काठमाडौं– रास्वपाले काठमाडौं महानगर समितिको अधिवेशन जेठ १८ गते गर्ने भएको छ । पार्टी गठनपछि पहिलोपटक काठमाडौं महानगरको अधिवेशनको निर्णय गरेको हो । रास्वपाले वडा र पालिका अधिवशेनको प्रक्रिया सुचारु गरिसकेको छ ।
पार्टी केन्द्रले वडा र पालिकाको ३० प्रतिशत अधिवेशन गरेर उपल्लो तहको अधिवेशन गर्न सकिने निर्णय गरेसँग पालिकाको अधिवेशन सहज भएको बताइएको छ । तर काठमाडौं महानगरका शतप्रतिशत वडाको अधिवेशन हुने भएको छ ।
काठमाडौं महानगरका ३२ वडामध्ये ३१ वटा वडाको अधिवेशन सकिएको महानगरका रास्वपा संयोजक शशि पन्तले बताउनु भयो । उहाँका अनुसार, २६ नम्बर वडाको अधिवेशन बाँकी रहेको छ । उहाँले भन्नुभयो, ‘महानगरका सबै वडाको अधिवेशन सकेर जेठ १८ गते महानगरको समितिका लागि अधिवशेन हुने तयारी छ । महानगरको अधिवेशनको मिति निश्चित गरिसकेका छौं ।’
जिल्ला सभापतिको उम्मेदवार बन्न ५ हजार शुल्क :
यसैबीच, रास्वपाले जिल्ला समितिका उम्मेदवारका लागि सभापतिलाई ५ हजार रुपैयाँ शुल्क तोकेको छ । जिल्ला अधिवेशन कार्यविधि अनुसार जिल्ला सभापतिको उम्मेदवारको शुल्क ५ हजार तोकिएको हो । जिल्ला अधिवेशन यही जेठको २३ र २४ गते गर्ने निर्णय गरेको छ ।
कार्यविधि अनुसार उपसभापति, सचिव, सहसचिव र कोषाध्यक्षलाई पनि समान ५ हजार र सदस्यलाई एक हजार रुपैयाँ शुल्क तोकिएको छ । निर्वाचन क्षेत्र उपसंयोजक र सचिवको उम्मेदवारले एक हजार शुल्क बुझाउनु पर्दछ भने सदस्यका लािग पाँच सय रुपैयाँ तोकिएको छ ।
रास्वपाको विधानमा जिल्ला समितिमा सभापति, उपसभापति, सचिव, सहसचिव १÷१ जना हुने व्यवस्था छ । सम्बन्धित जिल्लामा बाहुल्य भएको जातीय क्लष्टर, दलित सदस्य र प्रतिनिधि सभा क्षेत्रबाट १÷१ सदस्य निर्वाचित हुनेछन् । जिल्ला समितिका लागि थप तीन जना सदस्य हुनेछन् ।
जिल्ला समिति विजोर अंक हुने गरी कार्यसमितिमा सभापतिले २ वा ३ जना मनोनित गर्ने अधिकार दिइएको छ । जिल्ला समितिमा पालिका सभापतिहरू पदेन सदस्य हुने व्यवस्था राखिएको छ । जिल्ला अधिवेशनका लागि तोकिएका थप प्रतिनिधिहरूमा पालिका समिति, जनप्रतिनिधि, प्रदेश सभा समिति अन्तर्गत रहेका सबै संरचनाका सदस्य लगायत जिल्ला अधिवेशनका प्रतिनिधि हुनेछन् ।
कार्यविधि अनुसार जिल्ला अधिवेशनमा सहभागी हुन पाउने प्रतिनिधिको सुनिश्चित गरिएको छ । जिल्ला समितिका सबै पदाधिकारी जिल्ला अधिवेशनका प्रतिनिधि हुनेछन् । जिल्लाको संरचना अन्तर्गत रहेका सल्लाहकार परिषद्, अनुशासन आयोग, विभाग, र्याट, सम्पर्क विभाग, निर्वाचन क्षेत्रको समिति जिल्ला अधिवेशनका प्रतिनिधि हुने भएका छन् ।
आउँदो असार ७ देखि ९ गतेसम्म प्रथम महाधिवेशनको मिति तय गरेको रास्वपाले जेठ २३ र २४ गतेका लागि जिल्ला अधिवेशन तोकेको हो ।
प्रकाशित मिति २०८३ जेष्ठ ७, बिहीबार २१:०४ गते
