काठमाडौं– सत्तारूढ राष्ट्रिय स्वतन्त्र पार्टी (रास्वपा)का नेता एवम् सांसद मनिष झाले आफ्नो पार्टीका कार्यकर्ताहरू हिन्दुवादी अभियन्ता हुने छुट रहेको बताउनु भएको छ । गृहनगर जनकपुरमा आउनु भएका नेता झाले सञ्चारकर्मीहरूसँग कुराकानी गर्दै उहाँले हिन्दुवादी अभियानमा लाग्न पाउनु कार्यकर्ताहरूको व्यक्तिगत स्वतन्त्रता भएको साउन १७ गते उल्लेख गर्नु भएको हो ।
नेता झाले यस विषयलाई लिएर अतिरञ्जित गर्न आवश्यक नरहेको बताउनु भयो । उहाँका अनुसार पार्टीको सदस्य र धार्मिक आस्थाका आधारमा अभियानमा सहभागी हुनु दुवै व्यक्तिगत स्वतन्त्रताको विषय भएको हो । उहाँले भन्नुभयो, ‘वार्तामा सहभागी भएकै आधारमा विवाद सिर्जना गर्नु उचित होइन ।’
सुनसरी घटनापछि जनकपुर लगायत तराईका विभिन्न जिल्लामा हिन्दुवादी संगठनहरूले प्रदर्शन गर्दै आएका थिए । त्यसै क्रममा जनकपुरमा भएको प्रदर्शन साम्य पार्न सरकारले ’हिन्दु सम्राट सेना’ नामको संगठनसँग वार्ता गरेको थियो । उक्त वार्तामा हिन्दु सम्राट सेनाका तर्फबाट सहभागी एक व्यक्ति रास्वपा सदस्य भएको खुलेपछि त्यसबारे जबाफ दिँदै रास्वपा नेता झाले हिन्दुवादी अभियन्ता हुन पाउने स्वतन्त्रता आफ्ना सदस्यहरूलाई रहेको बताउनु भएको हो ।
झाले भन्नुभयो, ‘यो कुरा कस्तो हो भने, हाम्रा १५ जना कार्यकर्तामध्ये एक जना वार्तामा हुनुहुन्थ्यो । उहाँ राष्ट्रिय स्वतन्त्र पार्टीको सदस्य हो, तर उहाँ हिन्दुवादी अभियन्ता पनि हो । त्यो उहाँको व्यक्तिगत स्वतन्त्रता हो । हिन्दुवादी अभियन्ता हाम्रो पार्टीको सदस्य पनि हुन पाउनुहुन्छ ।’ उहाँका अनुसार रास्वपाका भ्रातृ संगठनहरू छैनन्, तर धर्मप्रतिको आस्था हाम्रा पार्टीका सदस्यहरूले पनि राख्न पाउनुहुन्छ । उहाँहरू धर्म–आस्थाको अभियन्ताका रूपमा हामीसँगै वार्ताको टेबलमा पनि आउनुपर्छ र आउन पाउनुहुन्छ ।
त्यसबारेमा थप प्रष्ट्याउँदै नेता झाले भन्नुभयो, ‘उहाँले नै यो आन्दोलनमा तोडफोड, आगजनी र हत्या–हिंसामा जानुको सट्टा ‘होइन वार्ता गरौं’ भनेर सबैलाई वार्ताको टेबलमा ल्याउनुभयो । कुनै पार्टीको सदस्यले सरकारसँग वार्ता गर्न पाउँदैन र ? आन्दोलनमै जानुपर्ने, तोडफोड नै गर्नुपर्ने र हत्या–हिंसामै सीमित हुनुपर्ने ? कस्तो तर्क हो सञ्चार माध्यमको ?
पार्टीको कुनै पनि कार्यकर्ता कुनै धर्मप्रति आस्था राख्ने व्यक्ति हुन पाउने र परिवारको सदस्य हुन पाउने समेत उहाँले प्रष्ट्याउनु भयो । उहाँका अनुसार एक जना पार्टीको सदस्य कुनै धर्मप्रति आस्था राख्ने व्यक्ति हुन सक्छ; ऊ बुबा, आमा, श्रीमती वा श्रीमान् हुन सक्छ । जे पनि हुन सक्छ नि ! तिमी रास्वपा हौ, त्यसैले छोरा हुन पाउँदैनौ, भाइ हुन पाउँदैनौ भन्नु कहाँको तर्क हुन्छ ? उहाँले भन्नुभयो, ‘रास्वपाको सदस्यको जीवनको अर्को अंश पनि हुन्छ। उहाँहरू त्यहाँबाट वार्ताको टेबलमा पनि आउन पाउनुहुन्छ । आउनुभयो, उहाँहरूको माग हामीले बुझ्यौं, ग्रहण गर्यौं र सम्भावना भएका मागहरूप्रति त्यसरी नै अघि बढ्नेछौं ।’
रास्वपाका पार्टी सदस्य भएको कारणले नै आन्दोलनलाई हिंसात्मक बाटोमा नभई वार्तामार्फत समाधान खोज्न सफल भएको दाबी उनले गरे । हिन्दू सम्राट सेनाका सम्भावित र उचित मागमाथि थप छलफल गरेर सरकार अगाडी बढ्ने छ मmाले भन्नुभयो । आन्दोलनकारीका मागहरू संवैधानिक, व्यावहारिक र सामाजिक दृष्टिले सम्भव हुने गरी परिमार्जन गर्न लामो समय छलफल गरिएको उहाँको कथन छ ।
सरकारले हिन्दू सम्राट सेनाका प्रतिनिधिसँग साढे नौ घण्टा वार्ता गरेको थियो ।
प्रकाशित मिति २०८३ श्रावण १८, सोमबार १७:२६ गते
