चुनाव अघि टिकट बाड्नेलाई कारबाही : रास्वपा

काठमाडौं– चुनाव आउनु अघि नै कसैलाई पनि टिकट दिने प्रतिबद्धता व्यक्त नगर्न राष्ट्रिय स्वतन्त्र पार्टी (रास्वपा)ले आफ्ना सांसदहरूलाई निर्देशन दिएको छ । पार्टी संसदीय दलको बैठकमा पार्टी सभापति रवि लामिछानेले यस्तो निर्देशन वैशाख १६ गते दिनु भएको हो ।
‘आउँदो निर्वाचनमा उपयुक्त उम्मेदवार चयन र निर्वाचन पूर्व प्रशिक्षणको लागि वैशाख २० देखि क्यान्डिडेट क्लबको अभ्यास हुँदैछ । तसर्थ, कसैले कसैलाई आगामी निर्वाचनको टिकटबारे कुनै पनि प्रतिबद्धता नगर्न निर्देशन छ’ रास्वपाका प्रवक्ता मनिष झाले बताउनु भएको छ । उहाँका अनुसार कतै त्यस्तो गलत अभ्यास भेटिए कारबाहीको भागिदार हुनुपर्ने चेतावनी पनि दिएको छ ।
रास्वपाका प्रवक्ता झाले रास्वपाको सबै सांसदहरूको लेटरहेड र कार्ड लगायतको कागजातमा एक रूपता अपनाउन निर्देशन दिइएको समेत जानकारी दिनुभयो । उहाँले भन्नुभयो, ‘आफ्नो कुनै कागजातमा माननीय सम्बोधन नगर्न पनि रास्वपाले निर्देशन दिएको छ । ‘प्रवक्ता झाले भन्नुभयो, ‘धेरै कुराहरू सिक्न बाँकी छ तसर्थ सबै सांसदहरूलाई मेन्टर र सल्लाहकारहरूको अभ्यास गर्न र सके जति सल्लाह र सुझाव लिन सुझाव दिइएको छ ।’
सभापति रवि लामिछाने संसदीय दल बैठकमा ः
रास्वपाका सभापति रवि लामिछानले संसदीय दलको अनौपचारिक छलफलमा सहभागी हुनु भएको छ । उहाँले आफ्नो दलबाट विजयी सांसदहरूलाई १२ वटा निर्देशन दिनु भएको छ । सिंहदरबारस्थित संसदीय दल कार्यालयमा बसेको बैठकमा सभापति रविले सरकारले सिफारिस गरेको पाँच अध्यादेश, सुकुम्बासी बस्तीमा डोजर चलाइएको र सांसदहरूको भूमिकालगायतका विषयमा निर्देशन दिनु भएको हो ।
सभापति रविको निर्देशन सारसंक्षेपमा :
१) सांसद र मन्त्रीबीच निश्चित समय अन्तरालमा मन्त्रालयको सचिव सहितको मन्त्रालयगत अन्तरक्रिया गरिनेछ ।
२) सरकार फेरियो अब सत्ता र सार्वजनिक सेवाको संस्कार फेरिन आवश्यक छ । यो अबको महत्त्वपूर्ण प्राथमिकता हो ।
३) मालिक बन्न खोज्नेको लागि रास्वपा हैन, यो दल सेवक र सहजकर्ताहरूको लागि हो ।
४) हेल्लो सरकारलाई अझै बढी प्रभावकारी बनाउने र गुनासोबारे हुँदै गरेको काम कारवाहीबारे अवस्था ट्रयाक गर्न मिल्ने हुने गरि काम हुँदैछ ।
५) सांसदले सबै तहको समन्वय गर्न सक्नुपर्छ तर प्रमुख प्राथमिकता भनेको कानुन बनाउने हो तर त्यो क्रममा आफै कानुन बन्न खोज्ने हैन ।
६) अन्तर्जातीय विवाहको बहानामा समाजमा हुदै आएको विभेद र दुर्घटना रोक्न आवश्यक छ, यसको लागि पहल गर्न निर्देशन । तर, घटनास्थलमा भावुक भएर सासंदले आफ्नो मर्यादा नबिर्सनु ।
७) खाडी द्वन्द्वले बजार मुल्यमा परेको असर वारे सरकार जानकार छ, ध्यान पुगेको छ । हामी गम्भीर हुँदै काम गर्दैछौं ।
८) संगठन निर्माणमा सबै आफ्नो तहबाट जिम्मेवारीपूर्वक लाग्न सबैलाई अनुरोध छ ।
