म घरबाहिर हिँडडुल नगर्ने ।
घरको झ्यालढोका राम्रोसँग बन्द गर्ने ।
जस्तालगायतबाट बनेको छानो कमजोर छ भने बन्धन बलियो बनाउने ।
घरबाहिर आगो नबाल्ने, घरभित्र आगो बाल्दा पनि सावधानी अपनाउने ।
लड्न सक्ने कमजोर संरचना, अग्ला रुख, खम्बानजिक र बिजुलीको तारमुनि नबस्ने ।
बिजुलीको तार लत्रिएको छ भने नछुने ।
उडाएर आएको सामानबाट चोट लाग्ने जोखिम हुने भएकाले चनाखो रहने ।
यसका साथै जल तथा मौसम विज्ञान प्राधिकरणबाट जारी हुने मौसमसम्बन्धी पूर्वानुमान र प्राधिकरणबाट जारी हुने सूचना नियमित जानकारीमा राखी सतर्कता अपनाउन आग्रह गरिएको छ ।