९) जोखिमपूर्ण स्थानमा रहेको सुकुम्बासीलाई पटक पटक सूचना दिएर सुरक्षित स्थानमा सरल तरिकाले सारिएको छ । लगत संकलन र व्यवस्थापनमा सरकार जिम्मेवार भएर काम गर्दैछ । कतै कुनै थप सजकता आवश्यक छ भने ध्यानाकर्षण गराउन अनुरोध छ । ढलको छेउमा, बाढीको छेउमा बस्न बाध्य नागरिकको सुरक्षित बासस्थान वारे चिन्ता छ र सबैको भविष्यबारे चिन्ता गर्नु यो सरकारको कर्तव्य हो । देशैभरी रहेको यस्तो समस्यालाई एक विशेष आयोग बनाएर शीघ्र काम गरिने छ । तर यो क्रममा सरकारले कसैलाई घरबारविहीन बनाउने छैन। सरकारले घरबारविहीन सबै नागरिकको गास, बास, कपास र रोजगारीको अवसरबारे जिम्मेवारी लिन्छ । सरकारले कोही सुकुम्बासीहरूलाई घरबारविहीन हुन दिने छैन, आवश्यक समन्वयको लागि सुझाव स्वागत योग्य छ । तर अनावश्यक राजनीतिकरण गर्नु हुँदैन । कसैलाई बाढीको जोखिम र ढलको छेउ बस्न बाध्य बनाएर भोट बैंकको राजनीति गर्नु गलत हो ।
१०) अध्यादेशको बारेमा– बिगतमा भएको अनावश्यक दलीयकरण र गलत नियुक्तिलाई नसच्याएसम्म जनताले यो सरकारबाट गरेको अपेक्षा पूरा गर्न सकिँदैन । ‘पहिले अध्यादेश दल फुटाउन वा विपक्षीलाई थुन्न ल्याइने अभ्यास भएको स्मरण गर्दै ‘अहिलेको अभ्यास कसैलाई दुःख दिन वा कसैलाई सुविधा दिन हैन, यो आवश्यक सुधारको लागि हो’ भन्नुभयो । उहाँले भन्नुभयो, ‘यो कदम कानुनी दायरामा बसेर गरिँदै गरेको एक अभ्यास हो ।’
सभापति रविले कानुन, राजनीतिक व्यवहार र लोकतान्त्रिक पद्धतिप्रति रास्वपा कति गम्भीर छ भन्ने सूचक संसदीय समिति प्रमुख प्रतिपक्षले एक बचन माग नगर्दा पनि दिएको अभ्यासले पनि देखाएको भन्दै आशंका नगर्न आग्रह गर्नुभयो । हामी त्यो सच्याउन चाहन्थ्यौं, इमानदार भएर बढौं ।
११) कैयौँ संवैधानिक आयोग, नियोगमा खाली स्थानहरू छन, महत्त्वपूर्ण निर्णयहरू लिन व्यवहारिक कठिनाइ हुँदैछ, वा कार्यवाहकले सम्झौता गरेर चलाउन बाध्य छन । धेरै कुरामा समय कुरेर मात्र बसिरहन सकिँदैन । जनअपेक्षा अनुसार काम गर्न केही सक्रियता र नम्र राजनीतिक आक्रामकता देखाउन आवश्यक छ ।
१२) नियमित छलफल हुनेछ, जनप्रतिनिधिको रूपमा आफ्नो कर्तव्य निर्वाह गर्दा कुनै असम्जस वा कठिनाइ भए म आवश्यक सहजीकरणको लागि सधै उपलब्ध छु । सधैं बैठक कुरेर पनि नबस्न र लिखित रूपमा आफ्नो कुरा राख्न अनुरोध छ । पार्टीमा कोही आउन इच्छुक हुनुहुन्छ भने स्वागत छ तर संगठनमा आएर खटेर प्रमाणित गरेर मात्र अवसरको अपेक्षा राख्न अनुरोध छ ।
अर्को एक प्रसङ्गमा सभापति रवि लामिछानेले सरकारले कुनै पनि सुकुम्बासीलाई घरबार विहीन नबनाउने बताउनु भएको छ । उहाँले त्यो विषयमा अनावश्यक राजनीतिकरण नगर्नसमेत आग्रह गर्नु भएको छ । उहाँले मालिक बन्न खोज्नेका लागि रास्वपा होइन, सेवकका लागि मात्र हो भन्ने पुनः दोहोर्याउनु भएको छ ।